newsics.com | ನ್ಯೂಸಿಕ್ಸ್
ವಾಷಿಂಗ್ಟನ್ (ಅಮೆರಿಕ): ಹೊಸ ಬಾಳಿಗೆ ಹೆಜ್ಜೆ ಇಟ್ಟು ಇನ್ನೂ ನಾಲ್ಕು ತಿಂಗಳು ಕಳೆಯುವ ಮುನ್ನವೇ ಪತ್ನಿಯ ಕುತ್ತಿಗೆ ಹಿಸುಕಿ ಪ್ರಾಣ ತೆಗೆದಿರುವ ಭೀಕರ ಘಟನೆ ಅಮೆರಿಕದ ವಾಷಿಂಗ್ಟನ್ ರಾಜ್ಯದ ಬೆಲ್ಲೆವ್ಯೂ ನಗರದಲ್ಲಿ ನಡೆದಿದೆ. ಈ ಕೃತ್ಯ ಎಸಗಿದ ಆರೋಪದ ಮೇಲೆ ತೆಲಂಗಾಣ ಮೂಲದ ಸಾಫ್ಟ್ವೇರ್ ಉದ್ಯೋಗಿ ಅವಿನಾಶ್ ನಾರ್ನೆ (30) ಎಂಬಾತನನ್ನು ಅಲ್ಲಿನ ಪೊಲೀಸರು ಸೆರೆಹಿಡಿದಿದ್ದಾರೆ. ಕೊಲೆಯ ಬೆನ್ನಲ್ಲೇ ಪತ್ನಿಯ ಮೃತದೇಹದ ಫೋಟೋವನ್ನು ಭಾರತದಲ್ಲಿದ್ದ ತನ್ನ ರಹಸ್ಯ ಪ್ರಿಯತಮೆಗೆ ಈತ ವಾಟ್ಸಾಪ್ ಮಾಡಿದ್ದ ಎನ್ನಲಾಗಿದೆ.
ಹತ್ಯೆಗೀಡಾದ ದುರ್ದೈವಿಯನ್ನು ರಾಜಿತಾ ಸಬ್ಬಿನೇನಿ (27) ಎಂದು ಗುರುತಿಸಲಾಗಿದೆ. ಆರೋಪಿ ಅವಿನಾಶ್ ತನ್ನ ಮೇಲಿನ ಪ್ರಥಮ ದರ್ಜೆ ಕೊಲೆ (First-Degree Murder) ಆರೋಪವನ್ನು ಕೋರ್ಟ್ನಲ್ಲಿ ನಿರಾಕರಿಸಿದ್ದಾನಾದರೂ, ಆತನಿಗೆ ಜಾಮೀನು ಸಿಗದಂತೆ ಕಿಂಗ್ ಕೌಂಟಿ ಜೈಲಿನಲ್ಲಿ ಇಡಲಾಗಿದೆ.
ಬಾತ್ ರೂಂ ಕಥೆ ಕಟ್ಟಿದ್ದ ಕಿರಾತಕ!
ಕಳೆದ ವರ್ಷದ ಅಕ್ಟೋಬರ್ನಲ್ಲಿ ಆರೋಪಿ ಅವಿನಾಶ್ ತಾನೇ ಪೊಲೀಸರಿಗೆ ಫೋನ್ ಮಾಡಿ, “ನನ್ನ ಪತ್ನಿ ಬಾತ್ ರೂಂನಲ್ಲಿ ಪ್ರಜ್ಞಾಹೀನ ಸ್ಥಿತಿಯಲ್ಲಿ ಬಿದ್ದಿದ್ದಾಳೆ” ಎಂದು ನಂಬಿಸಲು ಯತ್ನಿಸಿದ್ದ. ಆದರೆ ವೈದ್ಯಕೀಯ ತಜ್ಞರು ನಡೆಸಿದ ಮರಣೋತ್ತರ ಪರೀಕ್ಷೆಯಲ್ಲಿ ರಾಜಿತಾ ಅವರದ್ದು ಸಹಜ ಸಾವಲ್ಲ, ಬದಲಿಗೆ ಕುತ್ತಿಗೆ ಹಿಸುಕಿ ಉಸಿರುಗಟ್ಟಿಸಿ ಸಾಯಿಸಲಾಗಿದೆ ಎಂಬ ಸತ್ಯದ ತಲೆಯೂಡ ಹೊರಬಿದ್ದಿದೆ.
ಸಿಕ್ಕಿಬಿದ್ದಿದ್ದು ಹೇಗೆ?
- ಡೋರ್ ಲಾಕ್ ಡೇಟಾ: ಅಪಾರ್ಟ್ಮೆಂಟ್ನ ಡಿಜಿಟಲ್ ಡೋರ್ ಲಾಕ್ ದಾಖಲೆಗಳನ್ನು ತಪಾಸಣೆ ನಡೆಸಿದಾಗ, ಘಟನೆ ನಡೆದ ಅವಧಿಯಲ್ಲಿ ಪತಿಯನ್ನು ಬಿಟ್ಟು ಬೇರೆ ಯಾರೂ ಒಳಗೆ ಪ್ರವೇಶಿಸಿಲ್ಲ ಎಂಬುದು ಸಾಬೀತಾಗಿದೆ.
- ಫೋನ್ ಕಾಲ್ಸ್ ಮತ್ತು ಚಾಟ್ಸ್: ಹತ್ಯೆ ನಡೆದ ದಿನವೇ ಅವಿನಾಶ್ ಭಾರತದಲ್ಲಿದ್ದ ಯುವತಿಗೆ ನಾಲ್ಕು ಬಾರಿ ಕರೆ ಮಾಡಿದ್ದ ಹಾಗೂ ಆಕೆಗೆ ಶವದ ಚಿತ್ರಗಳನ್ನು ಕಳುಹಿಸಿ ನಂತರ ಡಿಲೀಟ್ ಮಾಡಿದ್ದ ಡಿಜಿಟಲ್ ಸಾಕ್ಷ್ಯಗಳು ಪೊಲೀಸರಿಗೆ ಲಭ್ಯವಾಗಿವೆ.
ಭಾರತದಲ್ಲಿದ್ದ ಯುವತಿಯೊಂದಿಗಿನ ಅನೈತಿಕ ಸಂಬಂಧವೇ ಈ ಕೊಲೆಗೆ ಮುಖ್ಯ ಕಾರಣ ಎಂದು ತನಿಖಾಧಿಕಾರಿಗಳು ನ್ಯಾಯಾಲಯಕ್ಕೆ ತಿಳಿಸಿದ್ದು, ಆರೋಪಿಯ ಪಾಸ್ಪೋರ್ಟ್ ಜಪ್ತಿ ಮಾಡಿ ತನಿಖೆ ತೀವ್ರಗೊಳಿಸಲಾಗಿದೆ.
Fire Mishap ಮರಕ್ಕೆ ಡಿಕ್ಕಿ ಹೊಡೆದು ಧಗಧಗನೆ ಹೊತ್ತಿ ಉರಿದ ಪೆಟ್ರೋಲ್ ಟ್ಯಾಂಕರ್; ಹಾಲಿನ ಲಾರಿಗೂ ವ್ಯಾಪಿಸಿದ ಬೆಂಕಿ
