newsics.com/ನ್ಯೂಸಿಕ್ಸ್
ವಾಷಿಂಗ್ಟನ್: ಎರಡೂವರೆ ತಿಂಗಳಿನಿಂದ ಅಮೆರಿಕ ಹಾಗೂ ಇರಾನ್ ಮಧ್ಯೆ ನಡೆಯುತ್ತಿರುವ ಯುದ್ಧವನ್ನು ನಿಲ್ಲಿಸುವ ಬಗ್ಗೆ ಇರಾನ್ ಸಲ್ಲಿಸಿದ ಶಾಂತಿ ಪ್ರಸ್ತಾವನೆಯನ್ನು ಸೋಮವಾರ (ಮೇ 11) ತಿರಸ್ಕರಿಸಿದ್ದ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಇದೀಗ ಎಐ ರಚಿತ ಚಿತ್ರಗಳನ್ನು ಶೇರ್ ಮಾಡುವ ಮೂಲಕ ಭೀಕರ ದಾಳಿಯ ಮುನ್ಸೂಚನೆ ನೀಡಿದ್ದಾರೆ.
ಟ್ರಂಪ್ ಅವರ ಟ್ರುತ್ ಖಾತೆಗೆ ಅಪ್ಲೋಡ್ ಮಾಡಲಾದ ಈ ಚಿತ್ರಗಳು, ಇರಾನಿನ ಸ್ವತ್ತುಗಳನ್ನು ಗುರಿಯಾಗಿಸಿಕೊಂಡು ಅಮೆರಿಕದ ಮಿಲಿಟರಿ ಪಡೆಗಳು ನಡೆಸುವ ಕಾಲ್ಪನಿಕ ಯುದ್ಧ ದೃಶ್ಯಗಳನ್ನು ಒಳಗೊಂಡಿದೆ. ಒಂದು ಚಿತ್ರದಲ್ಲಿ ಅಮೆರಿಕದ ಯುದ್ಧನೌಕೆಯು ಹೈ-ಪವರ್ ಲೇಸರ್ ಆಯುಧದಿಂದ ಇರಾನಿನ ಧ್ವಜ ಹೊಂದಿರುವ ವಿಮಾನವನ್ನು ಸ್ಫೋಟಿಸುತ್ತಿರುವುದನ್ನು ತೋರಿಸಲಾಗಿದೆ. ಜತೆಗೆ ʼʼಲೇಸರ್: ಬಿಂಗ್, ಬಿಂಗ್, ಗೋನ್” ಎಂದು ಬರೆಯಲಾಗಿದೆ.
ಲೇಸರ್ ಆಯುಧ ಬಳಸುವ ಮೂಲಕ ಅಮೆರಿಕ ಇರಾನ್ ವಿರುದ್ಧದ ಯುದ್ಧವನ್ನು ಮತ್ತೊಂದು ಹಂತಕ್ಕೆ ಕೊಂಡೊಯ್ಯಲು ಮುಂದಾಗಿರುವ ಸೂಚನೆಯಾ ಇದು? ಎನ್ನುವ ಆತಂಕ ಈ ಪೋಸ್ಟ್ ಮೂಲಕ ಜಗತ್ತನ್ನೇ ಕಾಡಲು ಆರಂಭಿಸಿದೆ. ಶತ್ರುಗಳ ಕ್ಷಿಪಣಿಗಳು, ಡ್ರೋನ್ಗಳು ಮತ್ತು ಶಸ್ತ್ರಗಳನ್ನು ಸೆಕೆಂಡುಗಳಲ್ಲಿ ಹೊಡೆದು ಹಾಕಬಲ್ಲ ಲೇಸರ್ ಆಯುಧವನ್ನು ಅಮೆರಿಕ ಬಳಸಲು ಮುಂದಾಗಿದೆ ಎಂದು ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ.
ಮದ್ದುಗುಂಡುಗಳನ್ನು ಅವಲಂಬಿಸುವ ಅಗತ್ಯವನ್ನು ಇದು ಬಹಳ ಕಡಿಮೆ ಮಾಡುತ್ತದೆ ಎನ್ನುತ್ತಾರೆ ಅವರು. ಹೊರ್ಮುಜ್ ಜಲಸಂಧಿಯಲ್ಲಿ ಅಮೆರಿಕ ಈ ಆಧುನಿಕ ಶಸ್ತ್ರಾಸ್ತ್ರ ಬಳಸಿ ಇರಾನ್ ಅನ್ನು ಎದುರಿಸಲು ಮುಂದಾಗಿದೆ ಎನ್ನಲಾಗಿದೆ.
ಅಮೆರಿಕದ ದಾಳಿ ಮತ್ತಷ್ಟು ಶಕ್ತವಾದರೆ ಈಗಾಗಲೇ ಕುಸಿದು ಬಿದ್ದಿರುವ ಆರ್ಥಿಕತೆ ಮತ್ತೆ ಹಳ್ಳ ಹಿಡಿಯಲಿದೆ ಎನ್ನುವ ಆತಂಕ ಜಗತ್ತನ್ನೇ ಕಾಡುತ್ತಿದ್ದು, ಮುಂದಿನ ನಡೆ ಬಗ್ಗೆ ಕಳವಳದಿಂದ ಎದುರು ನೋಡುತ್ತಿದೆ.
https://www.newsics.com/2026/05/13/famous-kannada-actor-dilip-raj-passed-away-due-to-heart-attack/
