Subscribe ನ್ಯೂಸಿಕ್ಸ್ ಕನ್ನಡ NewsicsKannada/YouTube
newsics.com
ವಾಷಿಂಗ್ಟನ್/ಪ್ಯೋಂಗ್ಯಾಂಗ್: ಅಮೆರಿಕಾ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ನೇತೃತ್ವದ ಸೇನಾ ಕಾರ್ಯಾಚರಣೆಯಲ್ಲಿ ವೆನಿಜುವೆಲಾ ಅಧ್ಯಕ್ಷ ನಿಕೋಲಸ್ ಮಡುರೋ ಮತ್ತು ಅವರ ಪತ್ನಿ ಸಿಲಿಯಾ ಫ್ಲೋರೆಸ್ ಬಂಧನಕ್ಕೊಳಗಾದ ನಂತರ ಉತ್ತರ ಕೊರಿಯಾ ಸೇರಿದಂತೆ ಹಲವು ರಾಷ್ಟ್ರಗಳ ನಾಯಕರು ಖಂಡನೆ ವ್ಯಕ್ತಪಡಿಸಿದ್ದಾರೆ.
ಆದರೆ ಉತ್ತರ ಕೊರಿಯಾ ಸರ್ವೋಚ್ಚ ನಾಯಕ ಕಿಮ್ ಜಾಂಗ್ ಉನ್ ತೀವ್ರ ಖಂಡನೆ ವ್ಯಕ್ತಪಡಿಸಿದ್ದಲ್ಲದೆ, ಇನ್ನೂ ಒಂದು ಹೆಜ್ಜೆ ಮುಂದೆ ಹೋಗಿ, ಬಲಿಷ್ಠ ಕ್ಷಿಪಣಿಗಳನ್ನು ಪರೀಕ್ಷೆ ಮಾಡುವ ಮೂಲಕ ಅಮೆರಿಕಕ್ಕೆ ಖಡಕ್ ಎಚ್ಚರಿಕೆ ಸಂದೇಶ ರವಾನಿಸಿದ್ದಾರೆ.
ಮಡುರೋ ಅವರನ್ನು “ನನ್ನ ಸ್ನೇಹಿತ” ಎಂದು ಕರೆದಿರುವ ಕಿಮ್, “ಮಡುರೋ ಬಿಟ್ಟುಬಿಡಿ, ಇಲ್ಲದಿದ್ದರೆ…” ಎಂದು ಅಮೆರಿಕಾಗೆ ಎಚ್ಚರಿಕೆ ನೀಡಿದ್ದಾರೆ.
ಕಿಮ್ ಜಾಂಗ್ ಉನ್ ಅವರು ಮಡುರೋ ಅವರ ಸ್ಥಿತಿಗತಿಯನ್ನು ತಕ್ಷಣ ಸಾರ್ವಜನಿಕಗೊಳಿಸುವಂತೆಯೂ ಟ್ರಂಪ್ ಮತ್ತು ಅಮೆರಿಕಾ ನಾಯಕತ್ವವನ್ನು ಆಗ್ರಹಿಸಿದ್ದಾರೆ.
“ಈ ದಬ್ಬಾಳಿಕೆಯ ಕ್ರಮವು ಜಾಗತಿಕ ಘರ್ಷಣೆಗೆ ಕಾರಣವಾಗಬಹುದು” ಎಂದು ಎಚ್ಚರಿಕೆ ನೀಡಿರುವ ಅವರು, ಮಡುರೋ ಅವರನ್ನು ತಕ್ಷಣ ಬಿಡುಗಡೆ ಮಾಡದಿದ್ದರೆ “ಗಂಭೀರ ಅಂತರರಾಷ್ಟ್ರೀಯ ಪರಿಣಾಮಗಳು” ಎದುರಾಗುತ್ತವೆ ಎಂದು ಘೋಷಿಸಿದ್ದಾರೆ.
ಇದೇ ಸಮಯದಲ್ಲಿ, ಉತ್ತರ ಕೊರಿಯಾ ತನ್ನ ಪೂರ್ವ ಸಮುದ್ರದ ಕಡೆಗೆ ಹಲವು ಬ್ಯಾಲಿಸ್ಟಿಕ್ ಕ್ಷಿಪಣಿಗಳನ್ನು ಉಡಾಯಿಸಿದೆ. ಇದರಿಂದ ದಕ್ಷಿಣ ಕೊರಿಯಾ, ಅಮೆರಿಕಾ ಮತ್ತು ಜಪಾನ್ ಹೆಚ್ಚಿನ ಎಚ್ಚರ ವಹಿಸಿವೆ.
ರಷ್ಯಾ ಕೂಡ ಅಮೆರಿಕಾದ ಕ್ರಮವನ್ನು “ಸಶಸ್ತ್ರ ಆಕ್ರಮಣ” ಎಂದು ಖಂಡಿಸಿದೆ.
ಈ ಮಧ್ಯೆ, ವಿಶ್ವದ ಅತಿದೊಡ್ಡ ತೈಲ ಮೀಸಲು ಹೊಂದಿರುವ ವೆನಿಜುವೆಲಾದಲ್ಲಿ ಸೇವೆಗಳು ಮತ್ತು ನಿರ್ವಹಣೆ ಕೊರತೆಯಿಂದ ಉತ್ಪಾದನೆ ಕುಸಿದಿದೆ. ಟ್ರಂಪ್ ಅವರು ವೆನಿಜುವೆಲಾದ ತೈಲ ಉದ್ಯಮವನ್ನು “ಪುನರುಜ್ಜೀವನಗೊಳಿಸುವುದಾಗಿ” ಹೇಳಿಕೊಂಡಿದ್ದಾರೆ.
ಏನಿದು ಹ್ವಾಸಾಂಗ್ 20?:
ಸದ್ಯ ಜಗತ್ತಿನಲ್ಲಿ ಯುದ್ಧ ಕಾರ್ಮೋಡ ಕವಿದಿದೆ. ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್, ಸಣ್ಣ ಸಣ್ಣ ರಾಷ್ಟ್ರಗಳ ಮೇಲೆ ತನ್ನ ಕೆಂಗಣ್ಣು ಬೀರಿರುವುದು ಇನ್ನುಳಿದ ವಿಶ್ವ ನಾಯಕರ ಕಣ್ಣನ್ನು ಕೆಂಪಾಗಿಸಿದೆ.
ಉತ್ತರ ಕೊರಿಯಾ ಕ್ಷಿಪಣಿಗಳ ಪರೀಕ್ಷೆಯಲ್ಲಿ ಬಿಜಿಯಾಗಿದೆ. ಉತ್ತರ ಕೊರಿಯಾದ ಹ್ವಾಸಾಂಗ್ -20 ಐಸಿಬಿಎಂ ಕ್ಷಿಪಣಿ ಮುನ್ನೆಲೆಗೆ ಬಂದಿದೆ. ಈ ಕ್ಷಿಪಣಿಯನ್ನು 2025, ಅಕ್ಟೋಬರ್ ತಿಂಗಳಲ್ಲಿ ವರ್ಕರ್ಸ್ ಪಾರ್ಟಿಯ 80ನೇ ವಾರ್ಷಿಕೋತ್ಸವದ ಮೆರವಣಿಗೆಯಲ್ಲಿ ಉತ್ತರ ಕೊರಿಯಾ ಮೊದಲ ಬಾರಿಗೆ ಪ್ರದರ್ಶಿಸಿತು.
ಕೊರಿಯಾದ ರಾಜ್ಯ ಮಾಧ್ಯಮ ಕೊರಿಯನ್ ಸೆಂಟ್ರಲ್ ನ್ಯೂಸ್ ಏಜೆನ್ಸಿ (KCNA) ಪ್ರಕಾರ, ಈ ಕ್ಷಿಪಣಿ ಈವರೆಗಿನ ರಾಷ್ಟ್ರದ ‘ಅತ್ಯಂತ ಶಕ್ತಿಶಾಲಿ ಪರಮಾಣು ಕಾರ್ಯತಂತ್ರದ ಅಸ್ತ್ರ’ ಎಂದು ಅಧಿಕೃತವಾಗಿ ಗೊತ್ತುಪಡಿಸಿದೆ.
ಮಿಲಿಟರಿ ತಜ್ಞರ ಅಂದಾಜಿನ ಪ್ರಕಾರ, ಹ್ವಾಸಾಂಗ್ -20 ಕ್ಷಿಪಣಿಯು 15,000 ಕಿಲೋಮೀಟರ್ಗಳಿಗಿಂತ ಹೆಚ್ಚು ಕಾರ್ಯಾಚರಣೆಯ ವ್ಯಾಪ್ತಿಯನ್ನು ಹೊಂದಿದೆ.
ಈ ಸಾಮರ್ಥ್ಯವು ವಾಷಿಂಗ್ಟನ್ ಡಿ.ಸಿ ಮತ್ತು ನ್ಯೂಯಾರ್ಕ್ ಸೇರಿದಂತೆ ಯುನೈಟೆಡ್ ಸ್ಟೇಟ್ಸ್ನ ಪ್ರತಿ ಪ್ರಮುಖ ನಗರವು ಇದರ ವ್ಯಾಪ್ತಿಯಲ್ಲಿ ಬರುತ್ತದೆ ಮತ್ತು ಅದನ್ನೂ ಮೀರಿದೆ.
ಹಳೆಯ ಲಿಕ್ವಿಡ್ ಫ್ಯುಯೆಲ್ ಕ್ಷಿಪಣಿಗಳಿಗಿಂತ ಹ್ವಾಸಾಂಗ್-20 ಭಿನ್ನವಾಗಿದೆ. ಏಕೆಂದರೆ, ಈ ಕ್ಷಿಪಣಿಯು ಕಾರ್ಬನ್ ಫೈಬರ್ ಸಂಯುಕ್ತಗಳಿಂದ ತಯಾರಿಸಿದ ಹೆಚ್ಚಿನ ಒತ್ತಡದ ಘನ-ಇಂಧನ ಎಂಜಿನ್ನ್ನು ಬಳಸುತ್ತದೆ. ಇದು ಕ್ಷಿಪಣಿಗೆ ಮುಂಚಿತವಾಗಿಯೇ ಇಂಧನ ತುಂಬಿಸಿ, ನಿಮಿಷಗಳಲ್ಲಿ ಉಡಾವಣೆ ಮಾಡಲು ಅನುವು ಮಾಡಿಕೊಡುತ್ತದೆ, ಇದರಿಂದಾಗಿ ಸ್ಯಾಟಲೈಟ್ ಸಿಸ್ಟಮ್ಗಳು ಈ ಕ್ಷಿಪಣಿಯನ್ನು ಪತ್ತೆಹಚ್ಚಲು ಮತ್ತು ಅದನ್ನು ತಡೆಯಲು ತುಂಬಾ ಕಷ್ಟವಾಗುತ್ತದೆ.
ಹ್ವಾಸಾಂಗ್ -19 ನಂತಹ ಈ ಹಿಂದಿನ ಮಾಡೆಲ್ಗಳಿಗೆ ಹೋಲಿಸಿದರೆ ಹ್ವಾಸಾಂಗ್-20 ಕ್ಷಿಪಣಿಯು ಮೊಂಡಾದ, ಅಗಲವಾದ ಮೂಗಿನ ಕೋನವನ್ನು ಹೊಂದಿದೆ.
ಮೆರವಣಿಗೆಯಲ್ಲಿ ಹ್ವಾಸಾಂಗ್-20 ಕ್ಷಿಪಣಿಯನ್ನು 11-ಆಕ್ಸಲ್ ಹೊಂದಿರುವ ಬೃಹತ್ ಟ್ರಾನ್ಸ್ಪೋರ್ಟರ್ ಎರೆಕ್ಟರ್ ಲಾಂಚರ್ (TEL) ಮೇಲೆ ಸಾಗಿಸಲಾಯಿತು. ಗುಂಡಿನ ದಾಳಿಯ ವೇಳೆ ತನ್ನ ಸ್ಥಿರತೆಯನ್ನು ಈ ಕ್ಷಿಪಣಿ ಸುಧಾರಿಸುತ್ತದೆ.
ಉತ್ತರ ಕೊರಿಯಾದ ರಕ್ಷಣಾ ವರದಿಗಳ ಪ್ರಕಾರ, ಹೊಸ ಘನ-ಇಂಧನ ಎಂಜಿನ್ ಸರಿಸುಮಾರು 200 ಟನ್ ಥ್ರಸ್ಟ್ ಉತ್ಪಾದಿಸುತ್ತದೆ. ಇದು ಹ್ವಾಸಾಂಗ್ -18 ಗಿಂತ ಶೇ.40 ರಷ್ಟು ಹೆಚ್ಚಿನ ಶಕ್ತಿಯನ್ನು ಹೊಂದಿದೆ. ಈ ಶಕ್ತಿಯು ಹೆಚ್ಚಿನ ದೂರದವರೆಗೆ ಭಾರವಾದ ಪರಮಾಣು ಪೇಲೋಡ್ಗಳನ್ನು ಸಾಗಿಸಲು ಕ್ಷಿಪಣಿಗೆ ಅನುವು ಮಾಡಿಕೊಡುತ್ತದೆ.
ನಾಯಕ ಕಿಮ್ ಜಾಂಗ್ ಉನ್, ಹ್ವಾಸಾಂಗ್-20 ಕ್ಷಿಪಣಿಯನ್ನು ತಮ್ಮ ಯುದ್ಧ ನಿರೋಧಕ ತಂತ್ರದ ಮೂಲ ಆಧಾರವಾಗಿ ರೂಪಿಸಿದ್ದಾರೆ. ಈ ಕ್ಷಿಪಣಿಯ ಉಡಾವಣಾ ಸಾಮರ್ಥ್ಯವು, ಅಮೆರಿಕದ ಕ್ಷಿಪಣಿ ಗುರಾಣಿಗಳನ್ನೂ ಸೋಲಿಸುತ್ತದೆಯಂತೆ. ಉತ್ತರ ಕೊರಿಯಾ ಪಾಲಿಗೆ ಇದೊಂದು ಬ್ರಹ್ಮಾಸ್ತ್ರವಾಗಿದ್ದು, ಯಾವುದೇ ವಿದೇಶಿ ಮಿಲಿಟರಿ ಹಸ್ತಕ್ಷೇಪ ಮಾಡಿದಾಗ ತನ್ನ ಪ್ರಾಥಮಿಕ ರಕ್ಷಕನಾಗಿ ಹ್ವಾಸಾಂಗ್-20 ಕ್ಷಿಪಣಿ ಮೇಲೆ ನಿಗಾ ವಹಿಸುತ್ತದೆ.
Nepal tensions ನೇಪಾಳ ಉದ್ವಿಗ್ನ, ಮಸೀದಿ ಧ್ವಂಸ, ಗಡಿ ಭಾಗದಲ್ಲಿ ನಿಗಾ ಹೆಚ್ಚಿಸಿದ ಭಾರತ
