newsics.com | ನ್ಯೂಸಿಕ್ಸ್
ಸಿಯೋಲ್: ದಕ್ಷಿಣ ಕೊರಿಯಾದಲ್ಲಿ ಇದುವರೆಗಿನ ಇತಿಹಾಸದಲ್ಲೇ ಅತ್ಯಂತ ದುಬಾರಿ ಹಾಗೂ ಹೈಪ್ರೊಫೈಲ್ ಎನ್ನಲಾದ ವಿಚ್ಛೇದನ ಪ್ರಕರಣವೊಂದರ ತೀರ್ಪು ಜಾಗತಿಕ ಮಟ್ಟದಲ್ಲಿ ಭಾರೀ ಸಂಚಲನ ಸೃಷ್ಟಿಸಿದೆ. ಪತಿಯ ಅಕ್ರಮ ಸಂಬಂಧವನ್ನು ಕಾನೂನು ಹೋರಾಟದ ಮೂಲಕ ಸಾಬೀತುಪಡಿಸಿದ ಮಾಜಿ ಪತ್ನಿಗೆ ಸಿಯೋಲ್ ಹೈಕೋರ್ಟ್ ಐತಿಹಾಸಿಕ ಜಯ ತಂದುಕೊಟ್ಟಿದೆ.
ದೇಶದ ಪ್ರಮುಖ ಕೈಗಾರಿಕಾ ದಿಗ್ಗಜ ‘ಎಸ್ಕೆ ಗ್ರೂಪ್’ (SK Group) ಅಧ್ಯಕ್ಷರಾದ ಚೆಯ್ ಟೇ-ವಾನ್ ಅವರು ತಮ್ಮ ಮಾಜಿ ಪತ್ನಿ ರೋಹ್ ಸೋ-ಯಂಗ್ಗೆ ಬರೋಬ್ಬರಿ 944 ಬಿಲಿಯನ್ ವಾನ್ (ಅಂದರೆ ಭಾರತೀಯ ಕರೆನ್ಸಿಯಲ್ಲಿ ಸುಮಾರು 6,245 ಕೋಟಿ ರೂಪಾಯಿಗಳು) ನಗದನ್ನು ಪರಿಹಾರವಾಗಿ ನೀಡುವಂತೆ ಹೈಕೋರ್ಟ್ ಕಟ್ಟುನಿಟ್ಟಿನ ಆದೇಶ ಹೊರಡಿಸಿದೆ.
ದಕ್ಷಿಣ ಕೊರಿಯಾದ ಮಾಜಿ ಅಧ್ಯಕ್ಷ ರೋಹ್ ಟೇ-ವೂ ಅವರ ಪುತ್ರಿಯಾಗಿರುವ ರೋಹ್ ಸೋ-ಯಂಗ್ ಹಾಗೂ ಚೆ ಟೇ-ವೋನ್ 1988ರಲ್ಲಿ ವಿವಾಹವಾಗಿದ್ದರು. ಆದರೆ, 2015ರಲ್ಲಿ ಚೆ ಟೇ-ವೋನ್ ಅವರಿಗೆ ಬೇರೆ ಮಹಿಳೆಯೊಬ್ಬರ ಜತೆ ಅನೈತಿಕ ಸಂಬಂಧವಿರುವುದು ಹಾಗೂ ಅವರಿಗೆ ಮಗುವಾಗಿರುವುದು ಜಗಜ್ಜಾಹೀರಾಯಿತು. ಈ ವಿಚಾರ ಹೊರಬೀಳುತ್ತಿದ್ದಂತೆ ಚೆ ಟೇ-ವೋನ್ ತಮಗೆ ವಿಚ್ಛೇದನ ನೀಡುವಂತೆ ಕೋರ್ಟ್ ಮೆಟ್ಟಿಲೇರಿದ್ದರು.
ಪ್ರಕರಣದ ವಿಚಾರಣೆ ನಡೆಸಿದ ಸಿಯೋಲ್ ಹೈಕೋರ್ಟ್, ಎಸ್ಕೆ ಗ್ರೂಪ್ನ ಆಸ್ತಿ ಮತ್ತು ಸಾಮ್ರಾಜ್ಯದ ಬೆಳವಣಿಗೆಯಲ್ಲಿ ಪತ್ನಿ ರೋಹ್ ಸೋ-ಯಂಗ್ ಅವರ ಪರೋಕ್ಷ ಕೊಡುಗೆ ಹಾಗೂ ಕುಟುಂಬ ನಿರ್ವಹಣೆಯ ಪಾತ್ರ ದೊಡ್ಡದಿದೆ ಎಂದು ಅಭಿಪ್ರಾಯಪಟ್ಟಿದೆ. ಆದರೆ, ಕಂಪನಿಯ ಆರಂಭಿಕ ಬೆಳವಣಿಗೆಗೆ ಆಕೆಯ ತಂದೆಯ ರಾಜಕೀಯ ನಿಧಿಗಳೇ ಕಾರಣ ಎಂಬ ವಾದವನ್ನು ಕೋರ್ಟ್ ತಳ್ಳಿಹಾಕಿದೆ. ಹೈಕೋರ್ಟ್ ತೀರ್ಪಿನಿಂದ ಹಿನ್ನಡೆಯಾಗಿರುವ ಉದ್ಯಮಿ ಚೆ ಟೇ-ವಾನ್, ಈ ಆದೇಶವನ್ನು ಪ್ರಶ್ನಿಸಿ ಸುಪ್ರೀಂ ಕೋರ್ಟ್ಗೆ ಮೇಲ್ಮನವಿ ಸಲ್ಲಿಸಲು ಸಿದ್ಧತೆ ನಡೆಸುತ್ತಿದ್ದಾರೆ ಎನ್ನಲಾಗಿದೆ.
Sonam Wangchuk ಸೋನಮ್ ವಾಂಗ್ಚುಕ್ 26 ದಿನಗಳ ಉಪವಾಸ ಅಂತ್ಯಗೊಳಿಸಲು ಕಸರತ್ತು ನಡೆಸಿದವರು ಯಾರು? ಇಲ್ಲಿದೆ ಅಸಲಿ ಕಥೆ
