newsics.com | ನ್ಯೂಸಿಕ್ಸ್
ನಾವು ದಿನನಿತ್ಯ ಬಳಸುವ ಪ್ಲಾಸ್ಟಿಕ್ ಕೇವಲ ಪರಿಸರವನ್ನಷ್ಟೇ ಅಲ್ಲ, ನಮ್ಮ ಹೃದಯವನ್ನೂ ಹಾಳು ಮಾಡುತ್ತಿದೆ ಎಂಬ ಭೀತಿ ಸಂಶೋಧನೆಯಲ್ಲಿ ಬಯಲಾಗಿದೆ. ಬರಿಗಣ್ಣಿಗೆ ಸಿಗದ ಸೂಕ್ಷ್ಮ ಪ್ಲಾಸ್ಟಿಕ್ ಕಣಗಳು ನೇರವಾಗಿ ಮನುಷ್ಯನ ರಕ್ತನಾಳಗಳನ್ನು ಸೇರುತ್ತಿದ್ದು, ಇದು ಹೃದಯಾಘಾತದ (Heart Attack) ಅಪಾಯವನ್ನು ಗಣನೀಯವಾಗಿ ಹೆಚ್ಚಿಸುತ್ತಿದೆ ಎಂದು ಇಟಲಿಯ ವಿಜ್ಞಾನಿಗಳು ಎಚ್ಚರಿಸಿದ್ದಾರೆ. ಇತ್ತೀಚಿನ ‘ಯೂರೋಪಿಯನ್ ಹಾರ್ಟ್ ಜರ್ನಲ್’ನಲ್ಲಿ ಈ ಸಂಶೋಧನಾ ವರದಿ ಪ್ರಕಟವಾಗಿದೆ.
ಹಾರ್ಟ್ ಪೇಷಂಟ್ಗಳ ರಕ್ತದಲ್ಲಿ ಪ್ಲಾಸ್ಟಿಕ್ ಪತ್ತೆ
ಹೃದಯಾಘಾತಕ್ಕೆ ಒಳಗಾದವರ ರಕ್ತದ ಮಾದರಿಗಳನ್ನು ಪರೀಕ್ಷಿಸಿದಾಗ ಸಂಶೋಧಕರು ಆಶ್ಚರ್ಯಚಕಿತರಾಗಿದ್ದಾರೆ. ಆರೋಗ್ಯವಂತ ವ್ಯಕ್ತಿಗಳಿಗೆ ಹೋಲಿಸಿದರೆ, ಹೃದ್ರೋಗದಿಂದ ಬಳಲುತ್ತಿರುವವರ ರಕ್ತದಲ್ಲಿ ಅತ್ಯಂತ ಅಪಾಯಕಾರಿ ಮಟ್ಟದಲ್ಲಿ ‘ಮೈಕ್ರೋಪ್ಲಾಸ್ಟಿಕ್’ ಹಾಗೂ ‘ನ್ಯಾನೊಪ್ಲಾಸ್ಟಿಕ್’ ಕಣಗಳು ಪತ್ತೆಯಾಗಿವೆ. ನಾವು ನೀರು ಕುಡಿಯಲು ಬಳಸುವ ಪ್ಲಾಸ್ಟಿಕ್ ಬಾಟಲಿಗಳು, ಕವರ್ಗಳು, ಕಾಸ್ಮೆಟಿಕ್ಸ್ ಹಾಗೂ ಸಿಂಥೆಟಿಕ್ ಬಟ್ಟೆಗಳಿಂದ ಬಿಡುಗಡೆಯಾಗುವ ಈ ಕಣಗಳು, ದೇಹದ ಆಳಕ್ಕೆ ಇಳಿದು ಡಿಎನ್ಎ ಹಾನಿ ಮಾಡುವ ಮತ್ತು ಕ್ಯಾನ್ಸರ್ ತಂದೊಡ್ಡುವ ಶಕ್ತಿ ಹೊಂದಿವೆ.
- ಹೃದಯಾಘಾತಕ್ಕೊಳಗಾದವರಲ್ಲಿ ಭೀತಿ: ಹಾರ್ಟ್ ಅಟ್ಯಾಕ್ ಆದ ಶೇಕಡಾ 84 ರಷ್ಟು ರೋಗಿಗಳ ರಕ್ತದಲ್ಲಿ ಪ್ಲಾಸ್ಟಿಕ್ ಇರುವುದು ಖಚಿತವಾಗಿದೆ.
- ದೀರ್ಘಕಾಲದ ಹೃದ್ರೋಗಿಗಳು: ರಕ್ತದ ಕೊರತೆಯಿಂದ ಹೃದಯದ ಸಮಸ್ಯೆ ಎದುರಿಸುತ್ತಿರುವ ಶೇಕಡಾ 40 ರಷ್ಟು ಜನರಲ್ಲಿ ಈ ಕಣಗಳು ಕಂಡುಬಂದಿವೆ.
- ಸಾಮಾನ್ಯ ಜನರಲ್ಲಿ ಕಡಿಮೆ: ಯಾವುದೇ ಹೃದಯದ ಕಾಯಿಲೆ ಇಲ್ಲದ ಕೇವಲ ಶೇಕಡಾ 32 ರಷ್ಟು ಜನರಲ್ಲಿ ಮಾತ್ರ ಈ ಕಣಗಳು ಪತ್ತೆಯಾಗಿವೆ.
ಧೂಮಪಾನಿಗಳಿಗೆ 6 ಪಟ್ಟು ಹೆಚ್ಚು ಅಪಾಯ
ಪ್ಯಾಕೇಜಿಂಗ್ಗೆ ಬಳಸುವ ‘ಪಾಲಿಥಿಲೀನ್’ ಎಂಬ ಪ್ಲಾಸ್ಟಿಕ್ ಅಂಶವೇ ರಕ್ತದಲ್ಲಿ ಹೆಚ್ಚಾಗಿ ಕಂಡುಬಂದಿದೆ. ವಿಶೇಷವಾಗಿ ಧೂಮಪಾನ (Smoking) ಮಾಡುವವರಲ್ಲಿ ಮತ್ತು ಅತಿಯಾದ ವಾಯುಮಾಲಿನ್ಯ ಇರುವ ಪ್ರದೇಶದಲ್ಲಿ ವಾಸಿಸುವವರಲ್ಲಿ ಇದರ ತೀವ್ರತೆ ವಿಪರೀತವಾಗಿದೆ. ಧೂಮಪಾನ ಮಾಡದವರ ರಕ್ತಕ್ಕೆ ಹೋಲಿಸಿದರೆ, ಸಿಗರೇಟ್ ಸೇದುವವರ ದೇಹದಲ್ಲಿ ಈ ಪ್ಲಾಸ್ಟಿಕ್ ಕಣಗಳ ಪ್ರಮಾಣ ಬರೋಬ್ಬರಿ ಆರು ಪಟ್ಟು ಹೆಚ್ಚಾಗಿರುವುದು ಸಾಬೀತಾಗಿದೆ.
“ಪ್ಲಾಸ್ಟಿಕ್ ಕಣಗಳಿಗೂ ಹೃದಯಾಘಾತಕ್ಕೂ ನೇರ ಸಂಬಂಧವಿದೆ ಎಂದು ಸದ್ಯಕ್ಕೆ ಹೇಳಲು ಸಾಧ್ಯವಿಲ್ಲದಿದ್ದರೂ, ರಕ್ತದಲ್ಲಿ ಪ್ಲಾಸ್ಟಿಕ್ ಶೇಖರಣೆಯಾಗುವುದು ಹೃದ್ರೋಗದ ಅಪಾಯವನ್ನು ದುಪ್ಪಟ್ಟು ಮಾಡುತ್ತದೆ ಎಂಬುದಂತೂ ನಿಜ” ಎಂದು ಪ್ರಮುಖ ಸಂಶೋಧಕ ಪ್ರೊಫೆಸರ್ ಎಮ್ಯಾನುಯೆಲ್ ಬಾರ್ಬಾಟೊ ಹೇಳಿದ್ದಾರೆ. ಈ ಸೂಕ್ಷ್ಮ ಕಣಗಳು ರಕ್ತದ ಮೂಲಕ ದೇಹವಿಡೀ ಓಡಾಡಿ ರಕ್ತನಾಳದ ಗೋಡೆಗಳಲ್ಲಿ ಕುಳಿತುಕೊಳ್ಳುತ್ತವೆ. ಇದು ರಕ್ತ ಪರಿಚಲನೆಗೆ ಅಡ್ಡಿಪಡಿಸುತ್ತದೆ ಎಂದು ಅವರು ಕಳವಳ ವ್ಯಕ್ತಪಡಿಸಿದ್ದಾರೆ.
