newsics.com | ನ್ಯೂಸಿಕ್ಸ್
ಇತ್ತೀಚಿನ ದಿನಗಳಲ್ಲಿ ಊಟದ ಜೊತೆಗೋ ಅಥವಾ ಬೇಸರವಾದಾಗಲೋ ಬಾಯಿಗೆ ಸಿಹಿ ಹಾಕಿಕೊಳ್ಳುವುದು ಒಂದು ಟ್ರೆಂಡ್ ಆಗಿಬಿಟ್ಟಿದೆ. ಆದರೆ, ಸ್ವೀಟ್ಸ್ ಪ್ರಿಯರೇ ನೆನಪಿರಲಿ, ಸಿಹಿ ಪದಾರ್ಥಗಳನ್ನು ಎಷ್ಟು ತಿನ್ನುತ್ತೇವೆ ಎನ್ನುವುದಕ್ಕಿಂತ “ಯಾವ ಸಮಯದಲ್ಲಿ ತಿನ್ನುತ್ತೇವೆ” ಎಂಬುದು ನಮ್ಮ ಆರೋಗ್ಯವನ್ನು ನಿರ್ಧರಿಸುತ್ತದೆ ಎನ್ನುತ್ತಾರೆ ತಜ್ಞರು. ತಪ್ಪು ಟೈಮ್ನಲ್ಲಿ ಸಿಹಿ ತಿನ್ನುವ ಚಿಕ್ಕ ಹವ್ಯಾಸವು ನಮ್ಮ ದೇಹದ ಸಕ್ಕರೆ ಮಟ್ಟವನ್ನು ಹೆಚ್ಚಿಸುತ್ತದೆ. ಹಾಗಾದರೆ ಸಿಹಿ ತಿನ್ನಲು ಸರಿಯಾದ ಸಮಯ ಯಾವುದು? ಇಲ್ಲಿದೆ ಉಪಯುಕ್ತ ಮಾಹಿತಿ.
ಬೆಳಗ್ಗೆನೇ ಸ್ವೀಟ್ ತಿನ್ನುವ ಅಭ್ಯಾಸ ನಿಮಗಿದೆಯೇ?
ಹಲವರಿಗೆ ಬೆಳಗ್ಗೆ ಎದ್ದ ತಕ್ಷಣ ಅಥವಾ ಹೊಟ್ಟೆ ಖಾಲಿ ಇರುವಾಗ ಟೀ ಜೊತೆ ಬಿಸ್ಕೆಟ್, ಕೇಕ್ ಅಥವಾ ಯಾವುದಾದರೂ ಸ್ವೀಟ್ ತಿನ್ನುವ ಅಭ್ಯಾಸವಿರುತ್ತದೆ. ಆದರೆ ಖಾಲಿ ಹೊಟ್ಟೆಯಲ್ಲಿ ಸಕ್ಕರೆ ಅಂಶ ನೇರವಾಗಿ ಹೊಟ್ಟೆ ಸೇರಿದಾಗ, ಅದು ರಕ್ತದಲ್ಲಿನ ಗ್ಲೂಕೋಸ್ ಮಟ್ಟವನ್ನು ರಾಕೆಟ್ ವೇಗದಲ್ಲಿ ಏರಿಸುತ್ತದೆ. ಈ ಸಡನ್ ಬದಲಾವಣೆಯನ್ನು ಬ್ಯಾಲೆನ್ಸ್ ಮಾಡಲು ದೇಹವು ಅತಿಯಾದ ಇನ್ಸುಲಿನ್ ಉತ್ಪಾದಿಸಬೇಕಾಗುತ್ತದೆ. ಇದರ ಪರಿಣಾಮವಾಗಿ ಸ್ವಲ್ಪ ಹೊತ್ತಿನಲ್ಲೇ ಬ್ಲಡ್ ಶುಗರ್ ಲೆವೆಲ್ ದಿಢೀರನೆ ಕುಸಿದು, ದೇಹದಲ್ಲಿ ಸುಸ್ತು, ಆಲಸ್ಯ ಮೂಡುತ್ತದೆ. ಅಷ್ಟೇ ಅಲ್ಲ, ಮತ್ತೆ ಮತ್ತೆ ಸಿಹಿ ತಿನ್ನಬೇಕೆಂಬ ಕ್ರೇವಿಂಗ್ ಹೆಚ್ಚಾಗುತ್ತದೆ.
ಮಲಗುವ ಮುನ್ನ ಸಿಹಿ ತಿಂದರೆ ದೇಹ ಏನಾಗುತ್ತೆ?
ರಾತ್ರಿ ಡಿನ್ನರ್ ಮುಗಿಸಿ ನಿದ್ದೆಗೆ ಜಾರುವ ಮುನ್ನ ಐಸ್ಕ್ರೀಮ್, ಚಾಕೊಲೇಟ್ ತಿನ್ನುವುದು ತೂಕ ಹೆಚ್ಚಾಗಲು ನೇರ ಆಹ್ವಾನ ನೀಡಿದಂತೆ. ಏಕೆಂದರೆ ಮಲಗುವ ಸಮಯದಲ್ಲಿ ದೇಹಕ್ಕೆ ಯಾವುದೇ ದೈಹಿಕ ಶ್ರಮ ಇರುವುದಿಲ್ಲ. ಹೀಗಾಗಿ ಈ ಸಮಯದಲ್ಲಿ ಸಿಗುವ ಹೆಚ್ಚುವರಿ ಕ್ಯಾಲೊರಿಗಳನ್ನು ಕರಗಿಸಲು ದೇಹಕ್ಕೆ ಸಾಧ್ಯವಾಗದೆ, ಅವು ನೇರವಾಗಿ ಕೊಬ್ಬಿನ ರೂಪದಲ್ಲಿ ದೇಹದಲ್ಲಿ ಶೇಖರಣೆಯಾಗುತ್ತವೆ. ಇದು ಬೊಜ್ಜು, ಹಾರ್ಮೋನ್ ಇಂಬ್ಯಾಲೆನ್ಸ್ ಹಾಗೂ ಮೆಟಾಬಾಲಿಕ್ ಸಮಸ್ಯೆಗಳಿಗೆ ಕಾರಣವಾಗುತ್ತದೆ.
ಸಿಹಿ ಸವಿಯಲು ಅತ್ಯುತ್ತಮ ಸಮಯ ಯಾವುದು?
ಆರೋಗ್ಯ ತಜ್ಞರ ಪ್ರಕಾರ, ಮಧ್ಯಾಹ್ನ ಅಥವಾ ರಾತ್ರಿ ಊಟದ ನಂತರ ಅಲ್ಪ ಪ್ರಮಾಣದಲ್ಲಿ ಸಿಹಿ ಸವಿಯುವುದು ಅತ್ಯಂತ ಸುರಕ್ಷಿತ ಹವ್ಯಾಸ. ಏಕೆಂದರೆ ನಾವು ಸೇವಿಸುವ ಮುಖ್ಯ ಆಹಾರದಲ್ಲಿ ನಾರಿನಂಶ (ಫೈಬರ್), ಪ್ರೋಟೀನ್ ಮತ್ತು ಉತ್ತಮ ಕೊಬ್ಬುಗಳು ಇರುತ್ತವೆ. ಇವು ನಾವು ತಿನ್ನುವ ಸ್ವೀಟ್ನಲ್ಲಿನ ಸಕ್ಕರೆಯು ರಕ್ತಕ್ಕೆ ತಕ್ಷಣವೇ ಬೆರೆಯದಂತೆ ಲಾಕ್ ಮಾಡುತ್ತವೆ. ಇದರಿಂದ ಬ್ಲಡ್ ಶುಗರ್ ಮಟ್ಟವು ಸ್ಥಿರವಾಗಿ ಕಾಯ್ದುಕೊಳ್ಳಲು ಸಹಾಯವಾಗುತ್ತದೆ.
ಫಿಟ್ ಆಗಿರಲು ಈ ಸರಳ ಸೂತ್ರಗಳನ್ನು ಪಾಲಿಸಿ
- ಹಸಿವಾದಾಗ ಊಟದ ಬದಲಿಗೆ ಪೇಸ್ಟ್ರಿ, ಡೋನಟ್ಸ್ ಅಥವಾ ಕಾರ್ಬೊನೇಟೆಡ್ ತಂಪು ಪಾನೀಯಗಳನ್ನು ಕುಡಿಯುವುದನ್ನು ಬಿಟ್ಟುಬಿಡಿ.
- ಬೆಳಗಿನ ಬ್ರೇಕ್ಫಾಸ್ಟ್ಗೆ ಮುನ್ನ ಯಾವುದೇ ಕಾರಣಕ್ಕೂ ಸಿಹಿ ಪದಾರ್ಥಗಳನ್ನು ಮುಟ್ಟಬೇಡಿ.
- ನಿಮ್ಮ ದಿನನಿತ್ಯದ ಲೈಫ್ಸ್ಟೈಲ್ನಲ್ಲಿ ಬೇಳೆಕಾಳುಗಳು, ಹಸಿರು ತರಕಾರಿಗಳು ಮತ್ತು ತಾಜಾ ಹಣ್ಣುಗಳಿಗೆ ಮೊದಲ ಆದ್ಯತೆ ನೀಡಿ.
ಈ ಲೇಖನವು ಕೇವಲ ಸಾಮಾನ್ಯ ಆರೋಗ್ಯ ಜಾಗೃತಿ ಮೂಡಿಸುವ ಉದ್ದೇಶವನ್ನು ಹೊಂದಿದೆ. ಯಾವುದೇ ರೀತಿಯ ಆರೋಗ್ಯದ ಏರುಪೇರುಗಳಿದ್ದಲ್ಲಿ ವೈದ್ಯರ ಅಧಿಕೃತ ಸಲಹೆಯನ್ನು ಪಡೆಯುವುದು ಕಡ್ಡಾಯ.
HOROSCOPE ಜುಲೈನಲ್ಲಿ ಈ ರಾಶಿಯವರಿಗೆ ಭಾರೀ ಆರ್ಥಿಕ ಒತ್ತಡ, ವಿಪರೀತ ಕೋಪ: ಈ ಸಮಸ್ಯೆಗಳಿಂದ ಪಾರಾಗಲು ಹೀಗೆ ಮಾಡಿ
