newsics.com
ತನ್ನ ಅಜ್ಜನಿಗೆ ಕೊಟ್ಟ ಮಾತು ಉಳಿಸಿಕೊಳ್ಳಲು ಮೊಮ್ಮಗ 200ಕ್ಕೂ ಹೆಚ್ಚು ನವಿಲುಗಳನ್ನು ಕುಟುಂಬ ಸದಸ್ಯರನ್ನಾಗಿಸಿಕೊಂಡಿದ್ದಾನೆ.
ಇದು ಒಡಿಶಾದ ಕಟಕ್ ಜಿಲ್ಲೆಯ ಸಾನಾ ಮುಂಡಳಿ ಅರಣ್ಯದಲ್ಲಿ ನಿತ್ಯ ಕಂಡು ಬರುವ ದೃಶ್ಯ. ಹೆಸರು ಕನ್ಹು ಬೆಹೆರಾ. ಜ್ಯೂನಿಯರ್ ನವಿಲು ಪ್ರೇಮಿ ಅಂತಾನೇ ಇಲ್ಲಿ ಖ್ಯಾತಿ ಗಳಿಸಿದ್ದಾರೆ. ಈತನ ಪಕ್ಷಿ ಪ್ರೀತಿ ಕಂಡು ಅಲ್ಲಿನ ಅಗ್ನಿಶಾಮಕ ಇಲಾಖೆಯು ಈ ವ್ಯಕ್ತಿಯನ್ನು ಹೋಮ್ ಗಾರ್ಡ್ ಆಗಿ ನೇಮಿಸಿಕೊಂಡಿದೆ. ಅರಣ್ಯದ ಬಳಿಯೇ ಕಚೇರಿ ಇರುವುದರಿಂದ ಈತ, ನವಿಲುಗಳಿಗೆ ಇನ್ನಷ್ಟು ಹತ್ತಿರವಾಗಿದ್ದಾನೆ.
ಕನ್ಹು ಬೆಹೆರಾ ಅವರ ಅಜ್ಜ ಪಾನು ಬೆಹೆರಾ ಕೂಡ ನವಿಲು ಪ್ರೇಮಿಯಾಗಿದ್ದರು. 1999ರ ಸೂಪರ್ ಸೈಕ್ಲೋನ್ ವೇಳೆ ಇವರಿಗೂ ನವಿಲುಗಳ ನಡುವೆ ಬಾಂಧವ್ಯ ಆರಂಭವಾಗುತ್ತದೆ. ಸೈಕ್ಲೋನ್ ವೇಳೆ ಒಂದು ಗಂಡು ಮತ್ತು ಎರಡು ಹೆಣ್ಣು ನವಿಲುಗಳು ಆಹಾರ ಅರಸಿ ಕಾಡಿನಿಂದ ಬಂದಿದ್ದವು. ಈ ವೇಳೆ ಅವು ಗಾಯಗೊಂಡು ಕೆಳಗೆ ಬಿದ್ದಿದ್ದವು. ಆಗ ಪಾನು ಅವರು ಆ ನವಿಲುಗಳನ್ನು ಆರೈಕೆ ಮಾಡಿದರು.
ನವಿಲುಗಳು ಚೇತರಿಸಿಕೊಂಡ ಬಳಿಕ ಅವುಗಳನ್ನು ಅರಣ್ಯಕ್ಕೆ ಬಿಟ್ಟು ಬಂದರು. ಆ ವೇಳೆ ಗಂಡು ನವಿಲಿಗೆ ರಾಜ ಎಂದು ಹೆಸರಿಟ್ಟು ಕಳುಹಿಸಿದರು. ಆ ಬಳಿಕ ನಿತ್ಯ ಅರಣ್ಯಕ್ಕೆ ತೆರಳಿ ನವಿಲುಗಳಿಗೆ ಪಾನು ಆಹಾರ ಹಾಕುತ್ತಾ ಇದ್ದರು. ಇಲ್ಲಿಂದ ನವಿಲುಗಳ ಜತೆ ನಂಟು ಬೆಳೆಯಿತು. ಇದು ಮೊಮ್ಮಗನಿಗೂ ಹಸ್ತಾಂತರವಾಗಿ ಇದೀಗ 204 ನವಿಲುಗಳ ದೊಡ್ಡ ಕುಟುಂಬವಾಗಿದೆ.
ಪಾನು ಅನಾರೋಗ್ಯಕ್ಕೀಡಾಗಿ ಹಾಸಿಗೆ ಹಿಡಿದಾಗ ತನ್ನ ಮೊಮ್ಮಗನಿಗೆ ನವಿಲುಗಳನ್ನು ನೋಡಿಕೊಳ್ಳುವಂತೆ ಮಾತು ತೆಗೆದುಕೊಂಡಿದ್ದರು. ಆದ್ದರಿಂದ 2017ರಲ್ಲಿ ಅಜ್ಜ ತೀರಿಕೊಂಡ ನಂತರ ಕನ್ಹು, ಕೊಟ್ಟ ಮಾತು ಉಳಿಸಿಕೊಳ್ಳುತ್ತಿದ್ದಾರೆ. 2017ರಲ್ಲಿ 54 ನವಿಲುಗಳಿದ್ದವು. ಈಗ ಇದು 204ಕ್ಕೆ ತಲುಪಿದ್ದು, ಎಲ್ಲಕ್ಕೂ ಕನ್ಹು ನಿತ್ಯ ಆಹಾರ ಹಾಕುತ್ತಾರೆ.
ಕನ್ಹು ಮಾಡುವ ನಿಸ್ವಾರ್ಥ ಕೆಲಸ ಮೆಚ್ಚಿ 2019 ರಲ್ಲಿ ಹತ್ತಿರದ ಅಗ್ನಿಶಾಮಕ ಕಚೇರಿಯಲ್ಲಿ ಹೋಮ್ ಗಾರ್ಡ್ ಆಗಿ ನೇಮಿಸಲಾಯಿತು. ಕನ್ಹು ಮತ್ತು ಅವರ ಅಜ್ಜನ ಸೇವೆಯಿಂದಾಗಿ ಇದನ್ನು ನವಿಲುಗಳ ಕಣಿವೆ ಎಂದೇ ಗುರುತಿಸಲಾಗಿದೆ.
Zero Shadow Day: ಏ. 24 ಶೂನ್ಯ ನೆರಳು ದಿನ; ಈ ದಿನ ನಿಮ್ಮ ನೆರಳು ನಿಮಗೆ ಕಾಣಲ್ಲ!
