newsics.com
ನೀವು ಜಗತ್ತಿನಲ್ಲಿ ದೊಡ್ಡ ದೊಡ್ಡ ಕುಟುಂಬಗಳನ್ನು ನೋಡಿರಬಹುದು. ಆದ್ರೆ, ಈತ ಒಟ್ಟು 20 ಮದುವೆಯಾಗಿದ್ದಾನೆ. ಈ 20 ಪತ್ನಿಯರಲ್ಲಿ ಈಗ 4 ಜನ ಪತ್ನಿಯರು ಇಲ್ಲ. ಉಳಿದ 16 ಜನ ಪತ್ನಿಯರು ಹಾಗೂ 104 ಮಕ್ಕಳು ಇಂದಿಗೂ ಕೂಡ ಜೊತೆಯಾಗಿಯೇ ಇದ್ದಾರೆ. ತಮ್ಮ ಮನೆಯನ್ನೇ ಒಂದು ಪುಟ್ಟ ಗ್ರಾಮವನ್ನಾಗಿಸಿಕೊಂಡು ಜೀವನ ಸಾಗಿಸುತ್ತಿದ್ದಾರೆ.
ಒಂದಿಷ್ಟು ಮಾಧ್ಯಮಗಳು ವರದಿ ಮಾಡಿರುವ ಪ್ರಕಾರ ಪೂರ್ವ ಆಫ್ರಿಕಾದ ದೇಶವಾದ ಟಾಂಜಾನಿಯಾದಲ್ಲಿರುವ ಸಣ್ಣ ಹಳ್ಳಿಯಲ್ಲಿರುವ ಕಪಿಂಗ್ ಎಂಬ ಹೆಸರಿನ ವ್ಯಕ್ತಿ ಈತ. ಇವನು ನಡೆಸುತ್ತಿರುವ ಸಂಸಾರ ಹಾಗೂ ಮನೆಯ ವಿಷಯ ಈಗ ವಿಶ್ವದೆಲ್ಲೆಡೆ ಚರ್ಚೆಗೆ ಗ್ರಾಸವಾಗಿದೆ. ಈ ಆಫ್ರಿನ್ ಮನುಷ್ಯ ಈಗ ಒಂದೇ ಮನೆಯಲ್ಲಿ 16 ಪತ್ನಿಯರು ಹಾಗೂ 104 ಮಕ್ಕಳು ಮತ್ತು 144 ಮೊಮ್ಮಕ್ಕಳು ಮರಿಮೊಮ್ಮಕ್ಕಳ ಜೊತೆಯೇ ಇದ್ದಾನೆ. ಮನೆಯೇ ಒಂದು ಸಣ್ಣದಾದ ಗ್ರಾಮವಾಗಿ ಬದಲಾಯಿಸಿದ್ದಾನೆ. ಇವರ ಮನೆಯಲ್ಲಿ ನಿತ್ಯ ನಡೆಯುವ ಅಡುಗೆ, ನಮ್ಮ ದೇಶದಲ್ಲಿ ಪುಟ್ಟ ದೇವಸ್ಥಾನಗಳಲ್ಲಿ ನಡೆಯುವ ಅನ್ನಪ್ರಸಾದ ರೀತಿಯಲ್ಲಿ ಇರುತ್ತದೆ. ಪ್ರತಿದಿನ ಇಲ್ಲಿ ಜಾತ್ರೆ ಏನಾದರೂ ನಡೆಯುತ್ತಿದೆಯಾ ಎನ್ನುವ ರೀತಿ ನಿಮಗೆ ಕಾಣುತ್ತದೆ.
ಈ ಕಪಿಂಗ ಎಂಬ ಪ್ರಚಂಡ ಗಂಡ 1961ರಲ್ಲಿ ಮೊದಲ ಬಾರಿ ಮದುವೆಯಾದ ಮತ್ತು ಒಂದು ಮಗುವಿಗೆ ತಂದೆಯೂ ಆದ. ಆದ್ರೆ ಇವನ ತಂದೆ ಇವನಿಗೆ ಕುಟುಂಬವನ್ನು ಇನ್ನು ದೊಡ್ಡದು ಮಾಡಿಕೊ ಎಂದು ಹೇಳಿದ್ದರಂತೆ. ಇದರಿಂದ ನಿನಗೆ ವರದಕ್ಷಿಣೆಯೂ ಬರುತ್ತದೆ. ನಮ್ಮ ಕುಟುಂಬ ದೊಡ್ಡದು ಆಗುತ್ತದೆ ಎಂದಿದ್ದರಂತೆ. ಪಿತೃವಾಕ್ಯ ಪರಿಪಾಲಕನಂತೆ ಮೊದಲ ಮದುವೆಯ ನಂತರ ಸಾಲು ಸಾಲು ಮದುವೆಯಾದ.
ಕಪಿಂಗನ ಮೊದಲು ಐದು ಮದುವೆಗೆ ಅವರ ತಂದೆಯೇ ಹಣ ಸಹಾಯ ಮಾಡಿದ್ದರು. ಆದ್ರೆ ಉಳಿದ ಮದುವೆಗಳನ್ನು ಈತ ಖುದ್ದು ತಾನಾಗಿಯೇ ಮಾಡಿಕೊಂಡ. ಇವನ 20 ಪತ್ನಿಯರಲ್ಲಿ ಕೆಲವರು ಮೃತಪಟ್ಟಿದ್ದಾರೆ . ಇಂದಿಗೂ ಕೂಡ ಈತ 16 ಪತ್ನಿಯರ ಜೊತೆ ಇದ್ದಾನೆ. ಅದರಲ್ಲಿ 7 ಜನರು ಒಬ್ಬರಿಗೊಬ್ಬರು ಅಕ್ಕತಂಗಿಯರೇ ಆಗಬೇಕು. ಹೀಗೆ ಒಂದೇ ಕುಟುಂಬದ 7 ಸಹೋದರಿಯರನ್ನು ಈತ ಮದುವೆಯಾಗಿದ್ದಾನೆ. ಎಲ್ಲ ಪತ್ನಿಯರು ಬೇರೆ ಬೇರೆ ಅಡುಗೆ ಮಾಡುತ್ತಾರೆ ಆದ್ರೆ ಊಟಕ್ಕೆ ಮಾತ್ರ ಒಟ್ಟಿಗೆಯೇ ಕುಳಿತುಕೊಳ್ಳುತ್ತಾರೆ. ಜೊತೆಗೆ ಕೃಷಿ ಭೂಮಿಯಲ್ಲಿ ಕೆಲಸವನ್ನು ಮಾಡುತ್ತಾರೆ. ಇದು ಮನೆಯಲ್ಲ ಒಂದು ವ್ಯವಸ್ಥೆಯೇನೋ ಎನ್ನುವ ರೀತಿ ಒಬ್ಬರಿಗೊಬ್ಬರು ಕೆಲಸವನ್ನು ಮಾಡುತ್ತಾರೆ.
