newsics.com | ನ್ಯೂಸಿಕ್ಸ್
ಸಿಡ್ನಿ: ವಿಶ್ವವಿಖ್ಯಾತ ‘ಜುರಾಸಿಕ್ ಪಾರ್ಕ್’ ಚಲನಚಿತ್ರದಲ್ಲಿ ಡಾ. ಅಲಾನ್ ಗ್ರಾಂಟ್ ಎಂಬ ಐಕಾನಿಕ್ ಪಾತ್ರದ ಮೂಲಕ ವಿಶ್ವಾದ್ಯಂತ ಕೋಟ್ಯಂತರ ಅಭಿಮಾನಿಗಳ ಹೃದಯ ಗೆದ್ದಿದ್ದ ನ್ಯೂಜಿಲೆಂಡ್ನ ಖ್ಯಾತ ಹಿರಿಯ ನಟ ಸ್ಯಾಮ್ ನೀಲ್ (78) ಸೋಮವಾರ ಆಸ್ಟ್ರೇಲಿಯಾದ ಸಿಡ್ನಿಯಲ್ಲಿ ನಿಧನರಾಗಿದ್ದಾರೆ.
ನಟನ ಅಧಿಕೃತ ಇನ್ಸ್ಟಾಗ್ರಾಮ್ ಖಾತೆಯಲ್ಲಿ ಜಂಟಿ ಪ್ರಕಟಣೆ ಬಿಡುಗಡೆ ಮಾಡಿರುವ ಅವರ ಕುಟುಂಬಸ್ಥರು, ಸ್ಯಾಮ್ ನೀಲ್ ಅವರ ನಿಧನದ ಸುದ್ದಿಯನ್ನು ಅಧಿಕೃತವಾಗಿ ಖಚಿತಪಡಿಸಿದ್ದಾರೆ.
ಕಳೆದ ಐದು ವರ್ಷಗಳಿಗೂ ಹೆಚ್ಚು ಕಾಲ ‘ನಾನ್-ಹಾಡ್ಜ್ಕಿನ್ ಲಿಂಫೋಮಾ’ (ರಕ್ತದ ಕ್ಯಾನ್ಸರ್ ತಳಿ) ಎಂಬ ಮಾರಕ ಕಾಯಿಲೆಯೊಂದಿಗೆ ಅವರು ಹೋರಾಡುತ್ತಿದ್ದರು. ಕಿಮೋಥೆರಪಿ ಚಿಕಿತ್ಸೆಗಳು ವಿಫಲವಾದಾಗಲೂ ಧೃತಿಗೆಡದ ಅವರು, ಇತ್ತೀಚೆಗಷ್ಟೇ ಜೀನ್ ಥೆರಪಿ ಮತ್ತು ಅಧುನಿಕ ‘ಸಿಎಆರ್ ಟಿ-ಸೆಲ್’ (CAR T-cell) ಚಿಕಿತ್ಸೆಯ ಮೂಲಕ ತಾವು ಸಂಪೂರ್ಣವಾಗಿ ಕ್ಯಾನ್ಸರ್ ಮುಕ್ತರಾಗಿರುವುದಾಗಿ ಸಂದರ್ಶನವೊಂದರಲ್ಲಿ ಘೋಷಿಸಿದ್ದರು. ಆದರೆ, ಈ ಸಂತಸದ ಬೆನ್ನಲ್ಲೇ ಸಂಭವಿಸಿದ ಅವರ ದಿಢೀರ್ ಸಾವು ಜಾಗತಿಕ ಚಿತ್ರರಂಗಕ್ಕೆ ದೊಡ್ಡ ಆಘಾತ ನೀಡಿದೆ.
ಚಿತ್ರರಂಗದ ಪಯಣ ಮತ್ತು ಜಾಗತಿಕ ಖ್ಯಾತಿ
1977 ರ ‘ಸ್ಲೀಪಿಂಗ್ ಡಾಗ್ಸ್’ ಚಿತ್ರದ ಮೂಲಕ ಚಿತ್ರರಂಗ ಪ್ರವೇಶಿಸಿದ ಸ್ಯಾಮ್ ನೀಲ್, ನಂತರ ‘ಅಟ್ಯಾಕ್ ಫೋರ್ಸ್ ಝೆಡ್’, ‘ಡೆಡ್ ಕಾಮ್’, ‘ದಿ ಪಿಯಾನೋ’ ಮತ್ತು ‘ಇವೆಂಟ್ ಹರೈಸನ್’ ನಂತಹ ಪ್ರಸಿದ್ಧ ಚಿತ್ರಗಳಲ್ಲಿ ನಟಿಸಿ ಅಂತರರಾಷ್ಟ್ರೀಯ ಮಟ್ಟದಲ್ಲಿ ಗುರುತಿಸಿಕೊಂಡಿದ್ದರು.
ಆದರೆ, 1993 ರಲ್ಲಿ ಸ್ಟೀಫನ್ ಸ್ಪಿಲ್ಬರ್ಗ್ ನಿರ್ದೇಶನದ ‘ಜುರಾಸಿಕ್ ಪಾರ್ಕ್’ ಚಿತ್ರದಲ್ಲಿ ಅವರು ನಿರ್ವಹಿಸಿದ ಡೈನೋಸಾರ್ ವಿಜ್ಞಾನಿ ಡಾ. ಅಲಾನ್ ಗ್ರಾಂಟ್ ಪಾತ್ರ ಅವರನ್ನು ರಾತ್ರೋರಾತ್ರಿ ಜಾಗತಿಕ ಸೂಪರ್ಸ್ಟಾರ್ ಆಗಿ ಮಾಡಿತು. ಇದೇ ಪಾತ್ರವನ್ನು ಅವರು ಮುಂದೆ ‘ಜುರಾಸಿಕ್ ಪಾರ್ಕ್ III’ (2001) ಮತ್ತು ಇತ್ತೀಚಿನ ‘ಜುರಾಸಿಕ್ ವರ್ಲ್ಡ್ ಡೊಮಿನಿಯನ್’ (2022) ಚಿತ್ರಗಳಲ್ಲೂ ಯಶಸ್ವಿಯಾಗಿ ಮುಂದುವರಿಸಿದ್ದರು. ಅವರ ನಿಧನಕ್ಕೆ ಹಾಲಿವುಡ್ ಪ್ರಮುಖರು ಹಾಗೂ ಪ್ರಪಂಚದಾದ್ಯಂತದ ಸಿನಿಮಾ ಪ್ರೇಮಿಗಳು ತೀವ್ರ ಸಂತಾಪ ಸೂಚಿಸುತ್ತಿದ್ದಾರೆ.
HD Revanna ಲೈಂಗಿಕ ಕಿರುಕುಳ ಕೇಸ್: ಹೆಚ್.ಡಿ. ರೇವಣ್ಣಗೆ ಸುಪ್ರೀಂ ಕೋರ್ಟ್ ನೋಟಿಸ್
