newsics.com/ನ್ಯೂಸಿಕ್ಸ್
ಜಗತ್ತಿನ ಅತ್ಯಂತ ರಹಸ್ಯಮಯ ಮತ್ತು ಕಟ್ಟುನಿಟ್ಟಿನ ದೇಶಗಳಲ್ಲಿ ಉತ್ತರ ಕೊರಿಯಾ ಮುಂಚೂಣಿಯಲ್ಲಿದೆ. ಕಿಮ್ ಜೊಂಗ್ ಉನ್ ಅವರ ಸರ್ವಾಧಿಕಾರಿ ಆಡಳಿತದಲ್ಲಿ ಈ ದೇಶವು ತನ್ನದೇ ಆದ ವಿಚಿತ್ರ ಮತ್ತು ಕಠೋರ ಕಾನೂನುಗಳಿಗೆ ಹೆಸರುವಾಸಿಯಾಗಿದೆ.
ಆದರೆ, ಕಿಮ್ ಕುಟುಂಬದ ಒಂಬತ್ತು ಸದಸ್ಯರು ಪ್ರಾಣದ ಹಂಗು ತೊರೆದು ಕೈಗೊಂಡ ಸಾಹಸಮಯ ಪಯಣ ಈಗ ಜಗತ್ತಿನ ಗಮನ ಸೆಳೆದಿದೆ.
ಈ ಸಾಹಸದ ಬೀಜ ಬಿತ್ತಿದ್ದು ಕಿಮ್ ಸಹೋದರರ ತಂದೆ. ಸಮುದ್ರ ಮಾರ್ಗದ ಮೂಲಕ ದಕ್ಷಿಣ ಕೊರಿಯಾಕ್ಕೆ ಓಡಿಹೋಗಬೇಕೆಂದು ಅವರು 10 ವರ್ಷಗಳ ಹಿಂದೆಯೇ ಯೋಜಿಸಿದ್ದರು. ಆದರೆ ಆ ಕನಸು ನನಸಾಗುವ ಮೊದಲೇ ಅವರು ಮೃತಪಟ್ಟರು. ಅವರ ಗಂಡು ಮಕ್ಕಳಾದ ಕಿಮ್ ಇಲ್-ಹ್ಯೋಕ್ ಮತ್ತು ಕಿಮ್ ಯಿ-ಹ್ಯೋಕ್ ಅಪ್ಪನ ಆಸೆಯನ್ನು ಈಡೇರಿಸಲು ನಿರ್ಧರಿಸಿದರು. ಅವರು ಉತ್ತರ ಕೊರಿಯಾ ತೊರೆಯುವಾಗ ಅಪ್ಪನ ಚಿತಾಭಸ್ಮವನ್ನೂ ತಮ್ಮ ದೋಣಿಯಲ್ಲೇ ಹೊತ್ತೊಯ್ದಿದ್ದರು ಎಂಬುದು ಭಾವುಕ ಸಂಗತಿ
ಸಾಮಾನ್ಯವಾಗಿ ಚೀನಾ ಮೂಲಕ ಪರಾರಿಯಾಗುವುದು ಸಾಮಾನ್ಯ. ಆದರೆ ಅಲ್ಲಿ ಸಿಕ್ಕಿಬಿದ್ದರೆ ಮರಳಿ ಕಳುಹಿಸುವ ಭೀತಿ ಇತ್ತು. ಆದ್ದರಿಂದ ಈ ಕುಟುಂಬವು ಅತ್ಯಂತ ಅಪಾಯಕಾರಿ ಎಲ್ಲೋ ಸೀ ಸಮುದ್ರ ಮಾರ್ಗವನ್ನು ಆಯ್ಕೆ ಮಾಡಿಕೊಂಡಿತು. ನಾರ್ತರ್ನ್ ಲಿಮಿಟ್ ಲೈನ್ ಬಳಿ ಗಸ್ತು ಕಠಿಣವಾಗಿರುವುದರಿಂದ ಇದು ದೊಡ್ಡ ಸವಾಲಾಗೇ ಪರಿಣಮಿಸಿತ್ತು.
2 ಗಂಟೆಗಳಲ್ಲಿ ಗ್ರೇಟ್ ಎಸ್ಕೇಪ್
ಮೇ 6, 2023 ರಂದು ಬಿರುಗಾಳಿ ಮತ್ತು ಮಳೆಯ ಮುನ್ಸೂಚನೆ ಸಿಕ್ಕಾಗ ಕುಟುಂಬ ಎಸ್ಕೇಪ್ ಆಗುವ ನಿರ್ಧಾರ ಕೈಗೊಂಡಿತು. ಮಳೆಯ ಕಾರಣ ರಾಡಾರ್ಗಳಲ್ಲಿ ದೋಣಿ ಪತ್ತೆಯಾಗುವುದು ಕಷ್ಟ ಎಂಬುದು ಅವರ ಲೆಕ್ಕಾಚಾರವಾಗಿತ್ತು.
ಕಿಮ್ ಇಲ್-ಹ್ಯೋಕ್ ಅವರ ಐದು ತಿಂಗಳ ಗರ್ಭಿಣಿ ಪತ್ನಿ ಮತ್ತು ಇಬ್ಬರು ಚಿಕ್ಕ ಮಕ್ಕಳು ಮೊದಲು ನೆಲಬಾಂಬ್ ಇರುವ ಅಪಾಯಕಾರಿ ಪ್ರದೇಶವನ್ನು ಕಾಲ್ನಡಿಗೆಯಲ್ಲೇ ದಾಟಬೇಕಾಯಿತು. ಸಿಕ್ಕಿಬೀಳುವ ಭೀತಿಯಿಂದ 4 ಮತ್ತು 6 ವರ್ಷದ ಇಬ್ಬರು ಕಂದಮ್ಮಗಳನ್ನು ಗೋಣಿಚೀಲದಲ್ಲಿ ಅಡಗಿಸಿ ಇಡಲಾಗಿತ್ತು. ಮಕ್ಕಳು ಕಿಂಚಿತ್ತೂ ಶಬ್ದ ಮಾಡದಂತೆ ಸೂಚಿಸಲಾಗಿತ್ತು. ಸುಮಾರು 2 ಗಂಟೆಗಳ ಜೀವ ಪಣಕ್ಕಿಟ್ಟು ಪ್ರಯಾಣಿಸಿದ ಬಳಿಕ ಅವರು ಉತ್ತರ ಕೊರಿಯಾದ ಗಡಿಯನ್ನು ದಾಟಲು ಯಶಸ್ವಿಯಾದರು.
ಗಡಿಯನ್ನು ದಾಟಿದ ನಂತರ ಅವರು ದಕ್ಷಿಣ ಕೊರಿಯಾ ವ್ಯಾಪ್ತಿಯ ಯೆನ್ಪ್ಯೋಂಗ್ ದ್ವೀಪದ ಬಳಿ ತಲುಪಿದರು. ಅಲ್ಲಿನ ನೌಕಾಪಡೆ ಅವರನ್ನು ಗುರುತಿಸಿ ರಕ್ಷಣೆ ನೀಡಿತು. ಬಳಿಕ ಅವರ ಗುರುತನ್ನು ದೃಢೀಕರಿಸಿ ಆಶ್ರಯ ನೀಡಿತು. ಪ್ರಸ್ತುತ ಕುಟುಂಬವು ಸುರಕ್ಷಿತವಾಗಿದೆ.
