newsics.com/ನ್ಯೂಸಿಕ್ಸ್
ಮುಂಬೈ: ಸಾರ್ವಕಾಲಿಕ ದಾಖಲೆಯ ಗರಿಷ್ಠ ಮಟ್ಟದಲ್ಲಿದ್ದ ಬೆಳ್ಳಿ ಬೆಲೆ ಈಗ ಅಕ್ಷರಶಃ ನೆಲಕಚ್ಚಿದೆ. ಒಂದು ವರ್ಷದಲ್ಲಿ ಗಳಿಸಿದ್ದ ಲಾಭಾಂಶವನ್ನು ಕಳೆದುಕೊಂಡಿದೆ. ಬೆಳ್ಳಿಯ ದರವು ತನ್ನ ಗರಿಷ್ಠ ಮಟ್ಟದಿಂದ ಈ ವರೆಗೂ ಬರೊಬ್ಬರಿ 2 ಲಕ್ಷ ರೂಪಾಯಿ ಕುಸಿತ ಕಂಡಿದೆ.
https://youtube.com/shorts/A7gPa–K6QY?si=UClQxtCV5fiwGWUd
2026ರ ಆರಂಭದಿಂದ ಇದುವರೆಗೆ ಗಳಿಸಿದ ಎಲ್ಲಾ ಲಾಭವನ್ನು ಭಾರತದಲ್ಲಿ ಬೆಳ್ಳಿ ಬೆಲೆ ಕಳೆದುಕೊಂಡಿದೆ. ಏಪ್ರಿಲ್ 2026ರಲ್ಲಿ ಭಾರತದಲ್ಲಿ ಬೆಳ್ಳಿ ಬೆಲೆಯು ಭಾರೀ ಕುಸಿತ ಕಂಡಿದ್ದು, ವರ್ಷದ ಆರಂಭದಿಂದ ಈವರೆಗೆ ಗಳಿಸಿದ್ದ ಎಲ್ಲಾ ಲಾಭವೂ ಅಳಿಸಿಹೋಗಿದೆ.
ಜನವರಿ ಅಂತ್ಯದಲ್ಲಿ ಪ್ರತಿ ಕೆಜಿಗೆ ಅಂದಾಜು 4.39 ಲಕ್ಷ ರೂ ತಲುಪುವ ಮೂಲಕ ದಾಖಲೆ ನಿರ್ಮಿಸಿದ್ದ ಬೆಳ್ಳಿ ಬೆಲೆ, ಈಗ ಕೆಜಿಗೆ ಬರೊಬ್ಬರಿ 2 ಲಕ್ಷ ರೂ ಗೂ ಅಧಿಕ ಕುಸಿತ ಕಂಡು, ಏಪ್ರಿಲ್ 29, 2026ರ ವೇಳೆಗೆ ಅಂದಾಜು ₹2.38 ಲಕ್ಷದಿಂದ ₹2.40 ಲಕ್ಷ ಆಸುಪಾಸಿನಲ್ಲಿ ವಹಿವಾಟು ನಡೆಸುತ್ತಿದೆ.
2026ರ ಆರಂಭದ ಭರ್ಜರಿ ಏರಿಕೆಯ ನಂತರ ಉಂಟಾದ ಈ ದಿಢೀರ್ ಕುಸಿತಕ್ಕೆ ಜಾಗತಿಕ ಆರ್ಥಿಕ ಮತ್ತು ಭೌಗೋಳಿಕ ಬದಲಾವಣೆಗಳು ಕಾರಣ ಎನ್ನಲಾಗಿದೆ. ಬಲವರ್ಧನೆಗೊಂಡ ಯುಎಸ್ ಡಾಲರ್ ಮತ್ತು ಬಡ್ಡಿದರಗಳೂ ಕೂಡ ಬೆಳ್ಳಿದರ ಕುಸಿತದ ಮೇಲೆ ಗಂಭೀರ ಪರಿಣಾಮ ಬೀರಿದೆ.
ಅಮೆರಿಕದ ಫೆಡರಲ್ ರಿಸರ್ವ್ನ ಅಧ್ಯಕ್ಷರಾಗಿ ಕೆವಿನ್ ವಾರ್ಷ್ ಅವರ ನಾಮನಿರ್ದೇಶನವು ಡಾಲರ್ ಮೇಲಿನ ನಂಬಿಕೆಯನ್ನು ಹೆಚ್ಚಿಸಿತು. ಅಂತೆಯೇ ಬಲವಾದ ಡಾಲರ್ ಬೆಳ್ಳಿಯನ್ನು ಇತರ ಕರೆನ್ಸಿಗಳಲ್ಲಿ ಖರೀದಿಸುವವರಿಗೆ ದುಬಾರಿಯಾಗಿಸುತ್ತದೆ.
2025ರಲ್ಲಿ ಬೆಳ್ಳಿ ಬೆಲೆ 170% ಮತ್ತು 2026ರ ಜನವರಿಯಲ್ಲಿ 74% ರಷ್ಟು ಭಾರಿ ಏರಿಕೆ ಕಂಡಿತ್ತು. ಇದರಿಂದ ಹೂಡಿಕೆದಾರರು ತಮ್ಮ ಲಾಭವನ್ನು ನಗದು ಮಾಡಿಕೊಳ್ಳಲು ಹೆಚ್ಚಿನ ಪ್ರಮಾಣದಲ್ಲಿ ಮಾರಾಟಕ್ಕೆ ಮುಂದಾಗಿದ್ದು ಬೆಲೆ ಕುಸಿತಕ್ಕೆ ಕಾರಣವಾಯಿತು.
