newsics.com | ನ್ಯೂಸಿಕ್ಸ್
ಮದುವೆ, ಹಬ್ಬ-ಹರಿದಿನಗಳು ಅಥವಾ ವಿಶೇಷ ಸಮಾರಂಭಗಳಲ್ಲಿ ಧರಿಸುವ ಚಿನ್ನದ ಆಭರಣಗಳು ಪ್ರತಿಯೊಬ್ಬರಿಗೂ ಅಮೂಲ್ಯವಾದ ಸಂಪತ್ತು. ಆದರೆ ನಿರಂತರ ಬಳಕೆ, ಧೂಳು, ಬೆವರು ಮತ್ತು ಮೇಕಪ್ ಉತ್ಪನ್ನಗಳ ಸಂಪರ್ಕದಿಂದಾಗಿ ಕಾಲಕ್ರಮೇಣ ಆಭರಣಗಳು ತಮ್ಮ ನೈಸರ್ಗಿಕ ಕಾಂತಿಯನ್ನು ಕಳೆದುಕೊಳ್ಳುತ್ತವೆ. ಚಿನ್ನದ ಆಭರಣಗಳಿಗೆ ಮತ್ತೆ ಹೊಸತನದ ಹೊಳಪು ನೀಡಲು ಪ್ರತಿ ಬಾರಿಯೂ ಜ್ಯುವೆಲ್ಲರಿ ಶೋರೂಂಗಳಿಗೆ ಅಲೆಯಬೇಕಿಲ್ಲ, ನಮ್ಮ ಮನೆಯಲ್ಲೇ ಲಭ್ಯವಿರುವ ಕೆಲವು ಸರಳ ವಸ್ತುಗಳಿಂದಲೇ ಸುರಕ್ಷಿತವಾಗಿ ಸ್ವಚ್ಛಗೊಳಿಸಬಹುದು.
ಆಭರಣಗಳನ್ನು ಸ್ವಚ್ಛಗೊಳಿಸಲು ಅತ್ಯಂತ ಸುರಕ್ಷಿತ ವಿಧಾನವೆಂದರೆ ಉಗುರುಬೆಚ್ಚಗಿನ ನೀರಿಗೆ ಕೆಲವು ಹನಿ ಮೃದುವಾದ ಲಿಕ್ವಿಡ್ ಸೋಪ್ ಸೇರಿಸಿ 15 ರಿಂದ 20 ನಿಮಿಷ ನೆನೆಸಿಡುವುದು. ನಂತರ ಮೃದುವಾದ ಟೂತ್ಬ್ರಶ್ನಿಂದ ಸಾಫ್ಟ್ ಆಗಿ ಉಜ್ಜಿ, ಶುದ್ಧ ನೀರಿನಲ್ಲಿ ತೊಳೆದು ಒಣ ಬಟ್ಟೆಯಿಂದ ಒರೆಸಿದರೆ ಕೊಳೆ ಸುಲಭವಾಗಿ ಮಾಯವಾಗುತ್ತದೆ.
ಆಭರಣದ ಮೇಲೆ ಗಟ್ಟಿಯಾದ ಕಲೆಗಳಿದ್ದರೆ ಒಂದು ಚಮಚ ಬೇಕಿಂಗ್ ಸೋಡಾಕ್ಕೆ ನೀರು ಬೆರೆಸಿ ಪೇಸ್ಟ್ ಮಾಡಿ ಹಚ್ಚಿ, ಎರಡು-ಮೂರು ನಿಮಿಷಗಳ ನಂತರ ತೊಳೆಯಬಹುದು. ಆದರೆ ಈ ಬೇಕಿಂಗ್ ಸೋಡಾ ವಿಧಾನವನ್ನು ಮುತ್ತು, ಪಚ್ಚೆ ಅಥವಾ ರತ್ನಗಳಿರುವ ಆಭರಣಗಳಿಗೆ ಬಳಸಬಾರದು. ಕೆಲವೊಮ್ಮೆ ನಾನ್-ಜೆಲ್ ಟೂತ್ಪೇಸ್ಟ್ ಹಚ್ಚಿ ನಯವಾಗಿ ಉಜ್ಜುವುದರಿಂದಲೂ ಸಣ್ಣಪುಟ್ಟ ಕಲೆಗಳು ನಿವಾರಣೆಯಾಗುತ್ತವೆ. ತೀರಾ ಹಳೆಯ ಕಲೆಗಳಿದ್ದಾಗ ಒಂದು ಭಾಗ ಅಮೋನಿಯಾಕ್ಕೆ ಆರು ಭಾಗ ನೀರು ಸೇರಿಸಿ, ಗರಿಷ್ಠ ಒಂದು ನಿಮಿಷ ಮಾತ್ರ ಮುಳುಗಿಸಿ ತಕ್ಷಣ ತೊಳೆಯಬಹುದು, ಆದರೆ ಈ ವಿಧಾನವನ್ನು ಪದೇ ಪದೇ ಬಳಸಿದರೆ ಆಭರಣದ ಫಿನಿಷಿಂಗ್ ಹಾಳಾಗುವ ಸಾಧ್ಯತೆ ಇರುತ್ತದೆ.
ಚಿನ್ನದ ಆಭರಣಗಳನ್ನು ಸ್ವಚ್ಛಗೊಳಿಸುವಾಗ ಗಟ್ಟಿ ಬ್ರಶ್, ಬ್ಲೀಚ್, ಆಮ್ಲ ಅಥವಾ ಪ್ರಬಲ ರಾಸಾಯನಿಕ ಕ್ಲೀನರ್ಗಳನ್ನು ಎಂದಿಗೂ ಬಳಸಬಾರದು. ವಜ್ರ ಹಾಗೂ ರತ್ನ ಖಚಿತ ಆಭರಣಗಳಿಗೆ ಮನೆಮದ್ದು ಪ್ರಯೋಗಿಸುವ ಮುನ್ನ ಜ್ಯುವೆಲ್ಲರ್ ಸಲಹೆ ಪಡೆಯುವುದು ಸೂಕ್ತ. ಸ್ವಚ್ಛಗೊಳಿಸಿದ ನಂತರ ಆಭರಣಗಳು ಪೂರ್ತಿಯಾಗಿ ಒಣಗಿದ ಮೇಲಷ್ಟೇ ಪೌಚ್ ಅಥವಾ ಬಾಕ್ಸ್ನಲ್ಲಿ ಶೇಖರಿಸಿಡಬೇಕು. ಆಭರಣಗಳ ಕಾಂತಿ ಹೆಚ್ಚು ದಿನ ಉಳಿಯಲು ಪರ್ಫ್ಯೂಮ್, ಮೇಕಪ್ ಅಥವಾ ಹೇರ್ ಸ್ಪ್ರೇ ಬಳಸಿದ ನಂತರವೇ ಅವುಗಳನ್ನು ಧರಿಸಬೇಕು. ಸ್ನಾನ ಮಾಡುವಾಗ ಹಾಗೂ ಈಜುಕೊಳಕ್ಕೆ ಇಳಿಯುವ ಮುನ್ನ ಆಭರಣಗಳನ್ನು ತೆಗೆದಿಡುವುದು ಒಳ್ಳೆಯದು.
ಗೀರು ಬೀಳುವುದನ್ನು ತಪ್ಪಿಸಲು ಪ್ರತಿಯೊಂದು ಆಭರಣವನ್ನು ಪ್ರತ್ಯೇಕ ಮೃದು ಬಟ್ಟೆ ಅಥವಾ ಪೌಚ್ನಲ್ಲಿಟ್ಟು, ಆಗಾಗ ಮೈಕ್ರೋಫೈಬರ್ ಬಟ್ಟೆಯಿಂದ ಒರೆಸಿ ಇಟ್ಟರೆ ಚಿನ್ನದ ಆಭರಣಗಳು ನಿರಂತರವಾಗಿ ಹೊಸದರಂತೆ ಹೊಳೆಯುತ್ತವೆ.
Home Decor ನಿಮ್ಮ ಮನೆಯಲ್ಲೂ ಮಳೆಗಾಲದ ಇರುವೆ-ನೊಣಗಳ ಕಾಟವೇ? ಇಲ್ಲಿದೆ ಸಿಂಪಲ್ ‘ಕಿಚನ್ ಕ್ಲೀನಿಂಗ್’ ಹ್ಯಾಕ್ಸ್
