ಬಹುಭಾಷಾ ನಟಿ ಶರ್ಮಿಳಾ ಮಾಂಡ್ರೆ ಶೀಘ್ರದಲ್ಲೇ ವೈವಾಹಿಕ ಜೀವನಕ್ಕೆ ಕಾಲಿಡಲಿದ್ದಾರೆ ಎಂಬ ಸುದ್ದಿ ಗಾಂಧಿನಗರದಲ್ಲಿ ಸದ್ದು ಮಾಡುತ್ತಿದೆ. ತಮಿಳು ಚಿತ್ರರಂಗದ ಖ್ಯಾತ ನಿರ್ಮಾಪಕ ಸುಧನ್ ಸುಂದರಂ ಅವರೊಂದಿಗೆ ಮುಂದಿನ ವಾರ ಶರ್ಮಿಳಾ ಅವರ ನಿಶ್ಚಿತಾರ್ಥ ನಡೆಯಲಿದೆ ಎನ್ನಲಾಗಿದೆ.
ಈ ಸಂತಸದ ಸುದ್ದಿಯ ನಡುವೆಯೇ ನಿರ್ದೇಶಕ ಹಾಗೂ ನಟ ಪವನ್ ಕುಮಾರ್ ತಮ್ಮದೇ ವಿಶಿಷ್ಟ ಶೈಲಿಯಲ್ಲಿ ಪ್ರತಿಕ್ರಿಯೆ ನೀಡಿ ಸಾಮಾಜಿಕ ಜಾಲತಾಣಗಳಲ್ಲಿ ಗಮನ ಸೆಳೆದಿದ್ದಾರೆ. ಶರ್ಮಿಳಾ ಮದುವೆ ವಿಚಾರ ತಿಳಿಯುತ್ತಿದ್ದಂತೆಯೇ ಅವರು ಹಂಚಿಕೊಂಡಿರುವ ಫನ್ನಿ ವಿಡಿಯೋ ಈಗ ವೈರಲ್ ಆಗಿದೆ.
‘ಗಾಳಿಪಟ 2’ ಕಥೆಯೇ ಮತ್ತೆ ನೆನಪಿಸಿದ ಪವನ್!
ಯೋಗರಾಜ್ ಭಟ್ ನಿರ್ದೇಶನದ ‘ಗಾಳಿಪಟ 2’ ಸಿನಿಮಾದಲ್ಲಿ ಪವನ್ ಕುಮಾರ್ ಮತ್ತು ಶರ್ಮಿಳಾ ಮಾಂಡ್ರೆ ಒಟ್ಟಿಗೆ ನಟಿಸಿದ್ದರು. ಚಿತ್ರದಲ್ಲಿ ಶರ್ಮಿಳಾ ಅವರನ್ನು ಪ್ರೀತಿಸುವ ಪಾತ್ರದಲ್ಲಿ ಪವನ್ ಕಾಣಿಸಿಕೊಂಡಿದ್ದರು. ಆದರೆ ಕಥೆಯ ಅಂತ್ಯದಲ್ಲಿ ಶರ್ಮಿಳಾ ಬೇರೆಯವರನ್ನು ಮದುವೆಯಾಗುವುದರಿಂದ ಅವರ ಪ್ರೇಮ ವಿಫಲವಾಗುತ್ತದೆ.
ಈ ರೀಲ್-ಲೈಫ್ ಕಥೆಯನ್ನು ನೆನಪಿಸಿಕೊಂಡ ಪವನ್, ನಿಜ ಜೀವನದಲ್ಲೂ ಶರ್ಮಿಳಾ ಮದುವೆಯಾಗುತ್ತಿರುವ ಸುದ್ದಿಗೆ ಅದೇ ಭಾವನೆಯೊಂದಿಗೆ ತಮಾಷೆಯ ರೀಲ್ಸ್ ಒಂದನ್ನು ಸೃಷ್ಟಿಸಿದ್ದಾರೆ.
ವಿಡಿಯೋದಲ್ಲಿ ಏನಿದೆ?
ವಿಡಿಯೋ ಆರಂಭದಲ್ಲಿ ಶರ್ಮಿಳಾ ಮಾಂಡ್ರೆ ಸೋಫಾದ ಮೇಲೆ ಕುಳಿತು ಪುಸ್ತಕ ಓದುತ್ತಿರುವ ದೃಶ್ಯ ಕಾಣಿಸುತ್ತದೆ. ಹಿನ್ನೆಲೆಯಲ್ಲೇ ‘ಗಾಳಿಪಟ 2’ ಚಿತ್ರದ ಹಾಡು ಕೇಳಿಬರುತ್ತದೆ. ಬಳಿಕ ಕ್ಯಾಮೆರಾ ಪವನ್ ಕುಮಾರ್ ಕಡೆ ತಿರುಗಿದಾಗ ಅವರು ಬೇಸರಗೊಂಡಂತೆ ನಿಂತಿದ್ದು, ಎದೆಯ ಮೇಲೆ ‘ಹಾರ್ಟ್ ಬ್ರೇಕ್’ ಎಮೋಜಿ ಮೂಡುತ್ತದೆ.
ನಂತರ ಶರ್ಮಿಳಾ ಮತ್ತು ಸುಧನ್ ಸುಂದರಂ ಅವರ ನಿಶ್ಚಿತಾರ್ಥದ ಸುದ್ದಿ ಪರದೆಯ ಮೇಲೆ ಕಾಣಿಸಿಕೊಳ್ಳುತ್ತದೆ. ಕೊನೆಯಲ್ಲಿ “ನಿಮ್ಮ ನಿರ್ಧಾರಕ್ಕೆ ನನ್ನ ಸಂಪೂರ್ಣ ಬೆಂಬಲ ಮತ್ತು ಸಂತೋಷವಿದೆ ಶಮ್ಮಿ ಮ್ಯಾಮ್” ಎಂಬ ತಮಾಷೆಯ ಸಂದೇಶದೊಂದಿಗೆ ವಿಡಿಯೋ ಮುಕ್ತಾಯಗೊಳ್ಳುತ್ತದೆ.
ಶರ್ಮಿಳಾ ಪ್ರತಿಕ್ರಿಯೆ ಏನು?
ಈ ವಿಡಿಯೋಗೆ ಪ್ರತಿಕ್ರಿಯಿಸಿರುವ ಶರ್ಮಿಳಾ, “Oh My God!” ಎಂದು ಕಾಮೆಂಟ್ ಮಾಡಿದ್ದಾರೆ. ಇದಕ್ಕೆ ಉತ್ತರಿಸಿದ ಪವನ್ ಕುಮಾರ್, “ಶರ್ಮಿಳಾ ಎಂಬ ಗೆಳತಿ ನನಗೆ ಮತ್ತೆ ಸಿಗುವುದಿಲ್ಲ. ನಮ್ಮಿಬ್ಬರ ಮಧ್ಯೆ ಯಾವಾಗಲೂ ಅದ್ಭುತ ಸ್ನೇಹ ಮತ್ತು ಡಾರ್ಕ್ ಹ್ಯೂಮರ್ ಇರುತ್ತದೆ. ಅಭಿನಂದನೆಗಳು ಕಣೋ… ನಾನೇ ಮುಂದೆ ನಿಂತು ಖುಷಿಯಿಂದ ಕನ್ಯಾದಾನ ಮಾಡ್ತೀನಿ” ಎಂದು ಬರೆದು ಶುಭ ಹಾರೈಸಿದ್ದಾರೆ.
ಪವನ್ ಅವರ ಈ ಕ್ರಿಯೇಟಿವ್ ಪೋಸ್ಟ್ಗೆ ಅಭಿಮಾನಿಗಳು ಹಾಗೂ ಸಿನಿರಂಗದ ಗಣ್ಯರು ಮೆಚ್ಚುಗೆ ವ್ಯಕ್ತಪಡಿಸಿದ್ದು, ಸಾಮಾಜಿಕ ಜಾಲತಾಣಗಳಲ್ಲಿ ಭಾರೀ ವೈರಲ್ ಆಗಿದೆ.
