https://youtube.com/shorts/qIu1k1AjcVg?si=asT_CsSQI4v14g8C
newsics.com
ನಮ್ಮ ಆರೋಗ್ಯ ಕಾಪಾಡಿಕೊಳ್ಳಲು ಆಹಾರ ಪದ್ಧತಿ ಬಹಳ ಮುಖ್ಯವಾಗುತ್ತದೆ. ಅದರಲ್ಲಿಯೂ ನಾವು ಅಡುಗೆಗೆ ಬಳಸುವ ಎಣ್ಣೆ ದೇಹವನ್ನು ಆರೋಗ್ಯವಾಗಿಡಲು ಸಹಾಯ ಮಾಡುತ್ತದೆ. ಹಾಗಾಗಿ ಎಣ್ಣೆ ಪ್ಯಾಕೆಟ್ ಖರೀದಿಸುವ ವಿಷಯದಲ್ಲಿ ಬಹಳ ಜಾಗರೂಕರಾಗಿರಬೇಕು. ಇದು ನಾವು ದಿನನಿತ್ಯ ಬಳಸುವ ವಸ್ತುವಾಗಿರುವುದರಿಂದ, ಕೆಲವು ಮುನ್ನೆಚ್ಚರಿಕೆಗಳನ್ನು ತೆಗೆದುಕೊಳ್ಳುವುದು ಒಳ್ಳೆಯದು.
ನಾವು ಯಾವ ರೀತಿಯ ಆಹಾರವನ್ನು ತಯಾರಿಸುತ್ತೇವೆ ಮತ್ತು ಯಾವ ಪದಾರ್ಥಗಳನ್ನು ಬಳಸುತ್ತೇವೆ ಎಂಬುದು ಸಹ ಮುಖ್ಯವಾಗುತ್ತದೆ. ಎಣ್ಣೆ ಚೆನ್ನಾಗಿಲ್ಲದಿದ್ದರೆ ಅದರಿಂದ ಆರೋಗ್ಯಕರ ಆಹಾರವನ್ನು ತಯಾರಿಸಲು ಸಾಧ್ಯವಿಲ್ಲ. ಅದಕ್ಕಾಗಿಯೇ ಅಡುಗೆ ಎಣ್ಣೆಯನ್ನು ಖರೀದಿಸುವ ಮೊದಲು, ಕೆಲವು ಅಂಶಗಳ ಬಗ್ಗೆ ಗಮನ ಕೊಡಬೇಕು ಎಂದು ಆರೋಗ್ಯ ತಜ್ಞರು ಹೇಳುತ್ತಾರೆ. ಪ್ರತಿಯೊಂದು ಖಾದ್ಯದಲ್ಲೂ ನಾವು ಎಣ್ಣೆಯನ್ನು ಬಳಸುವುದರಿಂದ, ಕುಟುಂಬದ ಆರೋಗ್ಯದ ಮೇಲೆ ಗಂಭೀರ ಪರಿಣಾಮ ಬೀರಬಹುದು ಎಂದು ಸಂಶೋಧನೆಗಳು ತಿಳಿಸಿವೆ.
ನ್ಯಾಷನಲ್ ಇನ್ಸ್ಟಿಟ್ಯೂಟ್ ಆಫ್ ಎನ್ವಿರಾನ್ಮೆಂಟಲ್ ಹೆಲ್ತ್ ಸೈನ್ಸಸ್ (NIEHS) ಸಂಶೋಧನೆಯ ಪ್ರಕಾರ, ಪ್ಲಾಸ್ಟಿಕ್ ತಯಾರಿಕೆಯಲ್ಲಿ ಬಳಸುವ ರಾಸಾಯನಿಕಗಳು ಎಣ್ಣೆಯಲ್ಲಿ ಅತಿ ಬೇಗನೆ ಕರಗುತ್ತವೆ. ವಿಶೇಷವಾಗಿ ಬಿಸಿ ವಾತಾವರಣ ಅಥವಾ ಸೂರ್ಯನ ಬೆಳಕು ತಗುಲುವ ಜಾಗದಲ್ಲಿ ಎಣ್ಣೆಯನ್ನು ಇಟ್ಟಾಗ, ಪ್ಲಾಸ್ಟಿಕ್ ಅಣುಗಳು ಎಣ್ಣೆಯೊಂದಿಗೆ ಬೆರೆತು ಅದು ವಿಷಕಾರಿಯಾಗುತ್ತದೆ.
ಹಾನಿಕಾರಕ ರಾಸಾಯನಿಕಗಳ ಮಿಶ್ರಣ: ಪ್ಲಾಸ್ಟಿಕ್ ಪ್ಯಾಕೆಟ್ ಮತ್ತು ಬಾಟಲಿಗಳಲ್ಲಿ ಬಿಸ್ಫೆನಾಲ್-ಎ (BPA) ಮತ್ತು ಥಾಲೇಟ್ಸ್ ಎಂಬ ರಾಸಾಯನಿಕಗಳಿರುತ್ತವೆ. ಇವು ದೇಹ ಸೇರುವುದರಿಂದ ಹಾರ್ಮೋನ್ ಅಸಮತೋಲನ, ಥೈರಾಯ್ಡ್ ಮತ್ತು ಸಂತಾನಹೀನತೆಯಂತಹ ಸಮಸ್ಯೆಗಳು ಉಂಟಾಗಬಹುದು.
ಆಕ್ಸಿಡೀಕರಣ (Oxidation): ಪ್ಲಾಸ್ಟಿಕ್ ಪ್ಯಾಕೆಟ್ಗಳು ಎಣ್ಣೆಯನ್ನು ಸೂರ್ಯನ ಬೆಳಕಿನಿಂದ ರಕ್ಷಿಸುವುದಿಲ್ಲ. ಬೆಳಕು ಮತ್ತು ಶಾಖಕ್ಕೆ ಎಣ್ಣೆ ತೆರೆದುಕೊಂಡಾಗ ಅದು ಆಕ್ಸಿಡೀಕರಣಗೊಂಡು ತನ್ನ ಪೋಷಕಾಂಶಗಳನ್ನು ಕಳೆದುಕೊಳ್ಳುತ್ತದೆ.
ಬಹಳಷ್ಟು ಜನರು ಪ್ಲಾಸ್ಟಿಕ್ ಪ್ಯಾಕೆಟ್ನಲ್ಲಿ ಎಣ್ಣೆ ತಂದು, ಮತ್ತೆ ಅದನ್ನು ಪ್ಲಾಸ್ಟಿಕ್ ಡಬ್ಬಕ್ಕೇ ಸುರಿಯುತ್ತಾರೆ. ಇದು ಅತ್ಯಂತ ತಪ್ಪು ವಿಧಾನ.
ಸ್ಟೀಲ್ ಅಥವಾ ಗಾಜಿನ ಪಾತ್ರೆ: ಎಣ್ಣೆ ಖರೀದಿಸಿದ ತಕ್ಷಣ ಅದನ್ನು ಸ್ಟೀಲ್ ಪಾತ್ರೆ ಅಥವಾ ಗಾಜಿನ ಸೀಸೆಗಳಿಗೆ ವರ್ಗಾಯಿಸುವುದು ಅತ್ಯಂತ ಸುರಕ್ಷಿತ.
ತಂಪಾದ ಜಾಗದಲ್ಲಿಡಿ : ಎಣ್ಣೆಯ ಡಬ್ಬಗಳನ್ನು ಯಾವತ್ತೂ ಸ್ಟವ್ ಪಕ್ಕದಲ್ಲಿ ಅಥವಾ ಬಿಸಿಲು ಬೀಳುವ ಕಿಟಕಿ ಹತ್ತಿರ ಇಡಬೇಡಿ. ಕತ್ತಲೆಯಾದ ಮತ್ತು ತಂಪಾದ ಜಾಗದಲ್ಲಿ ಇಡುವುದರಿಂದ ಎಣ್ಣೆಯ ಗುಣಮಟ್ಟ ಕಾಪಾಡಬಹುದು.
ಸ್ವಚ್ಛತೆ ಅಗತ್ಯ: ಸ್ಟೀಲ್ ಡಬ್ಬಗಳಲ್ಲಿ ಎಣ್ಣೆ ಖಾಲಿಯಾದ ನಂತರ, ಅದನ್ನು ಚೆನ್ನಾಗಿ ತೊಳೆದು ಒಣಗಿಸಿ ಆಮೇಲೆ ಹೊಸ ಎಣ್ಣೆಯನ್ನು ಸುರಿಯಿರಿ. ಹಳೆಯ ಎಣ್ಣೆಯ ಜಿಡ್ಡು ಹೊಸ ಎಣ್ಣೆಯನ್ನು ಬೇಗನೆ ಹಾಳುಮಾಡುತ್ತದೆ.
