newsics.com | ನ್ಯೂಸಿಕ್ಸ್
ಬೆಂಗಳೂರು: ಇಂದಿನ ಡಿಜಿಟಲ್ ಜಗತ್ತಿನಲ್ಲಿ ಪ್ರತಿಯೊಬ್ಬರ ಜೇಬಿನಲ್ಲೂ ಎಟಿಎಂ ಕಾರ್ಡ್ ಇದ್ದೇ ಇರುತ್ತದೆ. ಹಣ ಡ್ರಾ ಮಾಡುವುದರಿಂದ ಹಿಡಿದು ಬ್ಯಾಂಕ್ ಬ್ಯಾಲೆನ್ಸ್ ಚೆಕ್ ಮಾಡುವವರೆಗೆ ಎಲ್ಲದಕ್ಕೂ ಇದು ಅತ್ಯಗತ್ಯ. ಆದರೆ, ಯಾವುದೇ ಬ್ಯಾಂಕ್ನ ಎಟಿಎಂ ಕಾರ್ಡ್ ಪಿನ್ (PIN) ಸಂಖ್ಯೆಯನ್ನು ಗಮನಿಸಿದರೆ ಅದು ಕೇವಲ ನಾಲ್ಕು ಡಿಜಿಟ್ಗಳನ್ನು ಮಾತ್ರ ಹೊಂದಿರುತ್ತದೆ. ಜಗತ್ತಿನಾದ್ಯಂತ ಬಳಕೆಯಲ್ಲಿರುವ ಈ ವ್ಯವಸ್ಥೆಯ ಹಿಂದೆ ಒಂದು ಸ್ವಾರಸ್ಯಕರವಾದ ಹಳೆಯ ಇತಿಹಾಸವಿದೆ.
ಸ್ಕಾಟ್ಲ್ಯಾಂಡ್ ಮೂಲದ ಪ್ರಸಿದ್ಧ ಸಂಶೋಧಕ ಜಾನ್ ಶೆಫರ್ಡ್ ಬ್ಯಾರನ್ ಎಂಬುವವರು ಈ ಎಟಿಎಂ ಯಂತ್ರವನ್ನು ಜಗತ್ತಿಗೆ ಪರಿಚಯಿಸಿದರು. 1967ರ ಜೂನ್ 27 ರಂದು ಲಂಡನ್ನಲ್ಲಿ ಮೊದಲ ಬಾರಿಗೆ ಈ ಮಿಷನ್ ಅನ್ನು ಅಳವಡಿಸಲಾಯಿತು. ಒಮ್ಮೆ ಜಾನ್ ಶೆಫರ್ಡ್ ಅವರಿಗೆ ತುರ್ತಾಗಿ ಹಣ ಬೇಕಿದ್ದಾಗ ಬ್ಯಾಂಕ್ ಮುಚ್ಚಿತ್ತು. ಆಗ ಅವರಿಗೆ ಚಾಕೊಲೇಟ್ ಕೊಡುವ ವೆಂಡಿಂಗ್ ಯಂತ್ರದ ಮಾದರಿಯಲ್ಲೇ ಹಣ ನೀಡುವ ಸಾಧನವನ್ನು ಏಕೆ ತಯಾರಿಸಬಾರದು ಎಂಬ ಯೋಚನೆ ಬಂತು. ಆ ಯೋಚನೆಯ ಫಲವೇ ಇಂದಿನ ಎಟಿಎಂ.
ಆರು ಅಂಕಿಗಳ ಪಿನ್ ನಾಲ್ಕಾಗಿದ್ದು ಹೇಗೆ?
ಆರಂಭದಲ್ಲಿ ಜಾನ್ ಶೆಫರ್ಡ್ ಅವರು ಎಟಿಎಂ ಸುರಕ್ಷತೆಗಾಗಿ ಆರು ಅಂಕಿಗಳ (6 Digit) ಪಿನ್ ಸಂಖ್ಯೆಯನ್ನು ನಿಗದಿಪಡಿಸಲು ಮುಂದಾಗಿದ್ದರು. ಆದರೆ, ಈ ಐಡಿಯಾವನ್ನು ಅವರು ತಮ್ಮ ಪತ್ನಿ ಕ್ಯಾರೋಲಿನ್ ಅವರ ಬಳಿ ಹಂಚಿಕೊಂಡಾಗ ಹೊಸ ಸಮಸ್ಯೆಯೊಂದು ಎದುರಾಯಿತು.
ಅವರ ಪತ್ನಿಗೆ ಆರು ಅಂಕಿಗಳ ದೊಡ್ಡ ನಂಬರ್ ಅನ್ನು ನೆನಪಿನಲ್ಲಿಟ್ಟುಕೊಳ್ಳುವುದು ಕಷ್ಟವಾಗುತ್ತಿತ್ತು. ಅವರು ಕೇವಲ ನಾಲ್ಕು ಅಂಕಿಗಳನ್ನು ಮಾತ್ರ ಸುಲಭವಾಗಿ ನೆನಪಿಡುತ್ತಿದ್ದರು. ಪತ್ನಿಯ ಈ ಮರೆಗುಳಿತನವನ್ನು ಗಮನಿಸಿದ ಜಾನ್, ಬ್ಯಾಂಕಿಂಗ್ ಸುರಕ್ಷತೆಯ ನಿಯಮವನ್ನು ತಕ್ಷಣವೇ ನಾಲ್ಕು ಅಂಕಿಗಳಿಗೆ (4 Digit) ಸೀಮಿತಗೊಳಿಸಿದರು. ಅಂದು ಪತ್ನಿಗಾಗಿ ಮಾಡಿದ ಈ ಬದಲಾವಣೆಯೇ ಇಂದು ಜಗತ್ತಿನಾದ್ಯಂತ ಸ್ಟ್ಯಾಂಡರ್ಡ್ ನಿಯಮವಾಗಿ ಮಾರ್ಪಟ್ಟಿದೆ.
ನಾಲ್ಕು ಅಂಕಿಯ ಪಿನ್ ಸುರಕ್ಷಿತವೇ?
ನಾಲ್ಕು ಅಂಕಿಗಳ ಪಿನ್ ಅನ್ನು ಹ್ಯಾಕ್ ಮಾಡುವುದು ಸುಲಭ ಎಂಬ ಆತಂಕ ತಜ್ಞರಲ್ಲಿ ಇತ್ತು. ಅದಕ್ಕಾಗಿಯೇ ಬ್ಯಾಂಕಿಂಗ್ ವಲಯದಲ್ಲಿ ಮತ್ತೊಂದು ಭದ್ರತಾ ನಿಯಮವನ್ನು ಜಾರಿಗೆ ತರಲಾಯಿತು. ಇದರ ಪ್ರಕಾರ, ಯಾವುದೇ ಎಟಿಎಂ ಯಂತ್ರದಲ್ಲಿ ಸತತವಾಗಿ 3 ಬಾರಿ ತಪ್ಪು ಪಿನ್ ನಂಬರ್ ಪ್ರಮಾದವಶಾತ್ ನಮೂದಿಸಿದರೆ, ಆ ಕಾರ್ಡ್ ತಕ್ಷಣವೇ ತಾತ್ಕಾಲಿಕವಾಗಿ ಲಾಕ್ ಆಗುತ್ತದೆ. ಈ ತಂತ್ರಜ್ಞಾನದಿಂದಾಗಿ 4 ಅಂಕಿಗಳ ಪಿನ್ ವ್ಯವಸ್ಥೆಯು ಇಂದಿಗೂ ಅತ್ಯಂತ ಸರಳ ಮತ್ತು ಸುರಕ್ಷಿತವಾಗಿ ಮುಂದುವರಿದಿದೆ.
