https://youtube.com/shorts/kIkAyfI4sxw?si=aggVueBL3fodeELS
Subscribe ನ್ಯೂಸಿಕ್ಸ್ ಕನ್ನಡ
newsics.com
ಮದುವೆ ಈಗ ಮೊದಲಿನಂತಿಲ್ಲ. ಕಾಲ ಬದಲಾಗಿದೆ. ನಿಮ್ಮ ಮನೆಯ ಮದುವೆಯೇ ನಿಮಗೆ ಲಕ್ಷಾಂತರ ರೂಪಾಯಿ ಸಂಪಾದಿಸಿ ಕೊಡಬಲ್ಲದು. ಹೌದು, ಭಾರತದಲ್ಲೀಗ ‘ವೆಡ್ಡಿಂಗ್ ಟೂರಿಸಂ’ ಹೊಸ ಸಂಚಲನ ಮೂಡಿಸುತ್ತಿದೆ.
ವಿದೇಶಿ ಅತಿಥಿಗಳನ್ನು ನಿಮ್ಮ ಮದುವೆಗೆ ಆಹ್ವಾನಿಸುವ ಮೂಲಕ ಮದುವೆಯ ಟೆಂಟ್ ಮತ್ತು ಅಡುಗೆಯ ಬಿಲ್ ಅನ್ನು ಅವರೇ ಪಾವತಿಸುವಂತೆ ಮಾಡುವ ವಿಶಿಷ್ಟ ಸಂಪ್ರದಾಯವೊಂದು ಶುರುವಾಗಿದೆ.
ಭಾರತೀಯ ವಿವಾಹ ಅಂದ್ರೆ ಅಲ್ಲಿ ಬಣ್ಣ ಬಣ್ಣದ ಉಡುಪುಗಳು, ತಮಟೆ ಸದ್ದು, ಸಖತ್ ಡ್ಯಾನ್ಸ್ ಮತ್ತು ಬಾಯಲ್ಲಿ ನೀರೂರಿಸುವ ಖಾದ್ಯಗಳಿರುತ್ತವೆ. ಈ ಸಂಭ್ರಮವನ್ನು ಸವಿಯಲು ವಿದೇಶಿ ಪ್ರವಾಸಿಗರು ಹಾತೊರೆಯುತ್ತಿದ್ದಾರೆ. ಕೇವಲ ಪ್ರೇಕ್ಷಣೀಯ ಸ್ಥಳಗಳನ್ನು ನೋಡಿ ಸುಸ್ತಾಗಿರುವ ಪ್ರವಾಸಿಗರಿಗೆ, ಭಾರತದ ಅಸಲಿ ಸಂಸ್ಕೃತಿ ತಿಳಿಯಲು ಆಸಕ್ತರಾಗಿದ್ದಾರೆ. ಇದಕ್ಕೆ ಮದುವೆಗಿಂತ ಉತ್ತಮ ವೇದಿಕೆ ಮತ್ತೊಂದಿಲ್ಲ. ಅದಕ್ಕಾಗಿಯೇ ಅವರು ಸಂಬಂಧಿಕರಲ್ಲದಿದ್ದರೂ, ಅಪರಿಚಿತರ ಮದುವೆಯಲ್ಲಿ ಭಾಗವಹಿಸಲು ಭಾರೀ ಮೊತ್ತದ ಹಣವನ್ನು ‘ಟಿಕೆಟ್’ ರೂಪದಲ್ಲಿ ನೀಡಲು ಸಿದ್ಧರಿದ್ದಾರೆ.
ಈ ಅದ್ಭುತ ಐಡಿಯಾವನ್ನು ಸಾಕಾರಗೊಳಿಸುತ್ತಿರುವುದು ‘Join My Wedding’ ಎಂಬ ಆನ್ಲೈನ್ ಪೋರ್ಟಲ್. ಇದು ಮದುವೆ ಮಾಡಿಕೊಳ್ಳುವ ದಂಪತಿಗಳು ಮತ್ತು ಭಾರತೀಯ ಸಂಸ್ಕೃತಿ ಇಷ್ಟಪಡುವ ವಿದೇಶಿ ಪ್ರವಾಸಿಗರನ್ನು ಬೆಸೆಯುವ ಕೊಂಡಿ. ದಂಪತಿಗಳು ತಮ್ಮ ಮದುವೆಯ ದಿನಾಂಕ ಮತ್ತು ಸ್ಥಳವನ್ನು ಇಲ್ಲಿ ನೋಂದಾಯಿಸಿದರೆ, ಆಸಕ್ತ ವಿದೇಶಿಯರು ಟಿಕೆಟ್ ಖರೀದಿಸಿ ನಿಮ್ಮ ಮದುವೆಗೆ ಅತಿಥಿಗಳಾಗಿ ಬರುತ್ತಾರೆ. ಸಾಂಪ್ರದಾಯಿಕ ಭಾರತೀಯ ಉಡುಪು ಧರಿಸಿ, ಹಸೆಮಣೆಯ ಮುಂದೆ ನಿಂತು ನಿಮ್ಮ ಸಂಭ್ರಮವನ್ನು ದುಪ್ಪಟ್ಟು ಮಾಡುತ್ತಾರೆ.
ಈ ಟ್ರೆಂಡ್ ಕೇವಲ ಬೆಂಗಳೂರು, ಮುಂಬೈ ಅಥವಾ ದೆಹಲಿಯಂತಹ ಮೆಟ್ರೋ ನಗರಗಳಿಗೆ ಸೀಮಿತವಾಗಿಲ್ಲ. ಅಚ್ಚರಿಯ ವಿಷಯವೆಂದರೆ, ಪಾಟ್ನಾ ಮತ್ತು ಬರೇಲಿಯಂತಹ ಸಣ್ಣ ನಗರಗಳ ಮದುವೆಗಳಿಗೂ ವಿದೇಶಿ ಅತಿಥಿಗಳು ಆಗಮಿಸುತ್ತಿದ್ದಾರೆ.
ಕಳೆದ ಡಿಸೆಂಬರ್ ಒಂದೇ ತಿಂಗಳಲ್ಲಿ ಸುಮಾರು 900ಕ್ಕೂ ಹೆಚ್ಚು ಮದುವೆಗಳು ಈ ಪೋರ್ಟಲ್ನಲ್ಲಿ ನೋಂದಣಿಯಾಗಿವೆ. ಇದರಿಂದ ಬರುವ ಆದಾಯವು ಮದುವೆಯ ಅದ್ಧೂರಿ ಅಲಂಕಾರ ಅಥವಾ ಅಡುಗೆಯ ವೆಚ್ಚ ಸರಿದೂಗಿಸಲು ದಂಪತಿಗಳಿಗೆ ನೆರವಾಗುತ್ತಿದೆ.
ನಿಮ್ಮ ಮದುವೆಗೂ ವಿದೇಶಿ ಅತಿಥಿಗಳು ಬರಲಿ, ಹೆಚ್ಚಿನ ಆದಾಯ ಬರಲಿ ಎಂದು ನೀವು ಬಯಸಿದರೆ, ನೀವು https://www.joinmywedding.com ವೆಬ್ಸೈಟ್ಗೆ ಭೇಟಿ ನೀಡಿ, ನಿಮ್ಮ ಮದುವೆಯ ಸಂಪೂರ್ಣ ವಿವರಗಳನ್ನು ಅಲ್ಲಿ ಪಟ್ಟಿ ಮಾಡಬೇಕು. ಅಲ್ಲಿ ನಿಗದಿಪಡಿಸಿದ ಟಿಕೆಟ್ ದರವನ್ನು ಪ್ರವಾಸಿಗರು ಪಾವತಿಸುತ್ತಾರೆ. ಈ ಹಣವು ನೇರವಾಗಿ ನಿಮ್ಮ ಕೈ ಸೇರುತ್ತದೆ. ಇದರಿಂದ ನಿಮಗೆ ಆರ್ಥಿಕ ಲಾಭದ ಜತೆಗೆ, ವಿದೇಶಿ ಸ್ನೇಹಿತರನ್ನು ಸಂಪಾದಿಸುವ ಹೊಸ ಅನುಭವವೂ ಸಿಗುತ್ತದೆ.
ನಾ ಡ್ರೈವರಾ… ಹಾಡಿಗೆ ಸೊಂಟ ಕುಣಿಸಿದ ಶ್ರೇಯಾಂಕಾ; ಬಿದ್ದುಬಿದ್ದು ನಕ್ಕ ಸ್ಮೃತಿ ಮಂಧನಾ, ವೈರಲ್ ವಿಡಿಯೋ ನೋಡಿ
