newsics.com| ನ್ಯೂಸಿಕ್ಸ್
ಇತ್ತೀಚೆಗೆ 35 ವರ್ಷದ ಹಾಲಿವುಡ್ ನಟಿ ಡೇವಿಗ್ ಎಲಿಜಬೆತ್ ಚೇಸ್ ಅವರ ನಿಧನದ ಸುದ್ದಿ ಮನರಂಜನಾ ಲೋಕವನ್ನು ಬೆಚ್ಚಿಬೀಳಿಸಿದೆ. ಬಾಲನಟಿಯಾಗಿ ಆರಂಭವಾದ ಅವರ ಸಿನಿ ಪಯಣ ಯಶಸ್ಸಿನಿಂದ ಕೂಡಿದ್ದರೂ, ಜೀವನದ ಕೊನೆಯ ದಿನಗಳಲ್ಲಿ ಅವರು ಎದುರಿಸಿದ ಆರೋಗ್ಯ ಸಮಸ್ಯೆಗಳು ಮತ್ತು ವೈಯಕ್ತಿಕ ಸಂಕಷ್ಟಗಳು ಈಗ ವ್ಯಾಪಕ ಚರ್ಚೆಗೆ ಕಾರಣವಾಗಿವೆ.
ನಟಿ ಡೇವಿಗ್ ಎಲಿಜಬೆತ್ ಚೇಸ್ ಬಾಲ್ಯದಲ್ಲೇ ಮನರಂಜನಾ ಕ್ಷೇತ್ರಕ್ಕೆ ಕಾಲಿಟ್ಟಿದ್ದರು. ಕೇವಲ ನಾಲ್ಕನೇ ವಯಸ್ಸಿನಲ್ಲೇ ಅಭಿನಯ ಆರಂಭಿಸಿದ ನಟಿ ತಮ್ಮ ಪ್ರತಿಭೆಯಿಂದ ಗಮನ ಸೆಳೆದರು. ಬಳಿಕ ನಟಿ ಏಳನೇ ವಯಸ್ಸಿನಲ್ಲಿ ಪ್ರಸಾರವಾದ ಸಬ್ರಿನಾ ದಿ ಟೀನೇಜ್ ವಿಚ್ ಟಿವಿ ಸರಣಿಯಲ್ಲಿ ಅಭಿನಯಿಸುವ ಮೂಲಕ ಅಪಾರ ಜನಪ್ರಿಯತೆ ಗಳಿಸಿದರು. ಬಾಲನಟಿಯಾಗಿ ಆರಂಭವಾದ ಅವರ ಪಯಣ, ಹಾಲಿವುಡ್ನಲ್ಲಿ ಭರವಸೆಯ ಕಲಾವಿದೆಯಾಗಿ ಬೆಳೆಯುವ ಅವಕಾಶವನ್ನು ನೀಡಿತು.
ಚಿತ್ರರಂಗದಲ್ಲಿ ಉತ್ತಮ ಅವಕಾಶಗಳು ದೊರೆಯುತ್ತಿದ್ದರೂ, ಡೇವಿಗ್ ಎಲಿಜಬೆತ್ ಚೇಸ್ 2016ರಲ್ಲಿ ಇದ್ದಕ್ಕಿದ್ದಂತೆ ನಟನೆಯಿಂದ ದೂರ ಸರಿದರು. ಅವರ ಈ ನಿರ್ಧಾರ ಅಭಿಮಾನಿಗಳಿಗೆ ಅಚ್ಚರಿ ಮೂಡಿಸಿತ್ತು. ಬಳಿಕ ಅವರು ಚಿತ್ರರಂಗದಲ್ಲಿ ಹೆಚ್ಚು ಕಾಣಿಸಿಕೊಳ್ಳಲಿಲ್ಲ. ಇದೇ ಅವಧಿಯಲ್ಲಿ ಅವರ ವೈಯಕ್ತಿಕ ಜೀವನದಲ್ಲಿ ಹಲವು ಸಮಸ್ಯೆಗಳು ಆರಂಭವಾದವು ಎಂದು ವರದಿಗಳು ತಿಳಿಸಿವೆ.
ನಟನೆಯಿಂದ ದೂರವಾದ ನಂತರ ಡೇವಿಗ್ ಎಲಿಜಬೆತ್ ಚೇಸ್ ಅವರ ಜೀವನ ಹಲವು ಏರಿಳಿತಗಳನ್ನು ಕಂಡಿತು. ಮಾದಕವಸ್ತು ಪ್ರಕರಣಗಳು, ಕಾನೂನು ಸಂಬಂಧಿತ ತೊಂದರೆಗಳು ಮತ್ತು ವೈಯಕ್ತಿಕ ಸಮಸ್ಯೆಗಳು ಅವರನ್ನು ನಿರಂತರವಾಗಿ ಕಾಡಿದವು ಎನ್ನಲಾಗಿದೆ. ಜೀವನದ ಕೊನೆಯ ಹಂತದಲ್ಲಿ ಅವರು ಆರ್ಥಿಕ ಸಂಕಷ್ಟಕ್ಕೂ ಒಳಗಾಗಿದ್ದರು. ತಮ್ಮ ಮನೆ ಸೇರಿದಂತೆ ಹಲವು ಆಸ್ತಿಗಳನ್ನು ಕಳೆದುಕೊಂಡು ಸಂಕಷ್ಟದ ಪರಿಸ್ಥಿತಿಯಲ್ಲಿ ಬದುಕುತ್ತಿದ್ದರು ಎಂಬ ಮಾಹಿತಿ ಹೊರಬಂದಿದೆ.
ವರದಿಗಳ ಪ್ರಕಾರ, 13ನೇ ವಯಸ್ಸಿನಿಂದಲೇ ಡೇವಿಗ್ ಎಲಿಜಬೆತ್ ಚೇಸ್ ಮಾದಕ ದ್ರವ್ಯಗಳ ವ್ಯಸನಕ್ಕೆ ಒಳಗಾಗಿದ್ದರು. ದೀರ್ಘಕಾಲದ ಈ ವ್ಯಸನವು ಅವರ ಆರೋಗ್ಯದ ಮೇಲೆ ಗಂಭೀರ ಪರಿಣಾಮ ಬೀರಿತು. ಆರೋಗ್ಯ ಹದಗೆಟ್ಟ ಹಿನ್ನೆಲೆಯಲ್ಲಿ ಅವರನ್ನು ಆಸ್ಪತ್ರೆಗೆ ದಾಖಲಿಸಲಾಗಿತ್ತು. ಆರಂಭದಲ್ಲಿ ಬಹು ಮಾದಕ ದ್ರವ್ಯಗಳ ಮಿತಿಮೀರಿದ ಸೇವನೆಯಿಂದ ಆರೋಗ್ಯ ಹದಗೆಟ್ಟಿದೆ ಎಂಬ ಮಾಹಿತಿ ಹರಿದಾಡಿತ್ತು.
ಡೇವಿ ಎಲಿಜಬೆತ್ ಚೇಸ್ ಅವರ ಮರಣದ ನಂತರ ಅವರ ಮ್ಯಾನೇಜರ್ ನೀಡಿದ ಮಾಹಿತಿಯ ಪ್ರಕಾರ, ಅವರು ಮೊದಲು ಮೆನಿಂಜೈಟಿಸ್ಗೆ ಒಳಗಾಗಿದ್ದರು. ಬಳಿಕ ಅದು ಸೆಪ್ಸಿಸ್ ಆಗಿ ಬೆಳೆಯಿತು. ಚಿಕಿತ್ಸೆ ಪಡೆಯುತ್ತಿದ್ದ ವೇಳೆ ಅವರು ಮೃತಪಟ್ಟಿದ್ದಾರೆ ಎಂದು ತಿಳಿಸಲಾಗಿತ್ತು. ಈ ಮಾಹಿತಿ ಸಾರ್ವಜನಿಕವಾಗಿ ವ್ಯಾಪಕವಾಗಿ ಹರಡಿತ್ತು.
ಆದರೆ ಅವರ ನಿಧನದ ಸುಮಾರು 15 ದಿನಗಳ ಬಳಿಕ ಲಾಸ್ ಏಂಜಲೀಸ್ ಕೌಂಟಿ ವೈದ್ಯಕೀಯ ಪರೀಕ್ಷಕರ ಅಧಿಕೃತ ವರದಿ ಬಿಡುಗಡೆಯಾಯಿತು. ಆ ವರದಿಯಲ್ಲಿ ಅವರ ಸಾವಿಗೆ ಪ್ರಮುಖ ಕಾರಣ ಏಡ್ಸ್ಗೆ ಸಂಬಂಧಿಸಿದ ಆರೋಗ್ಯ ಸಮಸ್ಯೆಗಳು ಎಂದು ಉಲ್ಲೇಖಿಸಲಾಗಿದೆ ಎಂದು ವರದಿಗಳು ತಿಳಿಸಿವೆ. ಈ ಮಾಹಿತಿ ಹೊರಬಿದ್ದ ನಂತರ ಹಾಲಿವುಡ್ ಸೇರಿದಂತೆ ಮನರಂಜನಾ ವಲಯದಲ್ಲಿ ದೊಡ್ಡ ಮಟ್ಟದ ಚರ್ಚೆ ಆರಂಭವಾಗಿದೆ.
