newsics.com/ನ್ಯೂಸಿಕ್ಸ್
ಬೇಸಿಗೆ ಎಂದ ತಕ್ಷಣ ಎಲ್ಲರಿಗೂ ನೆನಪಾಗುವುದು ಮಾವಿನ ಹಣ್ಣು. ಬೇಸಿಗೆಯಲ್ಲಿ ಮಾತ್ರ ಸಿಗುವ ಈ ಹಣ್ಣನ್ನು ತಿನ್ನಲು ಯಾರಿಗೆ ತಾನೇ ಇಷ್ಟವಾಗುವುದಿಲ್ಲ ಹೇಳಿ. ? ಬೇಸಿಗೆ ಬಂತೆಂದರೆ ಮಕ್ಕಳಿಂದ ಹಿಡಿದು ದೊಡ್ಡವರವರೆಗೆ ಎಲ್ಲರೂ ಬೇಕಾದಷ್ಟು ಮಾವಿನ ಹಣ್ಣನ್ನು ತಿನ್ನುತ್ತಾರೆ. ಆದರೆ ಅನೇಕ ಮಂದಿ ಮಾವಿನ ಹಣ್ಣನ್ನು ತಿನ್ನುವ ಮುನ್ನ ಸ್ವಲ್ಪ ಹೊತ್ತು ನೀರಿನಲ್ಲಿ ನೆನೆಸಿಡುತ್ತಾರೆ. ಅಷ್ಟಕ್ಕೂ ಮಾವಿನಹಣ್ಣುಗಳನ್ನು ತಿನ್ನುವ ಮುನ್ನ ನೀರಿನಲ್ಲಿ ನೆನೆಸಲು ಕಾರಣವೇನು ಗೊತ್ತಾ?
ಮಾವಿನಹಣ್ಣುಗಳನ್ನು ತಿನ್ನುವ ಮೊದಲು ನೀರಿನಲ್ಲಿ ನೆನೆಸಿಡುವುದು ಭಾರತದಲ್ಲಿ ಶತಮಾನಗಳಿಂದ ನಡೆದುಕೊಂಡು ಬಂದ ಹಿಂದಿನ ಸಂಪ್ರದಾಯವಾಗಿದೆ. ವರದಿಯೊಂದರ ಪ್ರಕಾರ, ಈ ಸಂಪ್ರದಾಯವನ್ನು ಶ್ಲಾಘಿಸಿದ ಜಿಂದಾಲ್ ನೇಚರ್ಕ್ಯೂರ್ ಇನ್ಸ್ಟಿಟ್ಯೂಟ್ನ ಮುಖ್ಯ ಡಯೆಟಿಷಿಯನ್ ಸುಷ್ಮಾ ಪಿಎಸ್, ಮಾವಿನಹಣ್ಣನ್ನು ಕೇವಲ ಒಂದು ಗಂಟೆ ನೀರಿನಲ್ಲಿ ನೆನೆಸಿಡುವುದರಿಂದ ಅವುಗಳಲ್ಲಿನ ಫೈಟಿಕ್ ಆಮ್ಲದ ಮಟ್ಟವನ್ನು ಗಮನಾರ್ಹವಾಗಿ ಕಡಿಮೆ ಮಾಡಬಹುದು ಎಂದು ಹೇಳಿದ್ದಾರೆ.
ಮಾವಿನ ಹಣ್ಣು ದೇಹದಲ್ಲಿ ಶಾಖವನ್ನು ಉತ್ಪಾದಿಸುವ ಗುಣವನ್ನು ಹೊಂದಿದೆ. ಇದನ್ನು ಅತಿಯಾಗಿ ತಿನ್ನುವುದರಿಂದ ದೇಹದ ಉಷ್ಣತೆ ಹೆಚ್ಚಾಗಿ ಜೀರ್ಣಕ್ರಿಯೆಯ ಮೇಲೆ ಪರಿಣಾಮ ಬೀರಬಹುದು. ಮಾವಿನ ಹಣ್ಣನ್ನು ನೀರಿನಲ್ಲಿ ನೆನೆಸಿಡುವುದರಿಂದ ಅದರ ಉಷ್ಣ ಗುಣಲಕ್ಷಣಗಳು ಕಡಿಮೆಯಾಗುತ್ತವೆ. ಇದು ಹಣ್ಣನ್ನು ದೇಹಕ್ಕೆ ಹೆಚ್ಚು ತಂಪಾಗಿಸುತ್ತದೆ ಮತ್ತು ಹೊಟ್ಟೆಯ ಅಸ್ವಸ್ಥತೆಯನ್ನು ತಪ್ಪಿಸುತ್ತದೆ.
ಇತ್ತೀಚಿನ ದಿನಗಳಲ್ಲಿ ಮಾವಿನ ಹಣ್ಣುಗಳು ಬೇಗನೆ ಹಣ್ಣಾಗಲು ಮತ್ತು ಕೀಟಗಳಿಂದ ರಕ್ಷಿಸಲು ವಿವಿಧ ರಾಸಾಯನಿಕಗಳು ಹಾಗೂ ಕೀಟನಾಶಕಗಳನ್ನು (Pesticides) ಬಳಸಲಾಗುತ್ತದೆ. ಇವು ಚರ್ಮ, ಉಸಿರಾಟ ಮತ್ತು ಜೀರ್ಣಾಂಗ ವ್ಯವಸ್ಥೆಗೆ ಹಾನಿಕಾರಕ. ಮಾವಿನ ಹಣ್ಣನ್ನು ನೀರಿನಲ್ಲಿ ಚೆನ್ನಾಗಿ ನೆನೆಸಿಡುವುದರಿಂದ ಅದರ ಸಿಪ್ಪೆಯ ಮೇಲಿರುವ ಕೀಟನಾಶಕಗಳ ಉಳಿಕೆಗಳು, ಧೂಳು ಮತ್ತು ಕೃತಕ ರಾಸಾಯನಿಕಗಳು ಸಂಪೂರ್ಣವಾಗಿ ತೊಳೆದುಹೋಗುತ್ತವೆ.
ಮಾವಿನ ಹಣ್ಣನ್ನು ನೆನೆಸದೆ ಹಾಗೇ ತಿಂದರೆ, ಅದರಲ್ಲಿರುವ ಅತಿಯಾದ ಉಷ್ಣತೆ ಮತ್ತು ರಾಸಾಯನಿಕಗಳಿಂದಾಗಿ ಮುಖದ ಮೇಲೆ ಮೊಡವೆಗಳು, ಗುಳ್ಳೆಗಳು ಅಥವಾ ಚರ್ಮದ ಅಲರ್ಜಿಗಳು ಕಾಣಿಸಿಕೊಳ್ಳಬಹುದು. ನೀರಿನಲ್ಲಿ ನೆನೆಸಿಡುವುದರಿಂದ ಹಣ್ಣಿನ ತೀವ್ರತೆ ಕಡಿಮೆಯಾಗಿ, ಚರ್ಮದ ಆರೋಗ್ಯಕ್ಕೆ ಯಾವುದೇ ಹಾನಿಯಾಗದಂತೆ ಸುರಕ್ಷಿತವಾಗಿ ಸೇವಿಸಬಹುದು.
ಮಾವಿನ ಹಣ್ಣನ್ನು ಮರದಿಂದ ಕೊಯ್ಯುವಾಗ ಅದರ ತೊಟ್ಟಿನಿಂದ ಬಿಳಿ ಬಣ್ಣದ ನೈಸರ್ಗಿಕ ಹಾಲಿನಂತಹ ದ್ರವ ಸ್ರವಿಸುತ್ತದೆ. ಇದರಲ್ಲಿ ‘ಉರುಶಿಯೋಲ್’ ಎಂಬ ಅಂಶವಿದ್ದು, ಇದು ತುಟಿ, ನಾಲಿಗೆ ಅಥವಾ ಗಂಟಲಿಗೆ ತಗುಲಿದರೆ ತುರಿಕೆ, ಉರಿ ಅಥವಾ ಗುಳ್ಳೆಗಳು ಉಂಟಾಗಬಹುದು. ನೀರಿನಲ್ಲಿ ನೆನೆಸಿಟ್ಟಾಗ ಈ ದ್ರವವು ಸಂಪೂರ್ಣವಾಗಿ ಸ್ವಚ್ಛವಾಗುತ್ತದೆ.
Tulsi Plant ತುಳಸಿ ಗಿಡ ಒಣಗಿ ಹೋಗಿದ್ಯಾ? 2 ರೂಪಾಯಿ ಇದ್ದರೆ ಸಾಕು ತುಳಸಿ ಗಿಡ ಸದಾ ಹಸಿರಾಗಿರುತ್ತೆ.!
