newsics.com | ನ್ಯೂಸಿಕ್ಸ್
ಭಾರತೀಯ ಕ್ರೀಡಾ ರಂಗಕ್ಕೆ ದೊಡ್ಡ ಆಘಾತಕಾರಿ ಸುದ್ದಿ ಎದುರಾಗಿದೆ. ರೋಯಿಂಗ್ ಕ್ರೀಡಾ ಇತಿಹಾಸದಲ್ಲೇ ದೇಶಕ್ಕೆ ಹೆಮ್ಮೆಯ ತಂದುಕೊಟ್ಟಿದ್ದ ಮೊಟ್ಟಮೊದಲ ವಿಶ್ವಕಪ್ ಚಿನ್ನದ ಪದಕವು ಈಗ ಡೋಪಿಂಗ್ ಬಲೆಗೆ ಬಿದ್ದಿದ್ದು, ಕೈತಪ್ಪುವ ಭೀತಿ ಎದುರಾಗಿದೆ. ಕಳೆದ ಜೂನ್ ತಿಂಗಳಲ್ಲಿ ಸ್ವಿಟ್ಜರ್ಲೆಂಡ್ನಲ್ಲಿ ನಡೆದ ವಿಶ್ವ ರೋಯಿಂಗ್ ಕಪ್ನಲ್ಲಿ ಚಿನ್ನದ ಪದಕ ಗೆದ್ದು ಮಿಂಚಿದ್ದ ರೋವರ್ ಲಕ್ಷಯ್, ಉದ್ದೀಪನ ಮದ್ದು ಪರೀಕ್ಷೆಯಲ್ಲಿ ನಿಷೇಧಿತ ರಾಸಾಯನಿಕ ಬಳಸಿ ಸಿಕ್ಕಿಬಿದ್ದಿದ್ದಾರೆ.
ಐತಿಹಾಸಿಕ ಜಯಕ್ಕೆ ಬಿತ್ತು ಕುತ್ತು
ಕಳೆದ ಜೂನ್ 28, 2026 ರಂದು ಸ್ವಿಟ್ಜರ್ಲೆಂಡ್ನ ಲುಸರ್ನ್ ನಗರದಲ್ಲಿ ಜರುಗಿದ ವಿಶ್ವ ರೋಯಿಂಗ್ ಕಪ್ 3 ರ ಲೈಟ್ವೇಟ್ ಪುರುಷರ ಡಬಲ್ ಸ್ಕಲ್ಸ್ ವಿಭಾಗದಲ್ಲಿ ಲಕ್ಷಯ್ ಹಾಗೂ ಉಜ್ವಲ್ ಕುಮಾರ್ ಸಿಂಗ್ ಜೋಡಿ ಅತ್ಯುತ್ತಮ ಪ್ರದರ್ಶನ ನೀಡಿತ್ತು. ಕೇವಲ 6 ನಿಮಿಷ 26.09 ಸೆಕೆಂಡ್ಗಳಲ್ಲಿ ಗುರಿ ತಲುಪಿದ ಈ ಭಾರತೀಯ ಜೋಡಿ, ದೇಶದ ರೋಯಿಂಗ್ ಇತಿಹಾಸದಲ್ಲೇ ಚೊಚ್ಚಲ ವಿಶ್ವಕಪ್ ಚಿನ್ನದ ಪದಕ ಮುಡಿಗೇರಿಸಿಕೊಂಡು ಸಂಭ್ರಮಿಸಿತ್ತು. ಆದರೆ ಈಗ ಆ ಸಂಭ್ರಮವು ಕಣ್ಣೀರಾಗಿ ಬದಲಾಗಿದೆ.
ಸಿಕ್ಕಿಬಿದ್ದಿದ್ದು ಹೇಗೆ ಮತ್ತು ಅಸಲಿ ಕಾರಣವೇನು?
ಭಾರತೀಯ ಸೇನೆಯಲ್ಲಿ ಹವಿಲ್ದಾರ್ ಆಗಿ ಸೇವೆ ಸಲ್ಲಿಸುತ್ತಿರುವ ಲಕ್ಷಯ್, ಪುಣೆಯ ಆರ್ಮಿ ರೋಯಿಂಗ್ ನೋಡ್ನಲ್ಲಿ ತರಬೇತಿ ಪಡೆಯುತ್ತಿದ್ದರು. ಕಳೆದ ಮೇ 25, 2026 ರಂದು ಇಲ್ಲಿಗೆ ಬಂದ ಕ್ರೀಡಾಧಿಕಾರಿಗಳು, ಅಥ್ಲೀಟ್ಗಳು ತರಬೇತಿ ವೇಳೆ ಯಾವುದೇ ಅಕ್ರಮ ಶಕ್ತಿವರ್ಧಕಗಳನ್ನು ಬಳಸುತ್ತಿಲ್ಲ ಎಂಬುದನ್ನು ಖಚಿತಪಡಿಸಿಕೊಳ್ಳಲು ‘ಸ್ಪರ್ಧೆಯ ಹೊರಗಿನ’ ಮಾದರಿಯನ್ನು ಸಂಗ್ರಹಿಸಿದ್ದರು.
ಈ ರೀತಿ ಸಂಗ್ರಹಿಸಲಾದ ಲಕ್ಷಯ್ ಅವರ ಮಾದರಿಯನ್ನು ಪ್ರಯೋಗಾಲಯದಲ್ಲಿ ಪರೀಕ್ಷಿಸಿದಾಗ, ವಿಶ್ವ ಉದ್ದೀಪನ ಮದ್ದು ಪ್ರತಿರೋಧಕ ಸಂಸ್ಥೆ (WADA) ಸಂಪೂರ್ಣವಾಗಿ ನಿಷೇಧಿಸಿರುವ ‘ಸ್ಟಾನೋಜೋಲೋಲ್’ ಎಂಬ ಅನಾಬೊಲಿಕ್ ಸ್ಟೆರಾಯ್ಡ್ ಅಂಶ ಪತ್ತೆಯಾಗಿದೆ. ಇದರ ತಕ್ಷಣದ ಪರಿಣಾಮವಾಗಿ, ರಾಷ್ಟ್ರೀಯ ಉದ್ದೀಪನ ಮದ್ದು ಪ್ರತಿರೋಧಕ ಸಂಸ್ಥೆಯು ಲಕ್ಷಯ್ ಅವರನ್ನು ಕೂಡಲೇ ಅಮಾನತುಗೊಳಿಸಿದೆ.
ಪದಕ ವಾಪಸ್ ಪಡೆಯಲು ಕಾರಣವೇನು?
ವಿಶ್ವ ರೋಯಿಂಗ್ ಸಂಸ್ಥೆಯ ಕಠಿಣ ನಿಯಮಾವಳಿಗಳ ಪ್ರಕಾರ, ಯಾವುದೇ ಸ್ಪರ್ಧಿಯು ಡೋಪಿಂಗ್ ಪರೀಕ್ಷೆಯಲ್ಲಿ ವಿಫಲರಾದರೆ, ಆ ದಿನಾಂಕದ ನಂತರ ಅವರು ಭಾಗವಹಿಸಿದ ಎಲ್ಲಾ ಈವೆಂಟ್ಗಳ ಫಲಿತಾಂಶಗಳು ರದ್ದುಗೊಳ್ಳುತ್ತವೆ. ಲಕ್ಷಯ್ ಅವರ ಮೂತ್ರದ ಮಾದರಿಯನ್ನು ಮೇ ತಿಂಗಳಲ್ಲಿ ಸಂಗ್ರಹಿಸಲಾಗಿದ್ದು, ಜೂನ್ ಅಂತ್ಯದಲ್ಲಿ ಪದಕ ಗೆಲ್ಲಲಾಗಿದೆ. ಹಾಗಾಗಿ ಈ ಚಿನ್ನದ ಪದಕವನ್ನು ಕ್ರೀಡಾಡಳಿತ ಮಂಡಳಿ ಹಿಂಪಡೆಯುವುದು ಖಚಿತವಾಗಿದೆ. ಇದರಿಂದಾಗಿ ಅವರ ಜೊತೆ ನಿಂತು ಬೆವರು ಹರಿಸಿದ್ದ ಸಹ-ರೋವರ್ ಉಜ್ವಲ್ ಕುಮಾರ್ ಸಿಂಗ್ ಅವರ ಶ್ರಮಕ್ಕೂ ದೊಡ್ಡ ಅನ್ಯಾಯವಾದಂತಾಗಿದೆ.
ಮುಂದಿನ ಕಾನೂನು ಹೋರಾಟ ಮತ್ತು ಕಠಿಣ ಶಿಕ್ಷೆ
ಈ ಪ್ರಕರಣದ ಕುರಿತು ಪ್ರತಿಕ್ರಿಯೆ ನೀಡಿರುವ ಭಾರತೀಯ ರೋಯಿಂಗ್ ಫೆಡರೇಶನ್ (RFI), ಕ್ರೀಡಾಪಟು ತನ್ನ ಮೇಲಿನ ಆರೋಪ ಸುಳ್ಳೆಂದು ಸಾಬೀತುಪಡಿಸಲು ‘ಬಿ’ ಮಾದರಿಯ ಪರೀಕ್ಷೆಗೆ ಅರ್ಜಿ ಸಲ್ಲಿಸಲು ಸಂಪೂರ್ಣ ಬೆಂಬಲಿಸುವುದಾಗಿ ತಿಳಿಸಿದೆ. ಒಂದು ವೇಳೆ ‘ಬಿ’ ಮಾದರಿಯಲ್ಲೂ ಡೋಪಿಂಗ್ ದೃಢಪಟ್ಟರೆ, ಲಕ್ಷಯ್ ಅವರ ಕ್ರೀಡಾಜೀವನಕ್ಕೆ ಕನಿಷ್ಠ 4 ವರ್ಷಗಳ ಕಾಲ ನಿಷೇಧದ ಗಂಭೀರ ಶಿಕ್ಷೆ ಎದುರಾಗಲಿದೆ.
Kargil Vijay Diwas ಕಾರ್ಗಿಲ್ ಯುದ್ಧ ನಡೆದಿದ್ದು ಯಾಕೆ? ಶತ್ರುಗಳನ್ನು ಸದೆಬಡಿದು ಭಾರತ ಗೆದ್ದ ರೋಚಕ ಕಥೆ ಇಲ್ಲಿದೆ
