newsics.com
ಬೇಕರಿಯಿಂದ ತಂದಿದ್ದ ಪಫ್ ನಲ್ಲಿ ಹಾವು ಪತ್ತೆಯಾಗಿದ್ದು, ಇದನ್ನು ಕಂಡು ಮಹಿಳೆ ಆಘಾತಕ್ಕೊಳಗಾದ ಘಟನೆ ತೆಲಂಗಾಣದ ಮಹಬೂಬ್ನಗರ ಜಿಲ್ಲೆಯ ಜಡ್ಚರ್ಲಾದಲ್ಲಿ ನಡೆದಿದೆ.
ಜಡ್ಚರ್ಲಾ ಪಟ್ಟಣದ ಜೌಖಿ ನಗರದ ನಿವಾಸಿ ಶ್ರೀಶೈಲಮ್ಮ ಎಂಬುವರು ಮಂಗಳವಾರ ಸಂಜೆ ಸ್ಥಳೀಯ ಬೇಕರಿಯಿಂದ ತಮ್ಮ ಮಕ್ಕಳಿಗೆ ಎಗ್ ಪಫ್ ಮತ್ತು ಕರಿ ಪಫ್ ಖರೀದಿಸಿದರು.
ಬಳಿಕ ಮನೆಗೆ ಬಂದ ಶ್ರೀಶೈಲಮ್ಮ, ಪಫ್ಗಳ ಪ್ಯಾಕೆಟ್ ಅನ್ನು ಬಿಚ್ಚಿ, ತನ್ನ ಮಕ್ಕಳಿಗೆ ತಿನ್ನಲು ಕೊಟ್ಟು ತಾನು ಕರಿ ಪಫ್ ತಿನ್ನುವಾಗ ಏನೋ ಒಂದು ವಸ್ತು ಅವರ ಬಾಯಿಗೆ ಸಿಕ್ಕಿದೆ. ಏನಿರಬಹುದು ಅಂತ ತಿಳಿಯಲು ಕರಿ ಪಫ್ ಮೇಲ್ಭಾಗವನ್ನು ತೆರೆದಾಗ ಆಕೆಯ ಕಣ್ಣಿಗೆ ಸಣ್ಣದಾದ ಸತ್ತ ಹಾವು ಕಂಡು ಗಾಬರಿಯಾಗಿದ್ದಾರೆ.
ಇದಾದ ಬಳಿಕ ಶ್ರೀಶೈಲಮ್ಮ ಕರಿ ಪಫ್ ತೆಗೆದುಕೊಂಡು ಸಂಬಂಧಪಟ್ಟ ಬೇಕರಿಗೆ ಹೋಗಿ ವಿಷಯ ತಿಳಿಸಿದರು. ಆದರೆ, ಬೇಕರಿ ಮ್ಯಾನೇಜರ್ ಉಡಾಫೆ ಉತ್ತರ ನೀಡಿದ್ದಾರೆ. ಇದೆಲ್ಲವೂ ಸಾಮಾನ್ಯ, ನಾವು ಪಡೆದ ತರಕಾರಿಗಳಲ್ಲಿ ಸತ್ತ ಹಾವು ಇದ್ದಿರಬೇಕು ಎಂದು ಉತ್ತರಿಸಿದ್ದಾರೆ. ಇದಾದ ಬಳಿಕ, ಸಂತ್ರಸ್ತೆ ತನ್ನ ಪತಿಯ ಜತೆ ಹೋಗಿ ಪೊಲೀಸರಿಗೆ ದೂರು ನೀಡಿದ್ದಾರೆ.
