https://youtube.com/shorts/qpCJajqGxrE?si=vJgoarkrMD0AAjgU
Subscribe ನ್ಯೂಸಿಕ್ಸ್ ಕನ್ನಡ
newsics.com
ಮೈಸೂರು ಸಿಲ್ಕ್ ಸೀರೆ ಕೊಳ್ಳಲು ಮೈಸೂರಿನ ಮಾನಂದವಾಡಿ ರಸ್ತೆಯಲ್ಲಿರುವ ಕೆ.ಎಸ್.ಐ.ಸಿ ಘಟಕದ ಮುಂದೆ ಬೆಳಗ್ಗೆ 6 ಗಂಟೆಯಿಂದಲೇ ಜನರು ಸರತಿ ಸಾಲಿನಲ್ಲಿ ನಿಲ್ಲುತ್ತಿರುವ ವಿಡಿಯೋ ಜಾಲತಾಣಗಳಲ್ಲಿ ವೈರಲ್ ಆಗಿದೆ.
ಇಲ್ಲಿ ಸಿದ್ಧಗೊಳ್ಳುವ ಸೀರೆಗಳನ್ನು ಕಾರ್ಖಾನೆಯ ಮುಂಭಾಗದಲ್ಲಿರುವ ಸೇಲ್ಸ್ ಕೌಂಟರ್ನಲ್ಲಿ ಪ್ರತಿದಿನ ಮಾರಾಟ ಮಾಡಲಾಗುತ್ತದೆ. ಮೈಸೂರಿನ ಮೃಗಾಲಯದ ಬಳಿ, ಕಾಳಿದಾಸ ರಸ್ತೆ, ಯಾತ್ರಿ ನಿವಾಸ ಹಾಗೂ ಕೆ.ಆರ್ ವೃತದ ಬಳಿ ಸೇರಿದಂತೆ ನಾಲ್ಕು ಕಡೆ ಇದರ ಅಧಿಕೃತ ಮಾರಾಟ ಮಳಿಗೆಗಳಿವೆ. ಇದರ ಜೊತೆಗೆ ಬೆಂಗಳೂರು ಹಾಗೂ ಹೈದರಬಾದ್ಲ್ಲಿಯೂ ಅಧಿಕೃತ ಶೋರೂಂಗಳಿವೆ.
ಮೈಸೂರು ರೇಷ್ಮೆ ಸೀರೆಗಳು 25 ಸಾವಿರ ರೂಪಾಯಿಯಿಂದ ಆರಂಭವಾಗಿ 2,50,000 ರೂಪಾಯಿ ವರೆಗೆ ಲಭ್ಯವಿದೆ. ಚಿನ್ನದ ಜರಿ ಮತ್ತು ಮೃದು ಸ್ಪರ್ಶಕ್ಕೆ ಈ ಸೀರೆಗಳು ಹೆಸರುವಾಸಿಯಾಗಿದ್ದರಿಂದ ಮಹಿಳೆಯರಿಗೆ ಎಲ್ಲಿಲ್ಲಿದ ಒಲವು. ಭಾಗಶಃ ಜನರು ಆರಂಭಿಕ ಬೆಲೆಯ ಸೀರೆಗಳನ್ನು ಕೊಳ್ಳುವುದು ಹೆಚ್ಚು. ಹಾಗಾಗಿ ಬೇಡಿಕೆ ಬಂದಿದೆ. ದೇಶದ ವಿವಿಧೆಡೆಯಿಂದ ಮೈಸೂರಿಗೆ ಆಗಮಿಸುವ ಪ್ರವಾಸಿಗರು, ಸ್ಥಳೀಯರು ರೇಷ್ಮೆ ಸೀರೆ ಉತ್ಪಾದನೆ ಮಾಡುವ ಘಟಕಕ್ಕೆ ಭೇಟಿ ನೀಡಿ ಸೀರೆ ಖರೀದಿಗಾಗಿ ಸರತಿ ಸಾಲಿನಲ್ಲಿ ನಿಲ್ಲುತ್ತಿದ್ದಾರೆ. ಇದಕ್ಕೆ ಪೂರಕವಾಗಿ ಈ ಭಾರಿ ಜನಸಂದಣಿಯ ವಿಡಿಯೋಗಳು ಕೂಡ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿವೆ. ಆದರೆ, ಅಗತ್ಯಕ್ಕೆ ತಕ್ಕಂತೆ ಬೇಡಿಕೆ ಇರುವಂತಹ ಸೀರೆಗಳ ಉತ್ಪಾದನೆ ಇಲ್ಲಿ ಆಗುತ್ತಿಲ್ಲ ಎಂದು ರೇಷ್ಮೆ ಸೀರೆ ಖರೀದಿಸಲು ಬಂದ ಮಹಿಳೆಯರು ಹೇಳ್ತಾರೆ.
ಟೋಕನ್ ಪದ್ಧತಿ ಜಾರಿ: ಅತಿಯಾದ ಬೇಡಿಕೆಯನ್ನು ನಿರ್ವಹಿಸಲು, ಕೆಲವು ಕಟ್ಟುನಿಟ್ಟಿನ ನಿಯಮಗಳನ್ನು ಜಾರಿಗೆ ತಂದಿದ್ದು, ಟೋಕನ್ ನೀಡಲಾಗುತ್ತಿದೆ. ಮೊದಲು ಬಂದವರಿಗೆ ಹಾಗೂ ಕೇವಲ ಟೋಕನ್ ಪಡೆದವರಿಗೆ ಮಾತ್ರ ಮಳಿಗೆಯೊಳಗೆ ಪ್ರವೇಶ ನೀಡಲಾಗುತ್ತಿದೆ. ಅಲ್ಲದೆ, ಒಬ್ಬ ಗ್ರಾಹಕರಿಗೆ ಕೇವಲ ಒಂದು ಸೀರೆ ಮಾತ್ರ ಖರೀದಿಸಲು ಅವಕಾಶವಿದೆ. ಒಬ್ಬರಿಗೆ ಒಂದು ಸೀರೆಯಂತೆ ದಿನಕ್ಕೆ 50 ಸೀರೆಗಳಿಗೆ ಮಾತ್ರ ಟೋಕನ್ ನೀಡಲಾಗುತ್ತದೆ. ಶುಕ್ರವಾರ ಮತ್ತು ಶನಿವಾರ ಜನ ಹೆಚ್ಚಾಗಿ ಬರುತ್ತಿರುವುದರಿಂದ ಜನಸಂದಣಿ ಕಂಡು ಬರುತ್ತದೆ. ಹಾಗಾಗಿ ಟೋಕನ್ ಪಡೆಯಲೆಂದೇ ಜನರು ಸಿಲ್ಕ್ ಫ್ಯಾಕ್ಟರಿಯ ಗೇಟ್ನಲ್ಲಿ ಬೆಳಗ್ಗೆ 6 ಗಂಟೆಗೆ ಬಂದು ಸರತಿ ಸಾಲಿನಲ್ಲಿ ನಿಲ್ಲುವಂತಹ ದೃಶ್ಯಗಳನ್ನು ಕಾಣಬಹುದು.
ಮೈಸೂರು ರೇಷ್ಮೆ ಸೀರೆಗಳನ್ನು ಪ್ರತಿವರ್ಷ 1 ಲಕ್ಷದ 10 ಸಾವಿರ ಸೀರೆಗಳನ್ನ ಉತ್ಪಾದಿಸಲಾಗುತ್ತದೆ. ಆರಂಭಿಕ ಬೆಲೆಯ ಜರಿ ಸೀರೆಗಳಿಗೆ ಬೇಡಿಕೆ ಹೆಚ್ಚಿದೆ. ಆದರೆ, ಉತ್ಪಾದನೆ ಕಡಿಮೆ ಇದೆ. ನಿತ್ಯ ಮಾನಂದವಾಡಿ ರಸ್ತೆಯಲ್ಲಿರುವ ಉತ್ಪಾದನಾ ಘಟಕದ ಮುಂದೆ ಇರುವ ಶೋರೂಂನಲ್ಲಿ 50 ಸೀರೆಗಳ ಮಾರಾಟವಾಗುತ್ತವೆ. ವಾರಕ್ಕೆ ಒಂದು ಬಾರಿ ಬೆಂಗಳೂರು ಹಾಗೂ ಇತರ ಶೋರೂಂಗಳಿಗೆ ಸೀರೆಗಳನ್ನು ಪೂರೈಸಲಾಗುತ್ತದೆ ಎಂದು ಕೆ.ಎಸ್.ಐ.ಸಿ.ಯ ಪ್ರಧಾನ ವ್ಯವಸ್ಥಾಪಕ ಸಿದ್ದಲಿಂಗ ಪ್ರಸಾದ್ ಮಾಹಿತಿ ನೀಡಿದರು.
ಉತ್ಪಾದನೆ ಹೇಗೆ: ಮೈಸೂರು ರೇಷ್ಮೆ ಸೀರೆಯ ಉತ್ಪಾದನೆ ಹೇಗೆ ಎಂಬುವುದನ್ನು ಇಂದಿಗೂ ಗೌಪ್ಯತೆ ಕಾಪಾಡಿಕೊಂಡು ಬರಲಾಗಿದೆ. ರಾಮನಗರ ಹಾಗೂ ಶಿಡ್ಲಘಟ್ಟದ ರೇಷ್ಮೆ ಮಾರುಕಟ್ಟೆಯಿಂದ ಉತ್ತಮ ಗುಣಮಟ್ಟದ ರೇಷ್ಮೆ ಗೂಡುಗಳನ್ನು ತಂದು ಅದರಿಂದ ದಾರ ತೆಗೆದು ಮೈಸೂರಿನಲ್ಲಿರುವ ತಯಾರಿಕಾ ಘಟಕದಲ್ಲಿ ಸಾಂಪ್ರದಾಯಿಕವಾಗಿ ತಯಾರಿಸಿ, ಚಿನ್ನದ ಲೇಪಿದ ಜರಿ ಹಾಕಿ ಕಲಾತ್ಮಕ ವಿನ್ಯಾಸದಲ್ಲಿ ಸೀರೆಗಳನ್ನು ಉತ್ಪಾದಿಸಲಾಗುತ್ತದೆ. ಅಲ್ಲದೇ ಬೇರೆ ಮಳಿಗೆಯಲ್ಲಿ ಮಾರಾಟ ಮಾಡದೇ ತಾವೇ ತಮ್ಮ ಮಳಿಗೆಗಳ ಮೂಲಕ ಮಾರಾಟ ಮಾಡುತ್ತಾರೆ. ಈ ರೇಷ್ಮೆ ಸೀರೆಯ ಬೆಲೆ ಹೆಚ್ಚಾದರೂ ಯಾವತ್ತಿಗೂ ಈ ರೇಷ್ಮೆ ಸೀರೆ ಕೊಂಡರೆ ಅದರ ಬೆಲೆ ಕಡಿಮೆ ಆಗುವುದಿಲ್ಲ ಎಂಬ ಮಾತು ಇಂದಿಗೂ ಸಹ ಪ್ರಚಲಿತವಾಗಿದೆ
ಸಿಲ್ಕ್ ಸೀರೆ ಕೊಳ್ಳಲು ಮಹಿಳೆಯರು ಮುಗಿಬೀಳಲು ಕಾರಣ ಏನು ಎಂಬುದರ ಬಗ್ಗೆ ಪಾರಂಪರಿಕ ತಜ್ಞರಾದ ಪ್ರೊ. ರಂಗರಾಜು ವಿವರಿಸಿದ್ದಾರೆ. ಮೈಸೂರು ಸಿಲ್ಕ್ ಸೀರೆ ತಯಾರಿಕ ಕಾರ್ಖಾನೆಯನ್ನ ಆರಂಭಿಸಿದ್ದು ಮಹಾರಾಜರು. ಶತಮಾನ ಕಳೆದರು ಅದರ ಬೇಡಿಕೆ ಕಡಿಮೆಯಾಗಿಲ್ಲ. ಇದಕ್ಕೆ ಪ್ರಮುಖ ಕಾರಣ ಅವುಗಳ ಗುಣಮಟ್ಟ. ಉತ್ತಮ ಗುಣಮಟ್ಟದ ರೇಷ್ಮೆಯಿಂದ ವಿಶಿಷ್ಟವಾಗಿ ತಯಾರಾಗುವ ಮೈಸೂರು ರೇಷ್ಮೆ ಸೀರೆ ಇವಾಗಿವೆ. ನೂರು ವರ್ಷ ಕಳೆದರೂ ಹರಿದು ಹೋಗುವುದಿಲ್ಲ, ಬಣ್ಣ ಮಾಸುವುದಿಲ್ಲ. ಅಲ್ಲದೇ ತುಂಬಾ ಹಗುರವಾಗಿರುತ್ತದೆ ಎಂದು ವಿವರಿಸಿದರು.
ಗೆಲುವಿನ ಬೆನ್ನಲ್ಲೇ ಗಿಲ್ಲಿ ನಟ ರಾಜಕೀಯಕ್ಕೆ ಎಂಟ್ರಿ?; ಗಿಲ್ಲಿ ನಟ ಹೇಳಿದ್ದೇನು?
