newsics.com
ಗರ್ಭಾವಸ್ಥೆ ಎನ್ನುವುದು ಪ್ರತಿ ಹೆಣ್ಣಿಗೂ ಸುಮಧುರ ಭಾವದ ಸಮಯ. ಅಷ್ಟೇ ಅಲ್ಲ, ಬದುಕಿನ ಮುಖ್ಯ ಘಟ್ಟಗಳಲ್ಲಿ ಒಂದು. ತಾಯಿಯಾಗಬೇಕೆಂಬುದು ಪ್ರತಿ ಹೆಣ್ಣಿನ ಅದಮ್ಯ ಬಯಕೆ.
ಗರ್ಭಾವಸ್ಥೆಯ ಸಮಯದಲ್ಲಿ ಎಷ್ಟು ಆರೈಕೆ ಮಾಡಿದರೂ ಸಾಲುವುದಿಲ್ಲ. ಗರ್ಭ ಧರಿಸಿದ ಮೊದಲ ಮೂರು ತಿಂಗಳು ಆಕೆಯ ದೇಹ ಭ್ರೂಣದ ಬೆಳವಣಿಗೆಯ ಜತೆ ಹೊಂದಿಕೊಳ್ಳಬೇಕಾಗುವುದರಿಂದ ದೈಹಿಕವಾಗಿ, ಮಾನಸಿಕವಾಗಿ ಹಲವು ಬದಲಾವಣೆಗಳಾಗುತ್ತವೆ. ಅದ್ದರಿಂದ ಗರ್ಭಿಣಿಯ ಕಾಳಜಿ ಬಹಳ ಮುಖ್ಯವಾಗುತ್ತದೆ. ಗರ್ಭಾವಸ್ಥೆಯ ಅವಧಿಯಲ್ಲಿ ಲೈಂಗಿಕತೆ ನಡೆಸಬಹುದಾ? ಅಥವಾ ಇಲ್ಲವಾ ಎನ್ನುವ ಗೊಂದಲ ಹಲವರದು.
ಸೂಕ್ತ ಭಂಗಿ ಅವಶ್ಯ:
ವೈದ್ಯರ ಪ್ರಕಾರ, ಗರ್ಭ ಧರಿಸಿದ ಮೇಲೆಯೂ ಲೈಂಗಿಕತೆ ನಡೆಸಬಹುದು. 9 ತಿಂಗಳಲ್ಲಿ ಯಾವಾಗ ಬೇಕಾದರೂ ಲೈಂಗಿಕ ಕ್ರಿಯೆಯಲ್ಲಿ ಪಾಲ್ಗೊಳ್ಳಬಹುದು. ಆದರೆ ವೈದ್ಯರ ಸಲಹೆ ಮತ್ತು ಸೂಕ್ತ ಭಂಗಿಗಳಲ್ಲಿ ನಡೆಸಿದರೆ ತಾಯಿ ಮತ್ತು ಮಗು ಯಾರಿಗೂ ಹಾನಿಯಾಗುವುದಿಲ್ಲ.
ಆದರೆ, ಗರ್ಭಪಾತ ಅಥವಾ ಗರ್ಭದಲ್ಲಿ ಏನಾದರೂ ಸಮಸ್ಯೆಗಳಿದ್ದರೆ ಈ ವೇಳೆ ಮಿಲನಕ್ರಿಯೆ ನಡೆಸುವುದು ಒಳ್ಳೆಯದಲ್ಲ.
ಮೊದಲ 4 ತಿಂಗಳು ಜಾಗ್ರತೆಯಿರಲಿ:
ಮುಂಜಾಗ್ರತೆಯ ದೃಷ್ಟಿಯಿಂದ ಗರ್ಭಿಣಿ ತನ್ನ ಮೊದಲ 16 ವಾರ (4 ತಿಂಗಳು) ಶಾರೀರಿಕ ಸಂಬಂಧ ಇಟ್ಟುಕೊಳ್ಳದಿರುವುದೇ ಒಳ್ಳೆಯದು. ಸಹಜ ಮಿಲನ ಕ್ರಿಯೆಗಾಗಿ 16 ವಾರದ ಬಳಿಕ ಗರ್ಭಿಣಿ ಆರೋಗ್ಯ ಗಮನಿಸಿ ವೈದ್ಯರ ಸಲಹೆ ಪಡೆದು ಮಿಲನ ಕ್ರಿಯೆ ನಡೆಸಬಹುದು. ಗರ್ಭದಲ್ಲಿ ಏನಾದರೂ ಸಮಸ್ಯೆಗಳಿದ್ದರೆ ಗರ್ಭಿಣಿ ಹಾಗೂ ಮಗು ಸುರಕ್ಷಿತವಾಗಿರಲು ಲೈಂಗಿಕ ಕ್ರಿಯೆ ಮಾಡದಿರುವುದೇ ಸೂಕ್ತ.
ಗರ್ಭಿಣಿ ಗರ್ಭಕಂಠದ ಸಮಸ್ಯೆ ಹೊಂದಿದ್ದರೆ ಅಥವಾ ಈ ಹಿಂದೆ ಮಗುವಿನ ಅಕಾಲಿಕ ಜನನದಂತಹ ಸಂದರ್ಭ ಇಂತಹ ಸಮಸ್ಯೆ ಎದುರಿಸಿದ್ದರೆ ಮತ್ತೆ ಗರ್ಭ ಧರಿಸಿದ ವೇಳೆ ಲೈಂಗಿಕ ಕ್ರಿಯೆಯಲ್ಲಿ ಪಾಲ್ಗೊಳ್ಳಬೇಡಿ ಎನ್ನುತ್ತಾರೆ ವೈದ್ಯರು.
ಗರ್ಭಿಣಿಯ ಜನನಾಂಗದಲ್ಲಿ ನೀರಿನ ಡಿಸ್ಚಾರ್ಜ್ ಹೆಚ್ಚಿರುವ ಸಂದರ್ಭದಲ್ಲಿ ಅಥವಾ ಜರಾಯುವಿನಲ್ಲಿ ಸಮಸ್ಯೆ ಇದ್ದಾಗ ಗರ್ಭ ಧರಿಸಿದಾಗ ಲೈಂಗಿಕ ಕ್ರಿಯೆ ಒಳ್ಳೆಯದಲ್ಲ.
ಯಾವ ತಿಂಗಳಿನಲ್ಲಾದರೂ ಲೈಂಗಿಕ ಕ್ರಿಯೆ ನಡೆಸಬಹುದು. ಆದರೆ ಭಂಗಿಗಳ ಅರಿವಿರಬೇಕು. ಏಕೆಂದರೆ ಮಗುವಿಗೆ ಮತ್ತು ತಾಯಿಗೆ ಕಷ್ಟವಾಗದ ರೀತಿಯಲ್ಲಿ ಮಿಲನ ಕ್ರಿಯೆ ನಡೆಸುವುದು ಮುಖ್ಯವಾಗಿರುತ್ತದೆ. ಇದಕ್ಕೆ ವೈದ್ಯರ ಸಲಹೆ ಅವಶ್ಯವಾಗಿರುತ್ತದೆ.
ಮಿಲನ ಕ್ರಿಯೆಯಿಂದ ಲಾಭ:
ಗರ್ಭಾವಸ್ಥೆಯಲ್ಲಿ ಲೈಂಗಿಕ ಕ್ರಿಯೆ ನಡೆಸುವುದರಿಂದ ಹಲವು ಆರೋಗ್ಯ ಪ್ರಯೋಜನಗಳಿವೆ. ರೋಗನಿರೋಧಕ ಶಕ್ತಿ ಬಲಪಡಿಸುವಲ್ಲಿ ಲೈಂಗಿಕತೆಯು ಪ್ರಮುಖ ಪಾತ್ರ ವಹಿಸುತ್ತದೆ. ಗರ್ಭಾವಸ್ಥೆಯಲ್ಲಿ ಲೈಂಗಿಕತೆಯು ಒತ್ತಡದ ಮಟ್ಟವನ್ನು ಕಡಿಮೆ ಮಾಡುವ ಎಂಡಾರ್ಫಿನ್ಗಳನ್ನು ಬಿಡುಗಡೆ ಮಾಡುತ್ತದೆ. ಇದು ಮಗುವಿಗೆ ಮತ್ತು ತಾಯಿಗೆ ಆರೋಗ್ಯಕರ ವಾತಾವರಣವನ್ನು ಒದಗಿಸುತ್ತದೆ. ಆದರೆ ಮಿಲನಕ್ಕೂ ಮೊದಲು ವೈದ್ಯರ ಸಲಹೆ ಅತ್ಯವಶ್ಯ.
