newsics.com | ನ್ಯೂಸಿಕ್ಸ್
ದಕ್ಷಿಣ ಚೀನಾದ ಪ್ರಮುಖ ಕೈಗಾರಿಕಾ ಪ್ರದೇಶವಾದ ಗುವಾಂಗ್ಡಾಂಗ್ ಪ್ರಾಂತ್ಯಕ್ಕೆ ‘ನೌಲ್’ (Typhoon Noul) ಚಂಡಮಾರುತವು ಅಪ್ಪಳಿಸಿದ್ದು, ಭೀಕರ ಮಳೆ ಹಾಗೂ ಬಿರುಗಾಳಿಗೆ ಈವರೆಗೆ 10 ಮಂದಿ ಪ್ರಾಣ ಕಳೆದುಕೊಂಡಿದ್ದಾರೆ. ಚೀನಾದ ವಿವಿಧ ಪ್ರಾಂತ್ಯಗಳಲ್ಲಿ ಅಪ್ಪಳಿಸಿರುವ ಈ ವಿನಾಶಕಾರಿ ಚಂಡಮಾರುತದಿಂದಾಗಿ ಜನಜೀವನ ಸಂಪೂರ್ಣವಾಗಿ ಅಸ್ತವ್ಯಸ್ತಗೊಂಡಿದೆ.
ಚಂಡಮಾರುತದ ಪ್ರಭಾವದಿಂದಾಗಿ ಹಠಾತ್ ಪ್ರವಾಹವು ಉಂಟಾಗಿದ್ದು, ಪರಿಸ್ಥಿತಿ ಕೈಮೀರುತ್ತಿದೆ. ಇದರ ಭೀಕರ ದೃಶ್ಯಗಳು ಸಾಮಾಜಿಕ ಜಾಲತಾಣಗಳಲ್ಲಿ ಸಖತ್ ವೈರಲ್ ಆಗಿದ್ದು, ಬಿರುಗಾಳಿಗೆ ಮಗುವಿನ ತೊಟ್ಟಿಲು ಹಾರಿಹೋಗುತ್ತಿರುವ ದೃಶ್ಯ ಎಲ್ಲೆಡೆ ಆತಂಕ ಸೃಷ್ಟಿಸಿದೆ. ಕೂಡಲೇ ಎಚ್ಚೆತ್ತ ಆಡಳಿತ ಯಂತ್ರವು ಜನರನ್ನು ತುರ್ತಾಗಿ ಸುರಕ್ಷಿತ ಸ್ಥಳಗಳಿಗೆ ಸ್ಥಳಾಂತರಿಸುವ ಕಾರ್ಯದಲ್ಲಿ ನಿರತವಾಗಿದೆ. ಗುವಾಂಗ್ಡಾಂಗ್ ಒಂದರಲ್ಲೇ ಇದುವರೆಗೆ 8 ಲಕ್ಷಕ್ಕೂ ಹೆಚ್ಚು ಜನರನ್ನು ಸುರಕ್ಷಿತ ಪ್ರದೇಶಗಳಿಗೆ ರವಾನಿಸಲಾಗಿದೆ.
ಈ ನೈಸರ್ಗಿಕ ವಿಕೋಪದ ಪರಿಣಾಮವಾಗಿ ಹಾಂಗ್ ಕಾಂಗ್ ಹಾಗೂ ಸುತ್ತಮುತ್ತಲಿನ ಪ್ರದೇಶಗಳಲ್ಲಿ ಸಾರಿಗೆ ಸೇವೆಗಳಿಗೆ ಭಾರೀ ಪೆಟ್ಟು ಬಿದ್ದಿದೆ. ನೂರಾರು ವಿಮಾನಗಳು ಹಾಗೂ ರೈಲು ಸಂಚಾರವನ್ನು ಸಂಪೂರ್ಣವಾಗಿ ರದ್ದುಗೊಳಿಸಲಾಗಿದೆ. ಚಂಡಮಾರುತದಿಂದ ಉಂಟಾದ ಭಾರೀ ಭೂಕುಸಿತ ಹಾಗೂ ಗಾಳಿಯ ವೇಗದಿಂದಾಗಿ ಗುವಾಂಗ್ಡಾಂಗ್ನಾದ್ಯಂತ ಹೈ-ಸ್ಪೀಡ್ ರೈಲುಗಳು ಹಾಗೂ ವಿಮಾನಗಳ ಹಾರಾಟವನ್ನು ಅನಿರ್ದಿಷ್ಟಾವಧಿಗೆ ಸ್ಥಗಿತಗೊಳಿಸಲಾಗಿದೆ.
ಒಳನಾಡಿನತ್ತ ಚಲಿಸುತ್ತಿರುವ ಈ ಚಂಡಮಾರುತವು ತುಸು ದುರ್ಬಲಗೊಂಡಿದ್ದರೂ ಸಹ, ಮಂಗಳವಾರದವರೆಗೆ ದಕ್ಷಿಣ ಚೀನಾದಾದ್ಯಂತ ಭಾರೀ ಮಳೆ ಮುಂದುವರಿಯುವ ಸಾಧ್ಯತೆಯಿದೆ ಎಂದು ಹವಾಮಾನ ಇಲಾಖೆ ಎಚ್ಚರಿಸಿದೆ. ಪರಿಸ್ಥಿತಿಯ ಗಂಭೀರತೆಯನ್ನು ಅರಿತಿರುವ ಸರ್ಕಾರವು ಪರಿಹಾರ ಕಾರ್ಯಾಚರಣೆಗೆ ವಿಶೇಷ ತಂಡಗಳನ್ನು ನಿಯೋಜಿಸಿದೆ. ಹಾನಿಯ ಸಮೀಕ್ಷೆ ಹಾಗೂ ವಿಪತ್ತಿನ ನಂತರದ ತುರ್ತು ಪುನರ್ನಿರ್ಮಾಣ ಕಾರ್ಯಗಳಿಗಾಗಿ ರಾಷ್ಟ್ರೀಯ ಅಭಿವೃದ್ಧಿ ಮತ್ತು ಸುಧಾರಣಾ ಆಯೋಗವು ಬರೋಬ್ಬರಿ 100 ಮಿಲಿಯನ್ ಯುವಾನ್ (ಅಂದರೆ ಸುಮಾರು 14.7 ಮಿಲಿಯನ್ ಡಾಲರ್) ಮೊತ್ತದ ವಿಶೇಷ ನಿಧಿಯನ್ನು ಬಿಡುಗಡೆ ಮಾಡಿದೆ.
Fire Mishap ಭೀಕರ ಅಗ್ನಿ ಅವಘಡ; ಪಾರ್ಕಿಂಗ್ನಲ್ಲಿದ್ದ ನಾಲ್ಕು ಖಾಸಗಿ ಬಸ್ಗಳು ಸಂಪೂರ್ಣ ಭಸ್ಮ
