Subscribe ನ್ಯೂಸಿಕ್ಸ್ ಕನ್ನಡ NewsicsKannada/YouTube
newsics.com
ಸೋಷಿಯಲ್ ಮೀಡಿಯಾದಲ್ಲಿ ಈಗ ವೈರಲ್ ಆಗುತ್ತಿರುವ ಈ ಘಟನೆ ಮಾತ್ರ ಮೆಟ್ರೋ ಪ್ರಯಾಣದ ಮತ್ತೊಂದು ಅಪರೂಪದ ಮತ್ತು ಮನಕಲಕುವ ಮುಖವನ್ನು ಪರಿಚಯಿಸಿದೆ.
ರಿತು ಜೂನ್ (Riru Joon) ಎಂಬುವರು ತಮ್ಮ ಎಕ್ಸ್ (X) ಖಾತೆಯಲ್ಲಿ ಹಂಚಿಕೊಂಡಿರುವ ಈ ಸುಂದರ ಕಥೆ, ಈಗ ಇಂಟರ್ನೆಟ್ ಲೋಕದಲ್ಲಿ ಬಾರೀ ಸದ್ದು ಮಾಡುತ್ತಿದ್ದು, ಓದುಗರ ಮುಖದಲ್ಲಿ ಮಂದಹಾಸ ಮೂಡಿಸುತ್ತಿದೆ.
ರಿತು ಜೂನ್ ಅವರು ಮೆಟ್ರೋದಲ್ಲಿ ಪ್ರಯಾಣಿಸುತ್ತಿದ್ದಾಗ, ಅವರ ಪಕ್ಕದಲ್ಲೇ ಕುಳಿತಿದ್ದ ಹುಡುಗಿಯ ಕೈಯಲ್ಲಿದ್ದ ಒಂದು ಗೋಲ್ಡನ್ ಬಳೆ ಅವರ ಕಣ್ಣಿಗೆ ಬಿತ್ತು. ಅದರ ವಿನ್ಯಾಸ ಎಷ್ಟು ಅದ್ಭುತ ಮತ್ತು ಆಕರ್ಷಕವಾಗಿತ್ತೆಂದರೆ, ರಿತು ಅವರಿಗೆ ಅದನ್ನು ನೋಡಿದ ತಕ್ಷಣ ತುಂಬಾ ಇಷ್ಟವಾಯಿತು.
ತಮಗೂ ಅಂತಹದ್ದೇ ಬಳೆಯನ್ನು ಮಾಡಿಸಿಕೊಳ್ಳಬೇಕು ಎಂಬ ಆಸೆಯಿಂದ ರಿತು ಅವರು, ಆ ಹುಡುಗಿಯನ್ನು ಬಹಳ ವಿನಯದಿಂದ ಮಾತನಾಡಿಸಿದರು. ನಿಮ್ಮ ಈ ಬಳೆಯ ಡಿಸೈನ್ ತುಂಬಾ ಚೆನ್ನಾಗಿದೆ ನನಗೂ ಇದೇ ರೀತಿ ಮಾಡಿಸಿಕೊಳ್ಳಲು ಅನುಕೂಲವಾಗುತ್ತದೆ ನಾನು ಇದರ ಒಂದು ಫೋಟೋ ತೆಗೆದುಕೊಳ್ಳಬಹುದೇ? ಎಂದು ಮನವಿ ಮಾಡಿದರು.
ರಿತು ಅವರ ವಿನಂತಿಯನ್ನು ಕೇಳಿದ ಆ ಅಪರಿಚಿತ ಹುಡುಗಿ ತೋರಿದ ಪ್ರತಿಕ್ರಿಯೆ ಮಾತ್ರ ಎಲ್ಲರನ್ನೂ ಅಚ್ಚರಿಗೊಳಿಸಿದೆ. ಫೋಟೋ ತೆಗೆದುಕೊಳ್ಳಲು ಅನುಮತಿ ನೀಡುವ ಬದಲಿಗೆ, ಆಕೆ ತಕ್ಷಣವೇ ತನ್ನ ಕೈಯಲ್ಲಿದ್ದ ಬಳೆಯನ್ನು ಬಿಚ್ಚಿ ರಿತು ಅವರ ಕೈಗಿಟ್ಟಳು. ಕೇವಲ ಫೋಟೋಕ್ಕಿಂತ ಈ ಬಳೆಯೇ ನಿಮ್ಮ ಬಳಿ ಇರಲಿ, ಆಗ ಅಕ್ಕಸಾಲಿಗರಿಗೆ (Goldsmith) ಇದರ ಡಿಸೈನ್ನ್ನು ಸ್ಪಷ್ಟವಾಗಿ ತೋರಿಸಲು ನಿಮಗೆ ಸುಲಭವಾಗುತ್ತದೆ ಎಂದು ಆಕೆ ನಗುನಗುತ್ತಲೇ ಹೇಳಿದಳು.
ಅಪರಿಚಿತ ಹುಡುಗಿಯ ಈ ಔದಾರ್ಯ ಕಂಡು ರಿತು ಒಂದು ಕ್ಷಣ ಅವಾಕ್ಕಾದರು. ಆಗ ಆ ಯುವತಿ ಮೆಲ್ಲಗೆ ನಗುತ್ತಾ, ಹೆದರಬೇಡಿ, ಇದು ಅಸಲಿ ಚಿನ್ನವಲ್ಲ. ಕೇವಲ ಆರ್ಟಿಫಿಶಿಯಲ್ ಬಳೆ ಎಂದು ಅಸಲಿ ವಿಷಯ ಬಿಚ್ಚಿಟ್ಟಳು.
ಆ ಅಪರಿಚಿತ ಯುವತಿಯ ನಿಷ್ಕಲ್ಮಶ ಪ್ರೀತಿ ಮತ್ತು ದೊಡ್ಡ ಗುಣಕ್ಕೆ ಮನಸೋತ ರಿತು, ಆ ಬಳೆಯನ್ನು ಒಂದು ಸುಂದರ ನೆನಪಿನ ಕಾಣಿಕೆಯಾಗಿ ತಮ್ಮ ಬಳಿಯೇ ಇಟ್ಟುಕೊಂಡಿದ್ದಾರೆ. ಮೆಟ್ರೋದ ಎಲ್ಲಾ ಕಥೆಗಳೂ ಕೆಟ್ಟದಾಗಿರುವುದಿಲ್ಲ. ಕೆಲವು ಕಥೆಗಳು ಹೀಗೆ ಮೌನವಾಗಿದ್ದರೂ ತುಂಬಾ ಸುಂದರವಾಗಿರುತ್ತವೆ ಎಂದು ಅವರು ತಮ್ಮ ಭಾವನೆ ಹಂಚಿಕೊಂಡಿದ್ದಾರೆ.
ಈ ಹೃದಯಸ್ಪರ್ಶಿ ಘಟನೆ ಸೋಷಿಯಲ್ ಮೀಡಿಯಾದಲ್ಲಿ ವೈರಲ್ ಆಗುತ್ತಿದ್ದಂತೆ ನೆಟ್ಟಿಗರು ಫುಲ್ ಖುಷಿಯಾಗಿದ್ದಾರೆ. ಅಪರಿಚಿತ ಹುಡುಗಿಯ ಈ ಸರಳ ಹಾಗೂ ಸುಂದರ ನಡೆಗೆ ಜನರು ಮೆಚ್ಚುಗೆಯ ಸುರಿಮಳೆಗರೆಯುತ್ತಿದ್ದಾರೆ.
ಇಂತಹ ಮುಕ್ತ ಮನಸ್ಸಿನ ದಯಾಳುಗಳನ್ನು ನೋಡುವುದೇ ಅಪರೂಪ. ಆಕೆ ನಿಜಕ್ಕೂ ಅಪರಂಜಿ ಎಂದು ನೆಟ್ಟಿಗರು ಶ್ಲಾಘಿಸಿದ್ದಾರೆ. ಇಂತಹ ಸಣ್ಣ ಸಣ್ಣ ಮಾನವೀಯ ನಡೆಗಳು ಇಂದಿಗೂ ಜಗತ್ತಿನಲ್ಲಿ ಪ್ರೀತಿ ಜೀವಂತವಾಗಿದೆ ಎಂಬುದಕ್ಕೆ ಸಾಕ್ಷಿ ಎಂದು ಹಲವರು ಶ್ಲಾಘಿಸಿದ್ದಾರೆ.
https://x.com/i/status/2010661548575101147
