newsics.com/ನ್ಯೂಸಿಕ್ಸ್
ಡಿ.ಕೆ.ಶಿವಕುಮಾರ್ ಅವರು 18ನೇ ವಯಸ್ಸಿನಿಂದಲೇ ರಾಜಕಾರಣದಲ್ಲಿ ತೊಡಗಿಸಿಕೊಂಡಿದ್ದಾರೆ. ಅವರ ಚುನಾವಣಾ ರಾಜಕಾರಣದ ಪ್ರಯಾಣ ಆರಂಭವಾಗಿದ್ದು 1985ರಿಂದ. ಡಿ.ಕೆ.ಶಿವಕುಮಾರ್ ಬಹುಕೋಟಿ ಒಡೆಯ. ಅವರು ಇಷ್ಟು ದಿನಗಳ ಕಾಲ ದೇಶದ ನಂಬರ್ 1 ಶ್ರೀಮಂತ ಶಾಸಕ ಎನ್ನಿಸಿಕೊಂಡಿದ್ದರು. ಇನ್ನುಮುಂದೆ ದೇಶದಲ್ಲಿಯೇ ನಂಬರ್ 1 ಶ್ರೀಮಂತ ಮುಖ್ಯಮಂತ್ರಿ ಎಂಬ ಹೆಗ್ಗಳಿಕೆಗೆ ಪಾತ್ರರಾಗಲಿದ್ದಾರೆ.
ಡಿ.ಕೆ.ಶಿವಕುಮಾರ್ ಬಳಿ ಅಪಾರ ಹಣವಿದೆ ಎಂಬುದು ಜಗಜ್ಜಾಹೀರು. ಅವರು ರಾಜಕಾರಣಕ್ಕೆ ಬರುವ ಪೂರ್ವದಲ್ಲೂ ಅಂಥ ಬಡವರೇನೂ ಆಗಿರಲಿಲ್ಲ. ಆಮೇಲಂತೂ ರಾಜಕಾರಣ, ಅದರ ಜೊತೆಗೆ ವಿವಿಧ ಉದ್ಯಮ, ವ್ಯವಹಾರಗಳು, ಶಿಕ್ಷಣ ಸಂಸ್ಥೆಗಳು, ರಿಯಲ್ ಎಸ್ಟೇಟ್ ಬಿಸಿನೆಸ್ ಎಲ್ಲ ಸೇರಿ ಬಹುಕೋಟಿ ಒಡೆಯರಾಗಿದ್ದಾರೆ. 2023ರ ವಿಧಾನಸಭೆ ಚುನಾವಣೆಯಲ್ಲಿ ತಮ್ಮ ಆಸ್ತಿಯನ್ನ ಡಿ.ಕೆ.ಶಿವಕುಮಾರ್ ಘೋಷಣೆ ಮಾಡಿದಾಗ ಅದೆಷ್ಟೋ ಮಂದಿ ಹುಬ್ಬೇರಿಸಿದ್ದರು. ಅಂದಹಾಗೇ, ಅವತ್ತು ಡಿ.ಕೆ.ಶಿವಕುಮಾರ್ ಘೋಷಣೆ ಮಾಡಿರುವ ಪ್ರಕಾರ ಅವರ ಬಳಿ ಇರುವ ಆಸ್ತಿ ಮೌಲ್ಯ 1,413.78 ಕೋಟಿ ರೂಪಾಯಿ. ಇದರಲ್ಲಿ ಚರಾಸ್ತಿ ಮೌಲ್ಯ ರೂ.273.42 ಕೋಟಿ ಮತ್ತು ಸ್ಥಿರಾಸ್ತಿ ಮೌಲ್ಯ ರೂ.1,140.36 ಕೋಟಿ. ಇನ್ನು 263 ಕೋಟಿ ರೂಪಾಯಿ ಸಾಲ ಕೂಡ ಇದೆ ಎಂದೂ ಅವರು ಹೇಳಿಕೊಂಡಿದ್ದಾರೆ.
ಚುನಾವಣೆಯಲ್ಲಿ ಸ್ಪರ್ಧಿಸುವ ಪ್ರತಿ ರಾಜಕಾರಣಿಯೂ, ಚುನಾವಣೆ ಸಂದರ್ಭದಲ್ಲಿ ತಮ್ಮ ಆಸ್ತಿ ಘೋಷಣೆ ಮಾಡಬೇಕು. ಹೀಗೆ ಸಲ್ಲಿಸಿದ ಅಫಿಡವಿಟ್ ಲೆಕ್ಕಾಚಾರದಲ್ಲಿ ಡಿ.ಕೆ.ಶಿವಕುಮಾರ್ ಅವರು ದೇಶದ ಶ್ರೀಮಂತ ಮುಖ್ಯಮಂತ್ರಿಗಳ ಪಟ್ಟಿಯಲ್ಲಿ ನಂ.1 ಸ್ಥಾನದಲ್ಲಿದ್ದರೆ, 2ನೇ ಸ್ಥಾನದಲ್ಲಿ ಆಂಧ್ರಪ್ರದೇಶ ಮುಖ್ಯಮಂತ್ರಿ ಚಂದ್ರಬಾಬು ನಾಯ್ಡು ಇದ್ದಾರೆ. ಹಾಗೇ, ಮೂರನೇ ಸ್ಥಾನದಲ್ಲಿ ತಮಿಳುನಾಡು ಸಿಎಂ ಜೋಸೆಫ್ ವಿಜಯ್ ಇದ್ದಾರೆ. ಚಂದ್ರಬಾಬು ನಾಯ್ಡು ಆಸ್ತಿ ಮೌಲ್ಯ 931 ಕೋಟಿ ರೂಪಾಯಿ. ತಮಿಳುನಾಡು ಸಿಎಂ ಆಸ್ತಿ ಮೌಲ್ಯ 648 ಕೋಟಿ ರೂಪಾಯಿ. ದೇಶದ ಅತ್ಯಂತ ಶ್ರೀಮಂತ ಸಿಎಂಗಳ ಪಟ್ಟಿಯಲ್ಲಿ ಮೊದಲ ಮೂರು ಸ್ಥಾನದಲ್ಲಿ ಇರುವವರು ದಕ್ಷಿಣ ಭಾರತದ ಮುಖ್ಯಮಂತ್ರಿಗಳೇ ಆಗಿದ್ದಾರೆ.
ಡಿ.ಕೆ.ಶಿವಕುಮಾರ್ ಅವರು ಗಳಿಸಿದ ಆಸ್ತಿ, ಹಣದ ಬಗ್ಗೆ ಸಾಕಷ್ಟು ಮಾತುಗಳು ಇವೆ. ಅವರ ಆಸ್ತಿ ಸಂಪಾದನೆ ಬಗ್ಗೆ ಟೀಕಿಸುವವರೂ ಇದ್ದಾರೆ. ಇನ್ನು 2017ರಲ್ಲಿ ಅವರಿಗೆ ಸೇರಿದ ಸ್ಥಳಗಳ ಮೇಲೆ ಆದಾಯ ತೆರಿಗೆ ಇಲಾಖೆ ದಾಳಿ ಮಾಡಿತ್ತು. ಅದಾದ್ಮೇಲೆ 2018ರಿಂದ ಜಾರಿ ನಿರ್ದೇಶನಾಲಯ ಅವರ ಬೆನ್ನು ಹತ್ತಿತ್ತು. 2019ರಲ್ಲಿ 50 ದಿನಗಳ ಕಾಲ ಅವರು ತಿಹಾರ್ ಜೈಲಿನಲ್ಲಿಯೂ ಇದ್ದು ಬಂದರು. ಇವೆಲ್ಲವೂ ಅವರ ಆಸ್ತಿ ಸಂಬಂಧಿತ ವಿಚಾರಗಳೇ ಆಗಿವೆ. ಹಾಗಿದ್ದಾಗ್ಯೂ ಡಿ.ಕೆ.ಶಿವಕುಮಾರ್ ಇದ್ಯಾವುದಕ್ಕೂ ತಲೆಕೆಡಿಸಿಕೊಂಡಿಲ್ಲ. ಆಸ್ತಿಗಳೆಲ್ಲವೂ ನನ್ನ ಮತ್ತು ನನ್ನ ಕುಟುಂಬದವರ ಹೆಸರಿನಲ್ಲಿದೆ. ದಾಖಲೆಗಳೆಲ್ಲವೂ ಪಾರದರ್ಶಕವಾಗಿದೆ. ಎಲ್ಲವನ್ನೂ ಸ್ಪಷ್ಟವಾಗಿ ಘೋಷಿಸಲಾಗಿದೆ. ನಮ್ಮ ರಾಜ್ಯ ಮತ್ತು ಇಡೀ ದೇಶಾದ್ಯಂತ ಕಂಪನಿಗಳನ್ನ ಹೊಂದಿದವರು, ಆಸ್ತಿಯನ್ನ ಮಾಡಿದವರು ಇದ್ದಾರೆ. ನನ್ನ ಆಸ್ತಿ ಮತ್ತು ಹೊಣೆಗಾರಿಕೆ ಪಾರದರ್ಶಕವಾಗಿದೆ ಎಂದು ಹೇಳಿಕೊಂಡಿದ್ದರು.
ಡಿ.ಕೆ.ಶಿವಕುಮಾರ್ ಅವರ ಆಸ್ತಿ ಮೌಲ್ಯ ವರ್ಷದಿಂದ ವರ್ಷಕ್ಕೆ ಹೆಚ್ಚುತ್ತಿದೆ. 2008ರಲ್ಲಿ ಅವರ ಆಸ್ತಿ ಮೌಲ್ಯ ಕೇವಲ 75.5 ಕೋಟಿ ರೂ.ಇತ್ತು. 2013ರಲ್ಲಿ 251 ಕೋಟಿ ರೂ.ಗಳಿಗೆ ತಲುಪಿತು. 2018ರಲ್ಲಿ 840 ಕೋಟಿ ರೂಪಾಯಿ ಆಯಿತು. 2023ರಲ್ಲಿ 1,413 ಕೋಟಿ ರೂಪಾಯಿ ಆಯಿತು. ವರ್ಷಗಳ ಅವಧಿಯಲ್ಲಿ ಅವರ ಆಸ್ತಿ ಮೌಲ್ಯ ಹೆಚ್ಚಾಗಿದ್ದು, ವಿಪಕ್ಷಗಳ ಕೆಂಗಣ್ಣಿಗೆ ಕಾರಣವಾಯಿತು. ಡಿ.ಕೆ.ಶಿವಕುಮಾರ್ ಅವರಿಗೆ ಅವರ ತಂದೆ ಮತ್ತು ಅಜ್ಜಿಯಿಂದ ಕೃಷಿ ಭೂಮಿ ಬಂದಿವೆ. ಇನ್ನು ಅನೇಕ ಹೂಡಿಕೆಗಳು ಅವರ ಆಸ್ತಿ ಮೌಲ್ಯ ಹೆಚ್ಚಿಸಿವೆ. ಬೆಂಗಳೂರು, ಮೈಸೂರು, ಕನಕಪುರ ಮತ್ತು ದೆಹಲಿಯಾದ್ಯಂತ ವಸತಿ ಆಸ್ತಿಗಳನ್ನು ಘೋಷಿಸಿದ್ದಾರೆ. ಇದರಲ್ಲಿ ಬೆಂಗಳೂರಿನ ಗೋಪಾಲಪುರದ ಮಾಲ್ ಸೈಟ್ ಸೇರಿದೆ. ಕಳೆದ ಎರಡು ದಶಕಗಳಲ್ಲಿ ಕರ್ನಾಟಕದಲ್ಲಿ ಭೂಮಿಯ ಬೆಲೆಗಳು ಏರುಗತಿಯಲ್ಲಿ ಸಾಗುತ್ತಿದ್ದು, ಅವರ ಜಮೀನು ಆಸ್ತಿಗಳ ಮೌಲ್ಯವೂ ಗಗನಕ್ಕೇರಿದೆ.
ಡಿ.ಕೆ.ಶಿವಕುಮಾರ್ ಬಹುತೇಕ ಆಸ್ತಿ ಮೌಲ್ಯ ಹೆಚ್ಚಿಸಿಕೊಂಡಿದ್ದು ರಿಯಲ್ ಎಸ್ಟೇಟ್ ಉದ್ಯಮ ಮತ್ತು ಶಿಕ್ಷಣ ಸಂಸ್ಥೆಗಳಿಂದ. ಐಕಾನ್ ಪ್ರಾಜೆಕ್ಟ್ಸ್, ಗ್ಲೋಬಲ್ ಅಕಾಡೆಮಿ ಆಫ್ ಟೆಕ್ನಾಲಜಿ, ಜೈಹಿಂದ್ ಕಮ್ಯುನಿಕೇಷನ್ಸ್, ಮೈಸೂರು ಫೀಡ್ಸ್, ಕೌಸ್ತುಭ ಪ್ರಾಜೆಕ್ಟ್ಸ್, ವೀಕ್ರಾಸ್ ಡೆವಲಪರ್ಸ್, ಆದರ್ಶ್ ಇನ್, ಡಿವಿನಿಟಿ ಸ್ಪೇಸಸ್ ಅವರ ಹೆಸರಲ್ಲಿರುವ ಸಂಸ್ಥೆಗಳು.
