newsics.com | ನ್ಯೂಸಿಕ್ಸ್
ಆಫೀಸ್ ಇರಲಿ ಅಥವಾ ಮೀಟಿಂಗ್ ಇರಲಿ… ಕೆಲವರು ಯಾವಾಗಲೂ ತಡವಾಗಿಯೇ ಬರುತ್ತಾರೆ. ಇವರನ್ನು ನಾವು ಸಾಮಾನ್ಯವಾಗಿ ‘ಬೇಜವಾಬ್ದಾರಿ’ ಅಥವಾ ‘ಸೋಮಾರಿಗಳು’ ಎಂದು ಅಂದುಕೊಳ್ಳುತ್ತೇವೆ. ಆದರೆ, ಮನೋವಿಜ್ಞಾನದ ಪ್ರಕಾರ ಇವರು ಬೇಕೆಂದೇ ತಡವಾಗಿ ಬರುವುದಿಲ್ಲ. ಬದಲಿಗೆ ಅವರ ಮಿದುಳಿನ ಯೋಚನಾ ಶೈಲಿ ಮತ್ತು ವ್ಯಕ್ತಿತ್ವವೇ ಇದಕ್ಕೆ ಕಾರಣವಾಗಿರುತ್ತದೆ. ಆ ಮುಖ್ಯ ಕಾರಣಗಳು ಇಲ್ಲಿವೆ.
ಸಮಯದ ತಪ್ಪು ಅಂದಾಜು (Planning Fallacy)
ತಡವಾಗಿ ಬರುವವರು ಸಮಯವನ್ನು ಸರಿಯಾಗಿ ಲೆಕ್ಕ ಹಾಕುವುದಿಲ್ಲ. ಉದಾಹರಣೆಗೆ, ರೆಡಿಯಾಗಿ ಕಚೇರಿ ತಲುಪಲು 45 ನಿಮಿಷ ಬೇಕಾಗಿದ್ದರೂ, ಕೇವಲ 20 ನಿಮಿಷ ಸಾಕು ಎಂದು ತಪ್ಪು ಲೆಕ್ಕಾಚಾರ ಮಾಡುತ್ತಾರೆ. ಸೈಕಾಲಜಿಯಲ್ಲಿ ಇದನ್ನು ‘ಪ್ಲಾನಿಂಗ್ ಫ್ಯಾಲಸಿ’ ಎನ್ನಲಾಗುತ್ತದೆ. ಉದ್ದೇಶಪೂರ್ವಕವಾಗಿ ತಡ ಮಾಡದಿದ್ದರೂ, ಸಮಯದ ಈ ತಪ್ಪು ಗ್ರಹಿಕೆಯಿಂದ ಲೇಟಾಗುತ್ತಾರೆ.
ಕೊನೆಯ ಕ್ಷಣದ ಗಡಿಬಿಡಿ
ಇನ್ನು ಕೆಲವರು ಹೊರಡುವ ತೀರಾ ಕೊನೆಯ ಕ್ಷಣದವರೆಗೂ ಸುಮ್ಮನಿರುತ್ತಾರೆ. ಆಮೇಲೆ ಒಮ್ಮೆಗೆ ಬಟ್ಟೆ ಬದಲಾಯಿಸುವುದು, ಫೋನ್ ಮಾಡುವುದು, ವಾಟರ್ ಬಾಟಲಿ ತುಂಬಿಸುವುದು ಹೀಗೆ ಹತ್ತಾರು ಕೆಲಸಗಳನ್ನು ಒಟ್ಟಿಗೆ ಮಾಡಲು ಹೋಗುತ್ತಾರೆ. ಈ ಕೊನೆಯ ನಿಮಿಷದ ಗಡಿಬಿಡಿಯೇ ಅವರ ಸಮಯವನ್ನು ಹಾಳುಮಾಡಿಬಿಡುತ್ತದೆ.
ಮಾನಸಿಕ ಒತ್ತಡ ಮತ್ತು ಆತಂಕ
ಮನೆಯಿಂದ ಹೊರಡುವಾಗ ಉಂಟಾಗುವ ಆತಂಕ ಕೂಡ ಲೇಟಾಗಲು ಕಾರಣ. ಕೆಲವರು ಗಾಬರಿಯಿಂದ ಪದೇ ಪದೇ ಬಾಗಿಲ ಲಾಕ್, ಗ್ಯಾಸ್ ಸ್ಟವ್, ಕೀಲಿ ಕೈ ಅಥವಾ ಫೋನ್ ತಗೊಂಡಿದ್ದೇನಾ ಇಲ್ವಾ ಅಂತ ಚೆಕ್ ಮಾಡುವುದರಲ್ಲೇ ಸಮಯ ವ್ಯರ್ಥ ಮಾಡುತ್ತಾರೆ. ಇನ್ನು ಕೆಲವರಿಗೆ ತಮಗೆ ಇನ್ನೂ ಸಾಕಷ್ಟು ಸಮಯವಿದೆ ಅನಿಸುತ್ತಿರುತ್ತದೆ, ಆದರೆ ಅಷ್ಟರಲ್ಲೇ ಲೇಟಾಗಿಬಿಟ್ಟಿರುತ್ತದೆ.
ಕೆಲಸದಲ್ಲಿ ಅತಿಯಾದ ತಲ್ಲೀನತೆ
ಹೆಚ್ಚು ಸೃಜನಶೀಲತೆ (Creative) ಇರುವ ವ್ಯಕ್ತಿಗಳು ತಾವು ಮಾಡುತ್ತಿರುವ ಕೆಲಸದಲ್ಲಿ (ಪುಸ್ತಕ ಓದುವುದು, ಸಂಗೀತ ಅಥವಾ ಯಾವುದೇ ಪ್ರಾಜೆಕ್ಟ್) ಎಷ್ಟು ಮುಳುಗಿಹೋಗುತ್ತಾರೆಂದರೆ, ಅವರಿಗೆ ಸಮಯದ ಪ್ರಜ್ಞೆಯೇ ಇರುವುದಿಲ್ಲ. ಇದರಿಂದಾಗಿಯೂ ಅವರು ಎಲ್ಲ ಕಡೆ ತಡವಾಗಿ ತಲುಪುತ್ತಾರೆ.
ಯಾವಾಗಲೂ ಲೇಟಾಗಿ ಬರುವವರು ಇತರರಿಗೆ ಗೌರವ ಕೊಡುವುದಿಲ್ಲ ಎಂದು ನೇರವಾಗಿ ದೂಷಿಸಲು ಬರುವುದಿಲ್ಲ. ಅವರ ಮಿದುಳಿನ ಆಲೋಚನಾ ಶೈಲಿ ಮತ್ತು ಕೊನೆಯ ಕ್ಷಣದ ಮಲ್ಟಿಟಾಸ್ಕಿಂಗ್ ಅಭ್ಯಾಸಗಳೇ ಇದಕ್ಕೆ ಮುಖ್ಯ ಕಾರಣವಾಗಿರುತ್ತದೆ.
Tissue Paper Secret ಟಿಶ್ಯೂ ಪೇಪರ್ ಎಲ್ಲಾ ಬಿಳಿ ಬಣ್ಣದಲ್ಲೇ ಇರೋದ್ಯಾಕೆ? ಇದರ ಹಿಂದಿದೆ ಇಂಟರೆಸ್ಟಿಂಗ್ ಕಾರಣ
